पेरेरित 3
3
पत्‍रुस एक जनें नङ्गरा मनइकेहें निक करनें
1एक रोज दुपहरके तिन बजे पराथ्‍ना करना बखतमे पत्‍रुस आउर युहन्‍ना मन्‍दिरमे जाइत रेहें। 2मनइभर एक जनें जल्‍मेति नङ्गरा मनइकेहें भिख मागे कहिके रोज मन्‍दिरके सुग्‍घर दोरमे लाक धरदेहें। 3जब उ मनइ पत्‍रुस आउर युहन्‍नाकेहें मन्‍दिरभित्‍तर पेलत देखल, तउ ओइनति भिख माँगल। 4पत्‍रुस आउर युहन्‍ना उ मनइकेहें एकटक दिखनें, तउके पत्‍रुस अइसे कहनें, “हम्‍मरघइन देखो!” 5उहिकमारे उ कुछ पइंसा पइमुँ कि कहिके सोंचके खुसि हुइति ओइन देखल। 6तउके पत्‍रुस उ मनइकेहें कहनें, “मोरतिरा सोंन चाँदि ते नाइआहे, पर जा आहे, उहि मइ तुम्‍हिन दहमु। नासरत येसु खिरिस्‍टके नाउँमे#३:६ येसु खिरिस्‍टके नाउँमे: इ कहलके येसु खिरिस्‍टके अधिकारमे कहल आहे। नेंगो।” 7ओहकापाछुक पत्‍रुस उ मनइक दहिना हाथ पकरके उठइनें, तउके ओहका पउलि आउर घुठ्‌ठि बलगर हुइगेल। 8उ मनइ झरफराक उठल आउर नेंगे लागल। उ निंगति, कुदति, आउर परमेस्‍वरके परसन्‍सा करति ओइनसँघे मन्‍दिरमे गेल। 9जब सब जनें ओहके नेंगत आउर परमेस्‍वरके परसन्‍सा करत दिखनें, 10तउके ओइनें मन्‍दिरके सुग्‍घर दोरमे भिख मँगइया मनइ यिहि आहे कहिके चिन्‍हलहनें। आउर इ कइसे निङ्‍गना हुइगेल? कहिके ओइनें बहुते अचम परनें।
मन्‍दिरमे पत्‍रुसके परचार
11उ निक होइल मनइ पत्‍रुस आउर युहन्‍नाके पाछेपाछे लागल देखके सब मनइभर बहुते अचम मन्‍ति सोलोमनके उसारमे एकसँघे ओइनतिरा दउरत अइनें। 12उ देखके पत्‍रुस मनइभरिन कहनें, “इस्‍राइलके दादाभइयो, इ बातमे तोइनें काहिक अचम मन्‍तो? हम्‍मर अपनें सक्‍ति या भक्‍तिति हमरे येहके निङ्‍गना बनाइल ढार काहिक अचम परके हम्‍हिन दिखतो? 13हम्‍मर पुरखा अब्‍राहाम, इसहाक, याकुबके परमेस्‍वर अपना सेबक येसुकेहें आदर करनें। तोइनें भर येसुकेहें मारेकपारि कहिके सतरुभरिन हाथमे सउँपदहलो। पिलातस उनके छोरेक खुजनेंत फेक तोइनें नाइमन्‍लो। तोइनें पिलातसके आगे उनके असुइकार करलो।#पर्‌स ३:१५ 14उ परम पबित्‍र आउर परम धरमि रेहें। पर तोइनें उनका बदलम एक जनें ज्‍यानमाराकेहें छोरदहना माँग करलो।#मत्‍ति २७:१५-२३; मर्‌क १५:६-१४; लुका २३:१३-२३; युह १९:१२-१५ 15आउर जिन्‍दगि दिबइयाकेहें भर तोइनें मरलो। पर परमेस्‍वर उनके मरलमहति जिति करले आहें। इ बातके हमरे साछि होइ। 16येसुके नाउँमे बिस्‍वास करलकेमारे तोइन देखल आउर चिन्‍हल यि मनइ बलगर होइल आहे। येसुके नाउँमे बिस्‍वास करलकेमारे इ मनइ तोइन आगेये निक होइल आहे।
17“अब दादाभइयो, मोहके पता आहे, तोइनें अन्‍जानमे उइसन करलो, आउर तोइन सासकभर फेक उस्‍तिहिं करनें। 18पर परमेस्‍वर अपन मन्‍कल अगम्‍बानि अइसे पुरा करनें। परमेस्‍वर मुक्‍ति दिबइया खिरिस्‍टकेहें दुख सहेक परि कहिके अगम्‍जानिभरिनके मुहमहति अगम्‍बानि मन्‍कले रेहें। 19उहिकमारे अब अपना-अपना पाप मानके परमेस्‍वरतिरा आउ, आउर उ तोइन पाप माफ करदिहें। तउके परमपरभुति आत्‍मामे सान्‍ति आउर आनन्‍द पइबो। 20तउके परमेस्‍वर तोइन तहन पहिलेहेंतिति छाँटल मुक्‍ति दिबइया खिरिस्‍टकेहें फेर पठादिहें। उहि खिरिस्‍ट ते येसु आहें। 21पर पबित्‍र अगम्‍जानिभरिन कहल ढार परमेस्‍वर सब चिझ नम्‍मा बनइना बखत नाइआइततक येसुकेहें स्‍वरगेमे रेहेकपरि। 22मोसा फेक अइसे कहले रेहें, ‘परमपरभु तोइन परमेस्‍वर तोइन तहन तोइनिहिंन जातिमहति मोर ढार एकठोर अगम्‍जानि पठइहें, उनका कहल सब बात तोइन सुनेकपारि।#बेबस १८:१५,१८ 23पर उनका बात नाइसुनइया मनइभर परमेस्‍वरके जनभरिनतिति अल्‍गट करलजाइ आउर नास होइ।’#बेबस १८:१९
24“सामुएलतिति लइके ओहकापाछुक सब अगम्‍जानिभर आज कल्‍ह हुइति रहल घटनाके बारेम मन्‍कले आहें। 25अगम्‍जानिभरिन करल परमेस्‍वरके करार तोइन तहन आहे। परमेस्‍वर तोइन पुरखा अब्‍राहामकेहें कहनें, ‘तुम्‍हर सन्‍तानतिति धरतिक सब जाति आसिस पइहें।’#उत २२:१८ 26जब परमेस्‍वर अपना सेबक येसुकेहें पठइनें, तउ उ तोइन सबके दुस्‍ट कामति लउटाक आसिस देहेक तहन पहिले उनके तोइनतिरा पठइनें।”
© 2024 (Active), Mother Tongue Translators Society and Wycliffe Bible Translators, Inc. All rights reserved.