Roma 7
7
Nʊngtǝm Kɛl A Dul Naakan
1Kambɔ, jǝ́ nyǝm bɔ diilɔ nǝn kwaan a dul nǝlɨ na nǝngǝn nǝn kʊlɨɨ ka? Mǝ sʊwa kɛlɔ a dul nǝb nɨ a nyǝm diili. 2Nʊngtǝm kɛl nɨ a nʊng gɔ nɔɔlɨ nɨ nǝn naakanɨ, diilɔ a bwa gǝn bwaɨ a bwɨla gɔ gǝm kwama bwɨla gǝ nǝn kʊlɨɨ. Na bwɨla gɔ a bʊlaɨ, ga jelʌm a diil naakanɔ gǝm. 3Na bwɨla gɔ wo nǝn kʊlɨɨ, na ga naa kaa nǝlɨ, ga maa bulon. Na bwɨla gɔ a bʊlaɨ, ga jelʌm a diil naakan. Na ga naa kaa balɨ, gǝ ke bɔ nǝ bulon.
4A na nyɔ kɛtǝlam mɨ, jǝ́ bʊla a diilɔ gǝm a gola bʊtɔ Kiristii, jʊ a bwɨɨ sǝ jǝ́ yǝlam a kaa nǝlɨ, wʊnɨ ja gung gǝn a bwaaɨ, sǝ jǝ́ maa maajɨ nya a kǝga Kwaamaɨ. 5Nǝn galɨgǝn bǝ bwangtǝn bʊtɔ lɛɨ, wɛl bwɨlanɔ a gun a gola diil, n jʊ maa maajɨ lɛ a bʊtɔ bǝnɨ, n jʊ gʊ bǝm bwaa lɛɨ. 6N wɔ kǝngkɔ bǝ nya yɨm dul. Bǝ bʊla bʊlaɨ a diil nɨ galɨgǝn a bwa bǝnɨ. A kǝngkɔ bǝ dwal bǝ maa maajɨ Kwaamaɨ lɛ nǝn yɨm fɨ a gola Yʊwa Kwaamaɨ. Ke bɔ a mʊgɔ mʊlalɨ diiltɨn galɨ.
Diilɔ Jǝbɔ Bwɨlangkɛlɔ
7N wɛ tag bǝ sʊwa lɛɨ? Diilɔ n bwɨlangkɛl ka? Ɔ ɔ, mɨ nyɔ! Na ke bɔ diili, mɨsɔ mǝ nyǝm bwɨlangkɛl lɛ. Na ke bɔ diil a sʊwa gɔ “Bɛ ka ń kona lɛ nu a jǝ nǝlɨ,” na mɨsɔ mǝ nyǝm jʊ nɨ lɛ jǝ jo lɛ gɔ konatǝm nui. 8Nǝn kwama bwɨlangkɛlɔ a nya gola dɔtǝm a daa mǝ woi a gola diili, nǝngɔ a mʊrka konatǝm nu nǝn dʌmʌn a mʊgɔ nǝl mɨɨ. Na ke bɔ diili, na bwɨlangkɛlɔ mɨ nǝn kaa kwaan wo. 9Galɨgǝn mǝ nyǝm bɔ diili, mǝ nǝn kʊlɨ. Kwama mǝ nyǝm diili, nǝngɔ bwɨlangkɛlɔ a fuloi, nǝngɔ mǝ bʊlaɨ. 10Diil nɨ na bɛ lɛ nǝn kʊlɨ a daa mǝ woi, nǝn gɔ a gʊ mɨ bwaaɨ. 11Jʊ a bwɨɨ bwɨlangkɛlɔ a nya dɔtǝm a gola diil, nǝn gɔ a swag ɨɨ, n gola gɔ a jʌ ii. 12Gǝ na nyɔ diiltɨnɔ gwam n sagsag. Diilɔ tǝgǝn n sagsag, n dǝngdǝng, a bʊm.
13Jʊ nɨ n jǝ nyaɨ, nǝn gɔ a bɛ mɨ nǝn bwaaɨ ka? Ɔ ɔ, mɨ nyɔ! N bwɨlangkɛl a bɛ mɨ nǝn bwaa a gola diil nyaɨ, sǝ a nʊng dul gǝnɔ gɔ gǝ bwɨlangkɛl. A gola diil nɨ tagɨ, bwɨlangkɛlɔ a nʊng bwɨlatǝm gǝnɔ dangǝn.
14Bǝ kwɛl bǝ nyǝm diilɔ na a yʊwa. Mɨ mǝ nǝn yʊwa. Ja miyo i na jwaalɛ a kang bwɨlangkɛlɨ. 15Mǝ nyǝm bɔ jʊ a bwɨ mǝ maa jʊ nɨ nyɨɨ. Jʊ mǝ swɨ lɛ n maaɨ, n ke bɔ jʊ mǝ maa lɛɨ. Jʊ mǝ kɔɨ, n jʊ mǝ maa lɛɨ. 16Na n maa jʊ mǝ swɨ bɔ n maaɨ, n jǝla nyɔ diilɔ n jǝ nya. 17N ke bɔ mǝ mǝ maa jʊ nɨ lɛ mǝ maa lɛɨ, n bwɨlangkɛl nɨ yǝm a mʊgɔ bʊtɔ mɨɨ. 18N nyǝm mɨ jǝ nyan wo a mǝ gǝm, a bʊtɔ mɨ. Mǝ swɨ lɛ n maa jʊ nɨ a bʊm bʊmɨ sul, mǝ dwal bɔ n maa. 19Jǝ nyan nɨ mǝ swɨ lɛ n maaɨ, n ke bɔ jʊ mǝ maa lɛɨ. Jǝ bwɨla nɨ mǝ swɨ bɔ n maaɨ, nǝn gɔ jʊ mǝ maa lɛɨ.
20Na n maa jʊ ke bɔ jʊ mǝ swɨ lɛ n maaɨ, ke bɔ mǝ mǝ maa lɛɨ, n bwɨlangkɛl nɨ yǝm a bʊtɔ mɨɨ.
21N kuwo, a yǝlam mɨ diil, na n swɨ maatǝm jǝ nyaɨ, jǝ bwɨlagɔ yǝm jǝbɔ mǝ. 22Mǝ a mʊgɔ nǝl mɨɨ, nǝl mɨɨ a fulo nǝn diil Kwaamaɨ. 23N kuwo kaa diil maa maajɨ lɛ a jinʌn bʊtɔ mɨ, wʊnɨ ta kun nɛ jǝbɔ diil nɨ a bʊʊlalɨ mɨɨ, a dǝg ɨ a lɔsomii, diil bwɨlangkɛlɔ, wʊnɨ yǝm a jinʌn mɨɨ. 24N mwɛ mɨ! N yǝlam jǝ bʊnatǝm! Nuwo jǝg ɨ lɛ a mʊgɔ bʊtɔ nɨ, wʊnɨ yɔ lɛ nǝn mǝ a bwaaɨ? 25Buutǝm kangɔ na a Kwaamaɨ a gola Yesu Kiristii, Tɛlalɔ bǝn!
Mǝ nǝn dul mɨ, a bʊʊlalɨ mɨ n jwaalɛn mǝ maa lɛ a diil Kwaamaɨ.
A bʊtɔ mɨ n jwaalɛn mǝ maa lɛ a diil bwɨlangkɛlɨ.
اکنون انتخاب شده:
Roma 7: DBD
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©️2024 Luke Initiative for Scripture Translation