Titus 3
3
Maatǝm Jʊ Nɨ A Bʊmɨ
1Bɛ ń bʊʊla nǝbam mʊnɔ gǝm ya ja nǝ nǝb maatǝm borangɔ jǝbɔ nǝb fɔlɔnɔ dʊʊn nɛ. Ya ja bwangtǝn kɛl jinɔ lɛ. Ja yɨ nǝn fɛkalɨ maatǝm maajɨ nyan. 2Ka ja yʊʊla lɛ kaa nǝl. Ka ja maa lɛ kʊkkan. Bɛ ja yǝlam nǝb shigtǝm dul. Ja yǝlam nǝb maatǝm jǝ nyan a daa nǝbɔ woi gwam.
3Bǝn tǝbǝn galɨgǝn bǝ swɛla swɛlaɨ. Bǝ bwangtǝn bɔ Kwaama. Ja swag bǝn. Bǝ yǝlam jwaalɛb maatǝm wɛl bwɨla jǝbɔ nyʊwatǝm lǝma nɨ mɨ dǝngdǝngɨ. Bǝ yǝlam nǝb shil. Bǝ yǝlam nǝb kiim. Bǝ yǝlam jǝ kɔtǝm, bǝn tǝbǝn bǝ kɔ kaam nǝbɔ lɛ.
4Kwama nɨ Kwaama Nǝbʊʊlɨ bǝnɔ a nʊng lǝma gǝnɔ jǝbɔ swɨtǝm gǝnɔ a daa nǝfili woi, 5nǝngɔ a bʊʊ nǝn bǝnɨ. Ke bɔ kaa maajɨ dǝngdǝng a wʊnɨ bǝ maaɨ. Mɨ nyɔ. A ji bʊnǝn bǝn. A bʊʊ nǝn bǝn a gola nǝtǝm Yʊwa Kwaamaɨ, wʊnɨ a saalǝm bǝn a fʌto bǝn bǝ yǝlam bʌtʌm fɨɨ. 6Kwaama a tal bǝm Yʊwa gǝnɔ a lada nyɔ a gola Yesu Kiristii, Nǝbʊʊlɨ bǝnɔ. 7A maa nyɔ sǝ a jǝg bǝn nǝn lǝma gǝnɔ sǝ bǝ yǝlam nǝb jatǝm kʊla, nǝb yatǝm nǝl a kʊlɨ nɨ mɨ dɨtǝm woi. 8Kɛl nɨ n bɨlǝngǝn. Mǝ swɨ lɛ ń tɨ kwaan kanjǝl nɨ dangǝn, sǝ nǝb nɨ a nǝ bɨlǝngkɛl a daa Kwaama woi ja nǝ dul jinɔ a maatǝm maajɨ nyantɨn. Kanjǝl nɨ na a nyan. Nǝn gɔ kanjǝl tɨkalɨ a daagɔ nǝbɔ woi.
9Bɛ ń tɨ a kʊta jǝbɔ katɨ nɨ mɨ nǝn duli, jǝbɔ gʊbkatǝm a kɛl kiyotǝm tʊgam, jǝbɔ kʊkkan, jǝbɔ kɨlan a kɛl dul diil. Gwam jʊtǝb nɨ mɨ ji nǝn kaa bwili wo, n maajɨ nǝn kwan. 10Nʊ nɨ dǝg wʊlakatǝm lɛɨ, na a kɔ gʊtǝm lɔl naa win jǝbɔ naa yoi, bɛ ń jelʌm a gola gǝnɔ gǝm. 11Bɛ ń nyǝm a kwɛl a lɛla lɛlaɨ, nǝ maatǝm bwɨlangkɛl. Gǝ nǝn dul gǝn a mwatɨ borang dul gǝnɔ.
Yaltǝm Jǝbɔ Gʊtǝm Lɔl
12Na mǝ twam bɔ Artimasɨ, mǝ twam twam Tikikus a daa mɔ woi. Na a bɛɨ, ka ń ta lɛ bʊtɔ, bɛ ń bɛ dǝbǝr dǝbǝr a daa mɨ woi a Nikafolis. N do a nǝl mɨ n ja shenagɔ wo. 13Bɛ ń sʊ kwaan tɨkalɨ Zinasɨ, nǝ nyǝmtǝm diilɔ, jǝbɔ Afolos, ja ta gola. Ka ń jǝla lɛ ja lɛ kaa jǝl. 14Bɛ nǝbam bǝnɔ a mɛla kwaan maatǝm maajɨ nya a tɨkalɨ komtǝm nǝbɨɨ, kage ja yɨ bwɨlang yɨm nǝn kwan.
Dǝgtǝm Bwili
15Gwam nǝb nɨ jǝbɔ mǝɨ, jǝ yal ń nɛ. Bɛ ń yal mɨ nǝb swɨtǝm bǝnɔ, nǝb nǝtǝm bɨlǝngkɛlɔ. Bɛ lǝmagɔ a yɨ a daa jen woi gwam.
اکنون انتخاب شده:
Titus 3: DBD
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©️2024 Luke Initiative for Scripture Translation