رسولون اَعمال 2
2
خدا مقدسه روح نزول، پِنتیکاستِ روزَ دَ
1وختی پِنتیکاستِه روز آرَسس، هَمَه ای دل، ای یقا جمع بییه بنده 2که ای دفه آسمانَ دَ صصی بومه که تِند باد صصه شارین به و اَ کییه ای که بِر نِشته بنده، هَمِش مَشت آکه. 3اُخُری، ای چی آتشه گُرَه شارین بوینتشونه که تقسیم آبه و هر کومین سر بنشت. 4چو پش همَّه خدا مقدس روحییم مشت ببنده و هه موقع که روح اجونش قدرت بِدا لاوشون بکه، علایده لفظییم لاوه کردنشون شروع بکه.
5اَ روزون، دین دارَ یهودیون، آسمونِ بِن، همهی مملکتونَ دَ، اومییه بنده اورشلیم. 6وختی اَم صص بومه، جماعتی که جمع بیه بنده، مات و مبهوت ببنده، چون هر کومین از اوه اَشنَوِسِشونَی که اَون، اِشتن ما لَفظییم لاوه کرنده. 7پس مات و مبهوت، بواتشون: «مگم امه که لاوه کرنده همَه جلیلی نینده؟ 8پس چه طرعه که اَما هر کومین اَشنَوُم که چما ما لَفظییم لاوه کرنده؟ 9پارتان و مادان و عیلامیان، بینالنهرین مردم و یهودییه و کاپادوکییه و پونتوس و آسیا 10و فْریجیه و پامفیلیه و مصر و لیبی اطراف که قیرَوان را اسنده و کسونی رومه دَ اومییه بنده 11چه یهودی و چه کسانی که یهودیه دینشون قبول کرده؛ و همَ نی کْرِت و عربستانه مردم - همَّه اَشنوُم که اَمه چما ما لفظییم خدا پِه قدرته کارونَ دَ لاوه کرنده.» 12پس همَّه همنه که مات و سرگردان بنده هندیگرَ کودَ آپرسِسشونَی: «اَم اتفاقه معنی چیه؟»
13امّا بَعضیَ نی ریشخندییَم واتشونَی: «اَمه تازه شراوییم مستِنده!»
پِطرُسه پیغام پنتیکاست روزَ دَ
14اُخُری پِطرُس اَ یازده رسولییم اوپاب ببه و اِشتن صصش بِلَند بکه، اَجونش بوات: «ای یهودیان و ای اورشلیمه مردم، اجِمه بفهما و اَ چی ای که وام دِقَتییم گوش بکرا! 15ام مَردکون، برعَکس اَ چی که شما فکر کرا، مست نینده، چون حلا ساعت نُه صبح اِسه! 16بلکم ام هَه چی ای اِسه که یوئیل پیغمبره درباره اَو همنه پیشگوییش کرده بِه:
17«”خدا وا: آخرین روزون
چِمن روح همهی مردمه سر ایکَرِم.
شما زاعه و شما کِلِگِ نبوّت کرنده،
شما جوونه رؤیاعونی ویننده
و شَما پیره خواوُنی ویننده.
18و اَ روزون،
حتی چِمن نوکرون و چِمن کنیزون سَرَ نی،
چِمن روحه ایکَرم
و اَوُن نبوّت کَرنده.
19سَرو، آسمونَ دَ، عجیب چیون،
و جیری، زمینه سرَ، معجزون کرم،
خون و آتش و بخارَ دَ.
20پیش از اَم که خداونده روز آرَسه، اَ پِرشکوه و پیله روز،
آوتاوِ تایریک بییه و ماه رنگَ نی
خونه رنگه شارین بی.
21اُخُری هر که خداونده نوم ونگ بکره، نجات پیدا کره.“
22«ای خدا قوم، اَجِمه بَشنَوا: همنه که شما اِشتن زونا، عیسای ناصری مردکی به، که خدا، معجزان و عجیب چییش و علامتونی که چو دسییم شما دِلَ ظاهِرِش بکه، شهادتش بدا که اَو، حق اِسه. 23هَه عیسی، خدا اراده و نقشه ییَم شما تسلیم ببه و شما شروره آدمون دسییم، اَوِرون صلیب سر مصلوب بکه و بکوشترونه. 24خدا اوِش مرگه عذابونَ دَ نجاتش بدا، اَوش زنده بکه، چون محال بِه که مرگ بتونه اجو اِشتن چنگَ دَ نیا بداره. 25همنه که داوود پاتشا عیسی درباره وا:
«” همیشه خداوندم چِمن چشمون پیش وینته،
چون اَو چِمن راسته دسه ورِ تا ملرزم.
