Iironga 8
8
ONTOPORUA 8.
Eklesia tari epekua. Iironga ja Filippus omudiakoni.
1Mesiku ndika etidaguro enene rja tukuruka meklesia rjoku Jerusalem. Ndere ajeshe ja sharakanicua mu Judea no mu Samaria, aapostoli ike ja kara po.
2Stefanus okua fumbikua kaarumentu aajuki, jo taje mu riri eenkari duurongore.
3Saulus okua rurumine eklesia komuenjo gue, ta guajere mo meendjugo, ta kokorora mo aarumentu naakiintu, he te ke j’ediririca mondrongo.#8:3 Saulus okue tshi ninga keharo rjotshigongi tshaakuruntu jaajuda.
4Ndere mboka ja sharakana ngaano, oj’endagura, jo taa huvica evangelium rjeehapu da Karunga.
5Filippus okua hi kotshirongo Samaria, he e ja uvicire Kristus.#8:5 Filippus ngu ke shi omuapostoli, aaue, omudiakoni. Tara ontoporua 6:5.
6Eengundu daantu oja puakene ku di ja rombuerua ku Filippus, nde jo taje di panda, ja tara uo omadidiriko nga a ronga.
7Ojendji jomu jo oja ri neembepo da njata, di da za mo nombujo onene, aavu jombanda niirema ojindji oj’erudua.
8Omua ri enjanju enene motshirongo.
9Ndere omurumentu guedina Simon a ri no monare omupure motshirando shija, a pukica otshiguana tsha Samaria, a ti, he otshinima otshinene.
10Ajeshejeshe okua ja gama ku he, aanjasha naakuruntu ja ti: “Ohe eenkondo da Karunga di adi tiua enene”.
11Oshoka jo je mu iteera moru’uupure ue na shi kua e ja rurira erara ere tshiri.
12Ndere, sho j’iteera Filippus, ngu e j’uvicira evangelium rjuukuaniirua ua Karunga, aarumentu naakiintu oja tshatshua medina rja Jesus Kristus.
13Nena Simon muene oku’iteere, he t’itshatshica, ta kara pu Filippus. A kuatua keruriro enene, sho a mona iirongadidiriko niironga iinjengandunge.
14Aapostoli, mba ja ri ku Jerusalem, sho j’uvu aantu jomu Samaria ja tuumba eehapu da Karunga, oja tumu ku jo Petrus na Johannes.#8:14 Aapostoli Petrus na Johannes ja hire ku Samaria.
15Sho ja ciki ko, oje ja garikanene, ja peue Ombepo Ondjapuki.
16Ho inahi ja kurukira manka nande oku gumue. Okua ja tshatshua ike medina rja Muene Jesus Kristus.
17Oje ja tenteke omake gauo, nde jo taa tuumba Ombepo Ondjapuki.#8:17 Okutja oje ja tuumbica esakramente rjekoreko.
18Ndere Simon, sho a mona nokutja ja peua Ombepo Ondjapuki metenteko rjomake gaapostoli, okua a hara e ja pe iimariva.
19Okua ti: “Piindje uo eenkondo doka, opo keshe te tenteke omake gandje, a tuumbe Ombepo Ondjapuki.”
20Ndere Petrus ta ti ku he: “Iimariva johe naji ku farere mekano, oshoka ua diradira u rande omagano ga Karunga niimariva.#8:20 Omagano neenkondo eendjapuki da Karunga itadi vuru okurandua niimariva. Ngu a hara oku tshi ninga ngashi ompure ndjino Simon, ota ningi ondjo onene. Ondjo ndjika otahi rukua “Simonia,” oshoka Simon e hi ninga tango.
21Ngueje ku na otshitoporua nenge uuciga merongo ndi. Omutima guohe kagu nuujuki motshipara tsha Karunga.
22Ano nduno idirurura, u ece uumbudi mbu. Indira Karunga e ku diminepo omadiradiro gomuenjo guohe.
23Ondi ku uete u’uda onjango onduru, omapando guuhineji ge ku manga.”
24Simon okua jamukura a ti: “Garikaneniindje Muene, ngaje kandi adikue ku mbjoka mua popi.”
25Sho j’okorora nde j’uvica eehapu da Muene, oja tshuna ku Jerusalem, taa huvica evangelium meemkunda odindji da Samaria.
26Ongashi omujengeli gua Muene a rombuera Filippus ta ti: “Cikama, inda ruo kuutshimbantu, kondjira ndjijaka ha za ku Jerusalem, h’uka ku Gaza. Kamu naantu mondjira ndjika.”
27Ongashi a cikama he ta hi. Ndere, tara, omurumentu omuetiopia, erenga enene rja Kandake, omukuaniirua omukiintu guomu Etiopia, omurangeri gu’uujamba ue aushe, ohe a hire ku Jerusalem okugarikana.
28Nena okua garuka. Ta kaatumba metemba rje, a lesha eehapu domuprofeti Isaias.
29Ombepo#8:29 Omujengeli gua Karunga. oha rombuere Filippus: “Inda k’ende popepi netemba ndija.”
30Filippus okua matukire ko nde te mu uvu sho ta lesha eehapu domuprofeti Isaias ta ti: “Ou uviteko tuu doka to lesha?”
31Nguijaka ta jamukura: “Ote huvu ko ngiini, nge kapu na ngoka te di fatururirendje?” Oku’indire Filippus, a ronde metemba, he a kaatumbe posha he.
32Eshara ndjoka a lesha mobibeli orja ri ndi: “Ngashi onzi ndji tahi farua kotshidipagero, ngashi onzona hahi muene nge tahi kururua, na he ita ka ekama okana ke.#8:32 Omuprofeti Isaias ota popi huno Jesus. Ohe onzigona ha Karunga, e tu sira komutshigakano, a muena ciru.
33Moru’ehitshonopeko rje tari kucua epanguro rje.#8:33 Moru’omeepeko ga Jesus egeero rjaantu orja kucua po. Ore ta vuru okujarura oruvaro rue, oshoka omuenjo gue tagu kucua mevi ndika.”#8:33 Oruvaro rue okutja aaranduri ja Jesus Kristus, mba taa ningi ojendji moru’okusa kue okudigu.
34Nena erenga rja pungurukire ku Filippus tari ti: “Otii ku indire, rombuerandje, omuprofeti ota popi ngaano ano’re. Ot’ipopi he muene nenge gurue?”
35Ndere Filippus ot’ekama okana ke, ta shimbike eehapu dika domobibeli, he te mu uvicire evangelium rja Jesus.
36Nde sho j’ende ngaano mondjira hauo, oja mon’omeja. Nena erenga rja ti: “Tara ko, omeja ogo nga. Oto imbiua ko tshee ndi tsatshue?”
37Filippus okua ti: “Ngueje nge u’iteera nomuenjo agushe, atshi pitikua.” Nguijaka okua jamukura a ti: “Ond’iteera nokutja Jesus Kristus Omumua Karunga.”
38Ta cikameke etemba. Ajeshe jaari ja rondoroka, ja hi momeja, Filippus nerenga, nde he te mu tshatsha.
39Ndere, sho ja zi mo momeja, ombepo ha Muene oha kuca po Filippus, erenga inari mu mona ue. Opo mpoka rja toora erira nenjanju.
40Ndere Filippus ta monikua mu Atsot. T’endagura notshirongo, t’uvica evangelium miirando ajishe sigo okotshirando Kesarea.
Omission Heklesia Ekatolika, 1951. Namibian Catholic Bishops Conference.