BurhSira 2
2
Okurhînya Nyamuzinda omu malibuko
1Mwâna wâmi, okacîhambira okukolera Nyamuzinda, ocîrheganye n’oku malibuko. 2Bà n’omurhima gushingânîne, obè na ntwâli, orhazigaga bakuhabula amango g’amalibuko. 3Omusêremwo, orhamujâga kuli, ly’okuzibwa omu lusiku luzinda. 4Ngasi ebi akurhumire, obiyankirire, omu buzamba bwâwe, okazibirembera, 5bulya amasholo muliro bagarhangulamwo, n’abashinganyanya omu cibêye c’obwîrhôhye barhangulirwa. 6Langâlira Nyamuzinda, akurhabâla, jà n’obulangâlire omu njira ekubûsire. 7Mwe murhînya Nyamuzinda, mulangâlire obwonjo bwâge, murharhengaga omu njira yâge lyo mulekihirima. 8Mwe murhînya Nyamuzinda mumulangâlire n’oluhembo lwinyu lurharhêreke. 9Mwe murhînya Nyamuzinda, mulangâlire aminjà gâge, mulangâlire obusîme bw’ensiku n’amango n’obwonjo bwâge. 10Mulole amâburhwa ga mîra, mubone: Ndi mwayumvîrhe olangâlîre Nyamuzinda agalibulabula? Erhi ndi mwayumvîrhe amusêzirekwo, Nyamuzinda agalimurhiba? Erhi ndi wamulakire, abula kumuyumva? 11Nyamuzinda arhahimwa lukogo, abâ wa bwonjo, anakûle ebyâha, acize n’amango g’amalibuko. 12Buhanya bw’ab’emirhima myôba, n’ab’amaboko gahozire, buhanya bw’omunya-byâha w’olugendo lw’okurhebana. 13Buhanya bw’omuntu w’omurhima mwôlo n’orhajira buyêmêre, bulyâla arhakabona câfungira. 14Buhanya bwinyu mwe mwarhibire omurhima, kurhi mwajira amango Nyamuzinda ayishimmurhangula? 15Abarhînya Nyamuzinda barhavuna omu kanwa kâge, njira yâge abamuzigira bakulikira. 16Abarhînya Nyamuzinda balonza okumusîmîsa, amarhegeko#2, 16 Amarhegeko: omuntu ozigira Nyamuzinda arharhama acîdôsa mpu kàshimba irhegeko lirebe erhi nanga, bulya okuzigira Nyamuzinda n’okumuyumva byo biguma. gâge lubà lûma lw’abamuzigira. 17Abarhînya Nyamuzinda, omurhima gwâbo yêne guyôrha gulinga, banayîsh’icîrhohya omu masù gâge. 18Rhuyâkire omu maboko ga Nyamuzinda, ahâli h’okucîkweba omu g’abantu, oku obukulu bwâge buli kwo n’obwonjo bwâge buli.
Mashi Bible © BUKAVU Archdiocese of Bukavu, 2024.