Migani 20
20
Omwenge anayâke endalwè, obukali n’obwôlo
1Idivayi liyishi oku lishekera omulume, n’amamvu galuza akadugundu; ocîrhegago ntà burhimanya agwêrhe.
2Okukaliha kwa mwâmi, kwo kuyôrha nka mululumo gwa ngoromora; omujira burhè anacîzûkize nyammanjà.
3Buli bulume okuyogôlo embaka, muhwinja ocihîra muli zo.
4Omwôlo arhahinga nk’abandi bâhinga, nka bakola basârûla ye murhanzi, ci lêrhaga!
5Ihano omu murhima gw’omuntu, kwo liri nka mugemero mulîri, mwo omwenge âgendidômera. Ntà mwinjà obûla ishêmbo
6Bantu banji bacîderha binjà, ci omwikubagirwa ndi wankamubona?
7Omushinganyanya, ilabarha lyâge, lya mudahemuka; abâna asiga, abasiga bany’iragi.
8Mwâmi otamîre aha kagombe mmanja àtwa, ajira amasù gayêrûla ngasi hibî.
9Ndi wankaderha, erhi: «omurhima gwâni gucîre, ntayimbwâkwo câha»? 10Obuzirho oku bwâbo, omulengo oku gundi, bibirhi Nyakasane arhakwirirwa ebyo.
11Amashârha gw’omwâna murhò, ganayêrekane erhi ebijiro byâge byâyishibà bya bucêse n’obushinganyanya. Birharhenga aharhali kanwa kinjà
12Okurhwiri kuyumva, n’isù libona, byombi Nyakasane wabijiraga.
13Omanye orharhonyagya îrò wankanakena, ozibûke waluza ebiryo orhaluse.
14«Birhali byo, birhali byo», gwârhi owâgula, kurhânahangè arhaja acîshinga.
15Banasîme amasholo n’omwandu gw’amagerha, ci kwône ntâco cikwanana omuntu nka kanwa kamanyire emyanzi.
Bwîrhonzi bulwa amatumu
16Omunyâge ecirondo bulyâla acîhânyire ncungura oku w’ihanga, na kuli oyu orhamanyiri omuhûnekwoye ecikinja.
17Omugati gw’obushuma guyishi oku gununira omuntu, erhi gucîbûmba akanwa gushube mushênyi!
18Omuhigo mahano ga bandi gaguzibuhya, n’amatumu bwîrhonzi bugalwa.
19Ow’akalimi anabase amahwe, orhahîra okakômera oderha bwenêne. 20Oderha îshe na nnina buligo, ânazimirwe n’akamole omu ndunduli y’omwizimya.
21Obugale burhangira duba n’okukula duba, bunazinde erhi burhacibona mugisho.
Okucîkubagira Nyamuzinda
22Orhaderhaga, erhi: «nacîhôla», ocîkubagire Nyakasane yêne âkulîkûza.
23Nyakasane ashomba obuzirho oku bundi, omunzâni bagolongohize gurhahimwa kubîha.
24Nyakasane yêne olangûla amagulu gw’omuntu enjira, kurhi omuntu ankacîderheraga mpu amanya bwinjà enjira alimwo?
25Guli murhego oku muntu okuhamagaza erhi: «eyi eri nterekêro!» n’enyuma ly’eciragâne acîganye. Omûka kamole kamoleka omurhima
26Omwâmi murhimanya kuyêrûla ayêrûla enkolamaligo, abulibarhogeza-kwo amaligo gâbo.
27Omûka gw’omuntu kabà kamole ka Nyakasane, kamoleka omuntu yêshi kuhika oku nyômvu y’omurhima.
28Obukenge n’obudahemukira mwâmi bo balanzi bamulanga; obukenge byo bikondo by’entebe yâge.
29Buzibu basimira abâna b’emisole, n’abashosi mvi bakengerwa.
30Ebibande byajababa mukò bwo bufumu buhasha obumînya, empîmbo aha nsholo y’omurhima zihika.
Mashi Bible © BUKAVU Archdiocese of Bukavu, 2024.