Yirugana Yovapositoli 5
5
Ananiyasa naSafira
1Mugara gumwe, edina lyendi Ananiyasa, namukadendi Safira kwa randesere po epya lyawo limwe. 2Nye age kwa horekere ko yimaliva yimwe yi kare yamwene, mukadendi ga yi divire. Eyi ya hupire po, makura ta yi twara kovapositoli. 3Peturusa makura ta mu tantere asi: “Ananiyasa, yinke yokusigilira Satana, a pangere mutjima goge, o kumbagere Mpepo zoKupongoka, o horeke ko yimaliva yimwe, eyi ono gwana mo mepya? 4Apa wa dilire kulirandesa po, amesi lyoge lya kere, ano apa ono li randesa, yimaliva yoge tupu hena. Yinke nye ono litokwerere momutjima goge yininke yangesi? Kapi ono kumbagere vantu, Karunga ono kumbagere!” 5Ananiyasa kwa di zuvhu tupu odo nonkango, makura ta liganda ta fu. Ava va yi zuvhire, navenye tau va gwana woma wounene. 6Vadinkantu tava wiza, tava dingilike simpu sendi, makura tava mu pwagesa va ka mu vhumbike.
7Pana kupita siruwogona ngwendi novili ntatu ngoso, makura mukadi ta wiza mo, age ga hana kudiva eyi yina horoka po. 8Peturusa ta mu tantere asi: “Tantera nge eyi muna randesa epya, nsene asi yipo yina huru paapa?” Age ta tanta asi: “Nhi, yipo yina huru poopo.” 9Peturusa ta mu pura asi: “Yinke muna lizuvhire mu kumbagere Mpepo zaHompa? Tara, nompadi dava vana ka vhumbika yoge, dodo pevero, nove yiwo nava ka ku vhumbika.” 10Poopo ngoso Safira makura ta ligandere konompadi dendi, ta fu. Vandikantu makura tava wiza mo, tava ya mu gwana age ana fu, makura tava mu pwagesa mo, va ka mu vhumbike nzega nayendi. 11Mbungakriste nazinye nava navenye va yi zuvhire, makura tau va gwana woma wounene.
Yidiviso noyitetu yovapositoli
12Vapositoli kwa ruganene yidiviso noyitetu yoyinzi mokatji kovantu. Awo kwa kere nomutjima gumwe mombaraka zaSaromo. 13Nagumwe si gwapeke ga litulire mombunga zawo, nye vantu ngava va fumadeke unene. 14Nye kombunga zawo taku ligwederere vantu wovanzi‐wovanzi, novagara novakadi ava va pulire Hompa. 15Mokonda zeyi va ruganene vapositoli, makura vaveli tava va twara mononzira, tava va rangeke pomauro nopoyintali, megazaro asi Peturusa nsene na ya pita po, ngano nampili mundundumba gwendi guna gwire po gumwe. 16Ano vantu wovanzi womoyitata eyi ya kara pepi naJerusarema, tava wiza mo, va rete vaveli nava va kere nonompepo donondona, makura navenye tava va verura.
Vapositoli modorongo
17Ano muprisiteli gomunene ta katuka nava navenye va heme kwendi, kuninka asi Vasadukayi, awo kwa kere nomfudu zonene. 18Awo makura tava kwata vapositoli, tava va tura modorongo zanavenye. 19Nye muengeli gwaHompa ta wiza masiku, makura ta zegurura mavero godorongo, ta va pwagesa mo, ta tanta asi: 20“Zendeni mu ka sikame montembeli, mu ka tantere mbunga nayinye yokuhamena koukaro woupe wangesi.” 21Vapositoli kapi va limbire, makura ngurangura zonene tava zi montembeli, tava tameke kuronga.
