Ruma 10
10
Bay Madagal ataa Yahuda aagi abə həji ma ŋkula ɗa Yahuda aagi ŋtaguleŋ
1Zlina mana aagi, may naka a ꞌunəf naka, abə tarha naka a Bizlaf ci, həji Yahuda aagi mareh ta. 2Ayəw, sa kula a zlap ci: aa kaŋcah aska a ɗalanə zlən a Bizlaf, ama ŋcah ndə aa kaŋcah watsa ci, aa tavəla ha ta səku: 3Kata Bizlaf a bəw həji aagi a ɗa dəlili avaŋgəy ya, aa tazlima səku. Aa deŋ ka ci, landza ta ndə aagi a mən ana ma dəlili. Ikwa abə aa ŋkalzə təf ndə Bizlaf a ji a bəw həji aagi ka a həji ma dəlili aagi. 4Ara ndə a ɗa, kwakuɗaŋ ma ma garagar ci, sha ana Kərist, aska kala ala ma ɗalanə awa a Yesu, Bizlaf a bəw ka ana ala ma dəlili.
5Tsakwa ana ma ndə Musa a ŋtir ata təf ta bəw ala a ɗa dəlili gwara ara ma ma garagar: Kala ala ma kanjin səkən ndə ma ma garagar a kaɗiwi ya, a andza dawna sha. 6Ama tsakwa abə a kazlap ana ma ma dəlili ma kaghal ɗal awa: Hwa ɗiw a zlap a ꞌunəf kwa ya: Ma kaaɓin a taf a wəzlaf vaye? hwiy səku. Ghal tə ci, aska a nda tadukha Kərist. 7Hwa ɗiw a zlap ya: Ma kaaɓin a taduk a riy a jiɓ vaye? hwiy səku. Ghal tə ci, a nda garazə a wəzəm Kərist a bəza a taba həji ma bazl ta aagi. 8Zləm tə ana ma watsə iy veme? Ma watsa mbeh abəra hwa, a takam kwa, a ꞌunəf kwa. Ma watsa, ana ma ta ɗal awa ndə ni kaɗafə. 9Andza, a takam kwa, hwa kazlap atama həji aagi tiwtiw Yesu ana Bay Madagal, zhana andza a ꞌunəf kwa hwa taɗal awa, a Bizlaf ana ma garazə Yesu a bəza a jiɓ a taba həji ma bazl ta aagi, hwa areh kwa. 10Ara ndə a ɗa, ɗal awa abə ꞌunəf ana ma kajaɓ ala a ɗa dəlili, ndə ala a kaghal ɗal awa tə abə ma tə, sha ana ma kajaɓ ala a reh. 11Ara ndə a ɗa, tazlapaya a Ɗerewal ma ghwaɗeɗe: Kala ala ma ɗal awa aska ma tə ci, haw a kaagwar a dzə səku. 12Ikwa ci, parpar Yahuda aagi abə həji ma ŋkula ɗa Yahuda aagi akas: Təmta tiwtiw ya, Bay Madagal ta ŋtaguleŋ. Sha ma kavəlatana səkən ŋtsəɓ tə a həji ma kaya zləm tə aagi tiwtiw. 13Ara ndə a ɗa, kwa vaye ma kayazə zləm Bay Madagal ci, a aɓin a ɗa reh.
14Ama, aagi asən a yazə, andza aa taɗalanə awa aka səku avaŋga? Aagi asən a ɗalanə awa, andza aa tazlima ma tə aka səku avaŋga? Aagi asən a zlima ma tə, andza aa taɗaf ma tə aka səku ya, avaŋga? 15A asən a ɗaf ma, andza ala tazlənazə aka səku, avaŋga? Taŋtiraya a Ɗerewal ma ghwaɗeɗe yəm: Ɓas ara həji ma kanda a ɗaf Ma wiyə ma təwah aagi. 16Ama həji aagi tiwtiw aa taɗal awa aska Ma wiyə ma təwah akas, ara ndə a ɗa, Isaya tazlap, iŋgaya: Bay Madagal, ala ma ɗal awa aska ma ndə ni ɗaf vaya? 17Ikwa ci, ndə həji zlima ma abə həji kaɗal awa, ma watsa a ɗa zlap ataa Kərist. 18Sa kaɗiwzə mbara: Yahuda aagi, aa tava a zlimazə zlap watsə aka wəra? Ama andza aa tazlima, Ɗerewal ma ghwaɗeɗe, iŋgaya:Həji tazlima ma ta a ŋge a manahayak tiwtiw, azha vaŋ ata kwandekw manahayak. 19Mbara sa kaɗiwzə: həji Isərayila aagi tazlima wəra? Musa tazlapa bəza mpər: Sa abəwahuni ka a həji sərah aagi, aska həji ma ŋkula ɗa ŋter həji aagi, sa aghuɗekahuni ꞌunəf aka aska həji ndə ŋkwaɓ a ŋkula ndza a ha ta aagi . 20Isaya tatəlzə a ghalə, iŋgaya: Sa tava a ndzaha a taba həji ma ŋkula gasaka aagi, ana Bizlaf iy, sa taghalatana ha naka a həji ma ŋkula ɗiwzə kwa veme ara sa aagi. 21Ama, ata həji Isərayila aagi, tazlap, iŋgaya: Kala pish sa tatsa ra ka aska həji ma ŋkula ji ma naka aagi, abə həji badaway aagi.
اکنون انتخاب شده:
Ruma 10: GOU
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید