Yirugana Yovapositoli 9
9
Elitezurururo lyaSauru
1Siruwo oso age Sauru simpe kuna kutwikira kuyoronganesa momudona nokudipaga varongwa vaHompa. Makura ta zi komuprisiteli gomunene, 2ta ka hundira ko nombilivhe dokuza nado konosinagoge daDamasikusi, asi ngano nsene a ka gwana ko vantu wokuhamena Nzira zaHompa, va kare vagara, va kare vakadi, makura ngano a ka va pandeke, a ka va rete koJerusarema.
3Age simpe kuna kugenda ta hara kusika koDamasikusi, ga liharuka ko, uzera wokutunda meguru tau mu temene, 4makura ta ligandere pevhu. Ano a purakene ko, ezwi lina kutanta asi: “Sauru, Sauru, yinke ono kuhepekera nge?” 5Age ta pura asi: “Nyove yilye, Hompa?” Hompa ta limburura asi: “Nyame Jesus ogu ono kuhepeka. (Ove udigu kusanga sitwa.” 6Mositetu sendi omo, age kuna kukankama, ta pura asi: “Hompa, eyi ono hara asi ni yi rugane yinke?” Ano Hompa ta mu limburura asi:) “Katuka o ze kositata, yiko nava ka yi ku tantera eyi no rugana.” 7Vagara ava va gendere nendi, kwa fire nsika pokuzuvha ezwi, nye nogu si va mwene. 8Sauru makura ta katuka po, nye a pahuke, kumona nokumona si. Kwa mu kwete nye kokuwoko, va mu tware moDamasikusi. 9Mazuva gatatu ga dilire kumona, natjakisi nagulya si.
10MoDamasikusi mwa kere murongwa, edina lyendi Ananiyasa. Ano Hompa kwa mu tanterere memoneko asi: “Ananiyasa!” Age ta limburura asi: “Nyame ogu, Hompa.” 11Hompa makura ta mu tantere asi: “Katuka o ze konzira ezi ava tumbura asi Nzira zoKuvyuka, o ka pure membo lyaJudasa, mugara gedina Sauru, Mutaruso. Tara, age kuna kukanderera. 12Sauru kuna mono memoneko mugara gedina Ananiyasa ta wiza kwendi, a mu kambeke mawoko asi a mone hena.” 13Ananiyasa ta limburura asi: “Hompa, ame kwa zuvha kovantu wovanzi yokuhamena mugara ogo, omu a hepeke vapongoki woge moJerusarema. 14Napa age kuna kara nepulisiro lyovaprisiteli wovanene lyokumupa nonkondo dokupandeka navenye ava ava fumadeke edina lyoge.” 15Nye Hompa ta mu tantere asi: “Zende, yeeyi age siruganeso sange na horowora, a divise edina lyange kovapagani nokohompa nokomuhoko gwaIsraeli. 16Yeeyi ame kuna hara, ni mu likide ruhepo rorunene oru nga ka hepera edina lyange.”
17Ananiyasa makura ta zi, ta ka hwilira monzugo, ta kambeke mawoko gendi Sauru, makura ta tanta asi: “Mukwetu Sauru, ame Hompa Jesus ana tumu nge, ogu ana ku monekere monzira ezi ono wiza, asi o mone hena, ove o zure Mpepo zoKupongoka.” 18Poopo ngoso momeho gaSauru tamu gu yininke yokufana nongande, a liharuke ko, kuna kumona hena. Makura ta katuka va mu kuhwe. 19Eyi ga lya nondya, makura ta korerere.
Sauru ta udisa moDamasikusi
Ano Sauru kwa kere mazuva gamwe moDamasikusi kumwe novarongwa.
20Ngapa katu popi, nare ana tameke kuudisa Kristusa monosinagoge asi yige MunwaKarunga. 21Navenye ava va mu zuvhire, kwa tetukire, tava pura asi: “Nani ogu kapisi yige mugara ogu ga va mana mo navenye ava ava fumadeke edina eli moJerusarema? Ayo yiyo hena ya mu reta omu, asi a va pandeke, a va tware kovaprisiteli wovanene.”