Muprisiteli gomunene nava navenye va heme kwendi, tava zigida masimbi nagenye goVajuda kosigongi sosinene. Awo makura tava tumine vapositoli kodorongo, va ka va rete komeho zawo. 22Nye vaporosi apa va ka sikire, kapi va ka va gwene mo. Awo makura tava tengura, tava reta mbudi asi: 23“Dorongo tuna ka zi gwana, azo ha va zi zedilira nawa‐nawa, vanomeni awo kuna sikama ponze pomavero; nye apa tuna zegurura mavero, nagumwe si tuna gwana mo.” 24Ano mupitisili govaporosi wontembeli novaprisiteli wovanene apa va yi zuvhire, makura tayi va retere sitangalimba eyi ya horokerere vapositoli. 25Mugara gumwe makura ta wiza mo, ta tanta asi: “Anone, vagara ava mwa tulire modorongo, moveli montembeli, kuna kuronga.” 26Makura mukurona govanomeni wontembeli novantu vendi tava zi va ka va rete, nye kapisi komusininiko, yeeyi awo kwa tjilire vantu, asi nampo nava va dipaga nomamanya.
27Awo makura tava ka va reta komeho zosigongi. Ano muprisiteli gomunene ta va pura asi: 28“Twa yi mu nyokera nawa‐nawa asi, walye omu rongo medina lyogu mugara. Tareni si, erongo lyeni ntaantani lina lihanene Jerusarema mudima. One nani kuna hara mu tu rambekesese nomfa dogu mugara.” 29Ano Peturusa novapostoli vakwawo tava limburura asi: “Ose twa hepa po kulimburukwa unene Karunga, kupitakana vantu. 30Karunga gozinyakurwetu ga pindura koufe Jesus ogu mwa dipaga pokumupampara kosilivindakano. 31Karunga yiyo ga mu zerwira korulyo rwendi, a kare mupitisili noMuzowoli, a pe Vaisraeli evega lyokulitezurura, va gwane edongonono lyononzo. 32Ano ose nyose nombangi dendi kumwe noMpepo zoKupongoka, ezi a gava Karunga kwava ava mu zuvhu.”
33Ano masimbi eyi ga yi zuvhire, taga handuka unene, taga tokora asi va va dipage. 34Nye Mufalisayi gumwe, edina lyendi Gamaliyeli, mulirongi gomatjangwa, ogu ga fumanene komuhoko nagunye, ta sikama mosigongi, ta panga asi vapositoli va va pwagese mo tanko. 35Makura ta tantere Sigongi asi: “One Vaisraeli, takameseni kweyi muna hara kurugana ava vagara. 36Kapisi siruwo sosire sina piti po kutunda apa ka fumanene Teudasi, ogu nga tanta asi age yige Kamana?-?Kandongo. Vantu ava va heme kwendi, kwa hulire ngwendi povantu mafere gane ngoso. Eyi va mu dipaga, makura ava va hamene kwendi, va va haranganesere, yipo ya hagera poopo. 37Konyima zogu ta patukire po Judasa gomoGalireya posiruwo sokutjanga vantu. Nage mbunga zounene zovantu ga kokere, nye nage kwa mu dipagere, makura ava ngava zuvhu yendi, tava va haraganesa. 38Nayeyi ngesi eyi yimo, ni mu tantere ame: mwa ha va guma ava vagara, va sigeni! Yeeyi nsene asi eyi vana kugazara neyi vana kurugana nye yomovantu, ngayi zunguruka, 39nye nsene asi yomwaKarunga, kapi ngomu vhura kuyizungurura — nayene neisi hena mu moneka asi tomu kondjesa Karunga.”
40Sigongi makura tasi mu zuvhu. Vapositoli makura tava va zigida va hwilire, tava va silike asi nokuudisa si hena medina lyaJesus, makura tava va sigi va ze. 41Awo makura tava tundu po posigongi nehafo lyeyi asi Karunga kwa va tere asi va fira kuvahepekera edina lyaJesus. 42Awo kapi va ligumininine, nye nkenye ezuva ngava rongo oku tava udisa montembeli nokomambo Mbudi zoNgwa zaJesus, asi yige Kristusa.
© Egwanekerobibeli Lyanamibia 1987, 2003
© Bible Society of Namibia 1987, 2003