Iironga 25
25
ONTOPORUA 25.
Paulus ta purua ku Festus
1Festus okue ja motshirongo tshe. Okuza mpo omasiku gatatu, a zi ku Kesarea ta hi ku Jerusalem.
2Nena aapristeri aakuruntu naanamadina jaajuda oj’engene ku he nehumaneko rjauo rjokuumaneka Paulus, nde je mu indire,
3e ja pe oshenda hokuiteera kutja ta farua ku Jerusalem. Oja ara oku mu rangera, je mu dipage mondjira.
4Festus okua jamukura nokutja Paulus ta kara a kuatua mu Kesarea, na he muene ota hi ko ngashingika.
5Ta ti: “Jamue jomokati keni naa je uo, jo je mu umaneke nge oku nondjo momurumentu ngu.”
6Sho a menekere pu jo omasiku uunutatu nenge omurongo ike, okua hi ku Kesarea. Mesiku rja nofu okua kaatumba kotshipundi tshetokoro nde t’etica Paulus.
7Ngija a farua ko, aajuda mba ja zire mu Jerusalem, oje mu kondeke, jo je mu pe eendjo eedigu do odindji. Ndere oja njengua oku di tompera,
8oshoka Paulus oku’ipopire a ti: “Ngaje inandi jona tsha no kompango haajuda no kotempeli, no komukuaniirua.#25:8 Okutja huno omukuaniirua guaaroma.
9Ndere Festus sho a hara okuipandica kaajuda, okua jamukura Paulus a ti: “Ngueje oua ara oku ha ku Jerusalem, oko ndi ke ku puakene?”
10Paulus okua ti: “Onda cikama potshipundi tshetokoro rjomukuaniirua, opo ndi nokupurua.#25:10 Paulus okua ara okupopja neehapu dika nokutja Festus onakuripeshara guomukuaniirua guaaroma, omupanguri gue. He ita vuru okuciminikua a pangurue kotshigongi tshaakuruntu jaajuda. Inandi ningira tsha aajuda ngashi ngueje muene u tshi tshi naua.
11Nge nda ningi uuhineji, nenge ndi nondjo hokusa, itandi tindi ndi se. Ndere nge taa humanekerendje ouara, nena kaku na ngoka ta vuru okugandjandje momake gauo. Onda ara okutokorua komukuaniirua.”
12Nena Festus sho a popi nomarenga ge, okua jamukura a ti: “Ngueje ua ara okutokorua komukuaniirua. Ano oto hi komukuaniirua.”
13Omasiku gamue sho ga piti, omukuaniirua Agrippa#25:13 Agrippa omumua Herodes ngu a dipagicire omuapostoli Jakobus. (12:1) na Berenike oje ja ku Kesarea, ja tarere po Festus.
14Sho ja menekere po omasiku ogendji, Festus oku’okororere omukuaniirua eehapu da Paulus a ti: “Mpaka opu nomurumentu omukuatua, a cigua po ku Feliks.
15Sho nda ri ku Jerusalem, aapristeri aakuruntu naakuruntu jaajuda oje ja kungaje morue, ja arerera epanguro rje.
16Onde ja jamukura: “Kagu shi omukaro guaaroma okupangura omuntu uusama manka ina tegamekua naahumaneki je, he ina mon’ecimbo rjokuipopira nokuiceta komajonaguro.
17Ano, sho je ja huka, ngaje inandi arura okukaatumba kotshipundi tshetokoro mesiku rja nofu, ongashi nd’etica omurumentu nguka.
18Nena aahumaneki je, mba je mu cikamene, inaje mu umanekera iinima mbi nda tengeneka uuhineji.
19Aaue, oja ri ouara nomarudi gamue gomarongo gauo na nakusa Jesus, ngu Paulus a tire, oku nomuenjo.
20Ngaje shi nda rimbirirua moru’etokoro rjiinima ja tja ngaaka, onde mu pura, nge a hara oku ha ku Jerusalem, oko a ka purirue iinima mbika.
21Ndere Paulus, sho a hicana omukuaniirua e mu tokore, ngaje onda gandja ohapu a kare manka a kuatua, sigo andi mu tumu komukuaniirua”
22Agrippa okua rombuera Festus: “Nangaje uo onda ara okuuva omuntu ngu.” He ta ti: “Ngura oto ke mu uva.”
23Esiku rja nofu, Agrippa na Berenike, sho je ja mehoparo rjuurenga oundji monguru hetokoro puamue naakuruntu jaakuiita naarumentu aanamadina jotshirando, Festus oku’icana uo Paulus.
24Nena nduno Festus okua ti: “Mukuaniirua Agrippa, naarumentu ne amushe mu ri puamue nasse, tareni omurumentu ngu a gongarica ongundu ahishe haajuda, he ja kungaje mu Jerusalem, jo j’indira j’igida muure, ka kare ue nomuenjo.
25Ndere ngaje nda dimburura nokutja ke nondjo hokusa. Ndere he muene, sho a harere okutokorua komukuaniirua, ngaje nda ara oku mu tuma ko.
26Kandi tshiuo shoka andi tshangere Muene guandje.#25:26 Okutja omukuaniirua guaaroma. Otsho nde mu etera mpaka miipaci jeni, ndere unene okotshipara tshohe, mukuaniirua Agrippa, opo ndi mone ondjira hoku mu tshangera tsha, nge tue mu puakene.
27Oshoka otsha f’uurai nge atu tumu omuntu a mangua, sse inatu tshanga uo, sho t’umanekerua.
Omission Heklesia Ekatolika, 1951. Namibian Catholic Bishops Conference.