22Nye Sauru ta udisa nomupampi, ano Vajuda ava va kere moDamasikusi, tau va piyaganeke umbangi wendi wokuhamena Jesus, asi yige Kristusa.
23Eyi ga pita po mazuva, makura Vajuda nare kuna kumuliyonga asi va mu dipage. 24Epingido lyawo Sauru ta li zuvhu. Awo ngava takamesa masiku nomutenya pomarungavero gositata asi va mu dipagere po. 25Nye varongwa tava mu gusa masiku, va mu ture monkumba, va mu tupukide keguru lyekuma, va mu hegumwise.
Sauru moJerusarema
26Sauru apa ga wizire moJerusarema, kwa hetekere asi a liture movarongwa, nye varongwa navenye kwa mu tjilire, yeeyi kapi va yi pulire asi nage ntaantani murongwa nye ana kara. 27Nye Baranabasa yige ga mu kwefe, a mu tware kovapositoli. Makura ta va sansekere omu ga mwene Sauru Hompa monzira nomu ga uyungire nendi, nomu nye nga udisa nomupampi medina lyaJesus moDamasikusi. 28Sauru makura ta kara nawo, ta gendagura nawo mwa za Jerusarema, oku ta udisa medina lyaHompa nomupampi. 29Ano Vajuda wokuuyunga Rugereka nawo nga lipatana, makura awo tava hetekere ko asi va mu dipage. 30Nye vakwawo apa va yi nongwenene, makura tava mu gurumwisa koKesareya, va mu tume koTaruso.
31Mapongo govapuli nagenye gomoJudeya nomoGalireya nomoSamaliya kwa kere nompora. Ago kwa kulire moMpepo, taga kara netjiro lyokutjira Hompa, makura vapuli tava vhuka mekwafo lyoMpepo zoKupongoka.
Peturusa moLida naJope
32Mokugendagura ngoso komapongo nagenye Peturusa makura ta ka sika kovapongoki ava va kere moLida. 33Makura ta ka gwana mo mugara gumwe, edina lyendi Ayineyasa. Age nomvhura ntano‐nantatu nadinye yeeyi tupu ga rara pouro, morwa kwa kere sirema somondambo. 34Makura Peturusa ta mu tantere asi: “Ayineyasa, Jesus Kristusa ta ku verura. Katuka o zarure uro woge.” Ngapa katu popi nare ana katuka. 35Ano navenye ava va kere moLida nomoSaroni eyi va mona Ayineyasa, makura tava litezurura va hame kwaHompa.
36MoJope mwa kere murongwa gumwe gomukadi, edina lyendi Tabita (Edina lyendi moRugereka asi Dorokasa, kutanta asi menye). Age nga rugana yirugana yoyinzi yoyiwa oku ta kwafa vahepwe. 37Mazuva ogo tau mu gwana uvera, makura ta fu. Awo makura tava kuhu simpu sendi, va ka si rangeke monzugo zekeguru. 38Morwa Lida kwa likara pepi naJope, awo varongwa vana zuvhu Peturusa asi mweli moLida, makura tava tumu ko vagara vavali, va ka mu lihenge asi: “Wa ha liranga, genderera o wize kwetu.” 39Peturusa makura ta katuka a ze nawo. Apa ga ya sikire, makura tava mu twara monzugo zekeguru. Vafisavayavawo navenye tava ya pongo pwendi oku tava lili, tava mu likida yikoverero nayinye yokonhi neyi yokontunda, eyi ga rugana Dorokasa, age simpe muzuni. 40Peturusa kwa va pwagesere navenye, va ze ponze. Age ta tongeke nongoro, a kanderere. Makura ta piruka a tare kosimpu, ta tanta asi: “Tabita, pinduka!” Age ta pahuka. Tupu ga mona Peturusa, makura ta vyukilire kuhingira. 41Peturusa ta mu pe kuwoko a mu sikameke. Age ta zigida vapongoki novafisavayavawo, ta mu va likida age muzuni. 42Yina ya kara, tayi ya zuvhika moJope nazinye, ano vanzi tava pura mwaHompa. 43Peturusa kwa pukwire moJope mazuva pwaSimoni, musunti goyipapa.
© Egwanekerobibeli Lyanamibia 1987, 2003
© Bible Society of Namibia 1987, 2003