Yirugana Yovapositoli 6
6
Ehoroworo lyovadiyakoni vatano‐navavali
1Ano siruwo oso awo varongwa nawo vana vhuka. Yipo ya tamekere yivhunguta pokatji koVajuda ava ngava uyunga Rugereka nava womvharerwa. Vena womuhowo ngava tanta asi, vafisavaya vawo kapi ngava va tara eho. 2Ano owo murongo navavali makura tava pongeke mbunga mudima zovarongwa, tava tanta asi: “Kapisi nawa asi atu sige kuudisa nonkango daKarunga morwa?-?kutoporora nondya. 3Ano one vakwetu, horoworeni mo mokatji keni vagara vatano‐navavali wonkedi zongwa, ava va zura Mpepo zoKupongoka nonondunge, tu va ture moyirugana eyi, 4ose tu kerere ko nye yeeyi yokukanderera nokuudisa nonkango daKarunga.”
5Ozo nkango ozo kwa zi pandere navenye, makura tava horowora mo ava: Sitefanesa, mugara ga zura epuro noMpepo zoKupongoka, naFilipusa naPorokorusi naNikanora naTimoni naParumenasi naNikorausi goMuantiokiya, mupagani ga litezwilire a lipake Ujuda. 6Owo yiwo nye va twere komeho zovapositoli vena makura tava kanderere, tava va kambeke mawoko gawo.
7Nonkango daKarunga makura tadi lihana. Sivaro sovarongwa womoJerusarema, kwa vhukire unene, ano vaprisiteli wovanzi nawo tava tambura epuro.
Ekwato lyaSitefanesa
8Sitefanesa, mugara ga zulire nkenda nononkondo, nga rugana yitetu yoyinene noyidiviso mokatji kovantu. 9Nye vamwe kwa patanesere Sitefanesa, awo wokuhamena kosinagoge zoVamanguruki (moomu ngava va tumbura), ezi va hamene Vajuda womoKirene nava womoArekisandeliya, noVajuda vamwe womoKilikiya nava womoAsiya. 10Nye awo kapi va mu vhulilire po morwaukonentu noMpepo ezi za mu uyungisire. 11Awo makura tava zedagwire vagara vamwe mokahorehore, va tante asi: “Ose kuna mu zuvhu ta swaura Mosesa naKarunga.” 12Awo makura tava tumangeda muhoko nomasimbi novalirongi womatjangwa, vena makura tava zi kwaSitefanesa, va ka mu kwate, tava mu twara komeho zosigongi somasimbi. 13Awo makura tava reta nombangi doyimpempa, di uyunge asi: “Ogu mugara ogu kapi a pu kuswaura evega eli lyokupongoka noVeta zaMosesa. 14Yeeyi ose kuna mu zuvhu, ta tanta asi: ‘Jesus ogu Munasareta nga hanagura evega eli, age hena nga rundurura nompo edi ga tu sigira Mosesa.’ ” 15Ano vanasigongi navenye eyi va mu nwika, tava moni asi, sipara sendi kwa fene ngwendi somuengeli.
© Egwanekerobibeli Lyanamibia 1987, 2003
© Bible Society of Namibia 1987, 2003