26چمه خونین چمن دِل شاد و چمن زون خوشحالی کره،
چمن بدن امیدییم مونه.
27چون چِمن جان مردَعون دِنیا دَ ول نکری،
و نارزی اِشته انتخاب بییه، جان بپوسه.
28ته زیندگی راهون اَمِنِر یاد بدا،
و اِشته حضورییم، اَمِن شادیَ دَ مَشت کری.“
29«ای برارون، از تونم اطمینانییم شما بوام که چما جَد داوود بِمه و بخشاردشونه و چو مقبره نی تا هارویین روز چما وَر اِسه. 30امّا داوود پیغمبر بِه و زونِسَی که خدا چو را قسمش خرده که چو نسلَ دَ ای نفر چو سلطنت تخت سر نِشِونه. 31داوود آیندش پیش تر وینته، درباره مسیح زنده آبیین بواتشه که چو جان مردعون دِنیا دَ نِمونه و چو بدن نِپوسه. 32خدا هَم عیساش زنده آکه و اَما همَّه چو شاهدیوم. 33اَوشون ببه سَرو خدا راسَ طرف، و آسمانیه په کودَ، موعود مقدس روحش ایگَت و ایکَردِشه چما سر، اَمه که هننه وینا و اَشنَوا. 34داوود پاتشاه اِشتن نِشه آسمون، ولی هنی بواتشه که:
«”خداوند چِمن خداوندش بوات:
’ چمن راسته طرف بِنِش
35تا وختی که اِشته دِشمنون اِشته پا بِن دراینِم.“‘
36«پس خدا قوم، هَمَه یقینا بزوننده که ام عیسی که شما اَورون صلیب سر بکوشت، خدا اجو هم خداوند و هم مسیح موعودش کردشه.»
37وختی اَوُن اَم لاوِشون بَشنوس، جوری ببنده که انگار چون دل دَ خنجر شیاسه، پِطرُس و علایده رسولون بواتشونه: «ای برارون، چِه بکروم؟»
38پِطرُس اَجون بوات: «توبه بِکَراه و شما هر کومین، عیسی مسیح نومییم شما گناهان بخشِسَنِ را تعمیدَ غسل بیگیرا وشَما خدا مقدسَ روحِ بیگیرا. 39چون اَم وعده شما و شما خوردگون و همهی کسانی را اِسه که دورِنده، یعنی هر که که خداوندْ چما خدا اَجو ونگ بکره اشتن ور.»
40پِطرُس پِر علایده لاوَعونییم شهادتش بدا و اَجونش تشویق بکه، بوات: «اَم منحرفه نسله دس دَ اِشتن نجات بدیا!» 41پس اونی که پطرسه پیامشون قبول بکه، غسل تعمیدشون بگت. هَه روز دویروبر سه هزار نفر اجون اضافه ببنده.
ایمانداران زندگی
42اَوُن اِشتنشون وقف تعلیم گَتن رسولونَ دَ و علایده دین دارونییم مشارکت کردن و نان پاره کردن و دِعا بِکَردشونه. 43اَوه همَّه مات و مبهوت ببنده و پر عجیب چیون و معجزان رسولون دسییم انجام ببه. 44همهی دین دارِ هندیگرییَم بنده و همه چیه دَ شریک بِنده. 45اِشتن مال و منالشون خِروتَی و چو پولشون هر کسی احتیاج قَدَر، همن میون بِبَخشِسِشون. 46اَوُن هر روز، معبدَ دَ جمع آبَینده و اِشتن کییه عونَ دَ نی نانشون پاره کَردَی و دس و دل فرایی و خوشییم هندیگرییَم غذاشون خُردَی 47و خداشون ستایش کردَی. همهی مردم اجون احترام نایَی؛ و خداوند هر روز کسونی که نجات شون پیدا کردَی، چون جمع دلَ اضافِش کردَی.
اکنون انتخاب شده:
رسولون اَعمال 2: KTT
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company