Varoma 8
8
Ukaro womoMpepo
1Ntaantani kutupu hena epanguro lyokuzonagura ava va kara mwaJesus Kristusa. 2Yeeyi Veta zoMpepo ezi azi tura mwenyo ava va kara mwaJesus Kristusa, yizo za mangurura nge koveta zononzo nezi zonomfa. 3Eyi ya tjindira Veta morwaupirankondo worutu ropasintu, Karunga ga yi mana po. Age kwa pangwire nonzo pokutuma Munwendi morutu rokufana marutu getu aga gononzo, a ya guse po nonzo. 4Karunga kwa yi ruganena eyi asi uhungami ou za hepa ko Veta, u sikilire mo mwetu, ose ava twa hamena koukaro wopaMpepo, kapisi koukaro wopasintu. 5Ava va hamena koukaro wopasintu, kutamba yopasintu. Ano ava va hamena koukaro wopaMpepo, kutamba yopaMpepo. 6Kugongama yopasintu kureta nomfa. Ano kugongama yopaMpepo kureta mwenyo nombili. 7Yitambo yopasintu kureta unkore naKarunga. Ayo kapi ayi limburukwa koVeta zaKarunga, nayene nokuyivhura si. 8Ava ayi pangere yitambo yopasintu, nokuvhura si kuza Karunga komutjima. 9Mpepo zaKarunga nsene zi kara mweni, kuninka asi Mpepo yizo nye azi mu pangere, kapisi ukaro wopasintu. Nye muntu ntene a pira Mpepo zaKristusa, kapi hena a hamene kwendi. 10Nye Kristusa ntene a kara mweni, mpili ga fe marutu geni morwanonzo, nye Mpepo azo tazi mu retere mwenyo, morwa Karunga ga mu hungameka. 11Mpepo zaKarunga ogu ga pindura Jesus Kristusa koufe ntene zi kara mweni, makura ogu ga pindura Kristusa koufe, nga tulisa nomomarutu geni gomafe mwenyo koMpepo zendi ezi za kara mweni.
12Ano yimo nye vakwetu, ose kuna kara nosinka, nye kapisi sopasintu asi tu kare moukaro wopasintu ou ga panda marutu getu. 13Nsene mu kara moukaro wopasintu, nyone kufa. Nye nsene mu dipagesa koMpepo zaKarunga yirugana yopasintu, nyone kukara nomwenyo. 14Yeeyi navenye ava azi pitisire Mpepo zaKarunga, yiwo vana vaKarunga. 15Yeeyi Mpepo ezi mwa tambura kwaKarunga kapisi zokumuninka vapika, asi mu kare hena moutjirwe. Azo Mpepo zokutuninka tu kare vana vaKarunga, makura yiyo atu kugu kwaKarunga asi, “Tate! tate!” 16Mpepo zaKarunga kulipakerera nompepo zetu, zi gave undipo asi ose vana vaKarunga. 17Ano nsene asi tu vana vaKarunga, tu vapingi nye vaKarunga, tu vapingi kumwe naKristusa. Nsene tu mu nyandesa ko Kristusa nomahepeko, ngava ka tu yererepeka hena kumwe nendi.
Eyererepeko lyokomeho
18Ame kuna kugazara asi, kanyando aka tuna kunyanda ntaantani, nokuwapa si kukahetakanesa nouyerere ou ngau ka tu horokera. 19Unsitwe mudima kuna kundidira nehuguvaro lyenene ehoroko lyovana vaKarunga. 20Yeeyi unsitwe kwa u gava mezonauko. Kapisi wene wa yi hara, Karunga yige ga yi panga. Nye ehuguvaro eli lya kara po lyeli asi, 21unsitwe ngava u zowora mo moupika wezonauko, ngau ze mezowoko lyouyerere wovana vaKarunga. 22Twa diva asi unsitwe mudima kukema dogoro nantaantani ngesi, awo kuzuvha kukora ngwendi mukadi goporuzega. 23Kapisi unsitwe welike, nye nose ava twa kara noMpepo, uhwi waKarunga womuhowo, kuna kupya mwanyamwetu pokundindira asi Karunga a tu ninke vana vendi pokuzowora marutu getu. 24Yeeyi ose kwa tu parwira mehuguvaro. Nye nsene o mona eyi wa ndindira, patupu hena endindiro. Yeeyi yilyogu a ndindire eyi ana kumona? 25Ano nsene tu huguvara eyi tuna dili kumona, kuyindindira nedidimiko.
26NoMpepo nazo kutukwafa moupirankondo wetu. Yeeyi kapi twa diva eyi twa fira kukanderera, nye Mpepo ko mwazene yizo azi tu kanderere mo oku tazi keme ya hana kuvhura kutanta. 27Nye Karunga ogu a kona‐kona nomutjima dovantu, kwa diva eyi azi gazara Mpepo. Yeeyi Mpepo kukandererera mo vapongoki, moomu ga yi harera Karunga.
28Twa diva asi, ava va hara Karunga, yininke nayinye Karunga kuyivagendesera momuwa, ava ga horowora Karunga mokuliza nositambo sendi. 29Ava ga koneka nakwanare Karunga, kwa va lipakera hena nakwanare va fane Munwendi, nkumwe nga kare mbeli zepata lyenene, mukurwavamumbya wovanzi. 30Ano ava ga lipakera, yiwo ga va horowora; ava ga horowora, yiwo ga hungameka; ano ava ga hungameka, yiwo ga yererepeka hena.
Eharo lyaKarunga lyomwaJesus Kristusa
31Omu natu uyungeni nye kweyi ngapi? Nsenesi Karunga kwa hama kwetu ose, yilye gokuvhura kutulipepekera? 32Karunga ogu ga dira kuruva Munwendi, yiyo ga mu zamba mwarwetu ose natuvenye, a dire nye kutupa mawoko‐woko yininke nayinye yapeke kumwe nendi? 33Yilyogu nga pa usima ava ga horowora Karunga? Nye Karunga mwene yige a va hungameke. 34Muntu kuvhura kuvapangura ndi? Jesus Kristusa yige ogu ga fa, unene po hena yiyo va mu pindura koufe. Makura yiyo ga ka hingira korulyo rwaKarunga, a tu kandererere. 35Yinke hena yokutugusa mo meharo lyaKristusa? Udigu ndi mpwagetjima ndi mahepeko ndi erumbu ndi nkagi ndi simpagwa ndi rufuro romurudipagi? 36Ngwendi moomu va tjanga asi:
“Mwaroge ava tu dipagere ha lya pumina tali ka toka.
Ose kuturugana ngwendi nonzwi dokukatoma.”
37Hawe, mwanayinye eyi ose tu vafundi twa pitakanena, mogu ga tu hara. 38Nye ame kwa yi diva nawa‐nawa asi, nayimwe si yokutugusa mo meharo lyaKristusa: nonomfa si deedi nomwenyo si novaengeli si nomapangero si ndi nonkondo donompepo, noyininke si yantani neyi si yokomeho. 39Neyi si yekeguru neyi si yokonhi‐nhi, nasimwe si poyisitwa nayinye esi sokutugusa mo meharo lyaKarunga eli twa kara nalyo mwaJesus Kristusa, Hompa gwetu.
© Egwanekerobibeli Lyanamibia 1987, 2003
© Bible Society of Namibia 1987, 2003