ROMA 9
9
I Yesu pai waʼa ntau anu ndapilisi
9:1-18
1Pura-pura waʼa mpau anu roo kutoʼoka komi seʼi monco kojo, maka yaku seʼi i Kerisitu tumpunya. Yaku bareʼe mombamba. Nawa-nawa ndayaku naponinika Inosa mPue Ala, inceʼe anu mampakanoto ri rayaku waʼa anu kutoʼo seʼi monco. 2Masusa rayaku pai maʼai kapari ndayaku, 3maka waʼa ngkasangkompoku anu sambaʼa banca pai yaku. Ua da tila ntau seʼe, kupepombaika koroku ndatadeasi mPue Ala pai ndagaʼati pai i Kerisitu. 4#Pa. 9:4 Tau seʼe inceʼemo banca anu ndapilisi pai tau anu ndapapewali mPue Ala ana-A, ndapatongawa kuasa ri tau seʼe. Ndapareʼe pojanji pai tau seʼe, ndawaika tau seʼe waʼa mpadika agama. Ndatotoraka i mPue Ala ewambeʼi ada mpanyomba pai natarima ntau seʼe waʼa janji-A. 5Tau seʼe napomulika waʼa ntau piamota; malulu katolino i Kerisitu mebete ungka ri tau seʼe. I Kerisitu ri wawo pura-puranya setu. Taundemo i Pue Ala rantani masae-sae! Ami!
6Bareʼe kutinako ndaya da mantoʼo waʼa janji mPue Ala bareʼemo da kobangani; paikanya banyamo pura-pura to Isaraeli da mewali tau anu ndapilisi i mPue Ala. 7#Pal. 21:12 Bareʼe pura-pura muli i Burahima da mewali ana i mPue Ala, maka ndatoʼo i mPue Ala ri Burahima, “Podo anu napomulika i Saki anu ndatoʼo mulimu.” 8Inceʼe posokinya muli i Burahima anu mewali ana mPue Ala, inceʼemo mulinya anu ndapoana malulu janji i mPue Ala; mewali banya pura-pura mulinya. 9#Pal. 18:10 Maka ewaseʼi janji i mPue Ala, “Ri tempo anu roo kupakanoto, Yaku da rata muni pai ri tempo setu i Sara da mampoana sambaʼa ana tuama.”
10Pai seʼi woʼu: I Ribeka da mampoana ana tuama radua, papanya inceʼemo i Saki siramo tau piamota. 11Ri kabareʼepanya ndapoana ana radua setu, lawi roomo ndapilisi mPue Ala. Pampilisi mPue Ala bareʼe malulu pepokono ntolino paikanya malulu pompeboo i mPue Ala ngkalio-A. Inceʼe mewali ri kabareʼepanya ana i Ribeka setu maincani mowia dago bara jaʼa. 12#Pal. 25:23 Ndapatongawa i mPue Ala ri Ribeka, “Anu tukaka inceʼe da mamporiokoi anu tuaʼi.” 13#Mal. 1:2-3 Lau ndaʼuki ri Sura Magali, ndatoʼo i mPue Ala ewaseʼi, “I Yako anu Kupotowe, pai i Esau Kupobanciika.”
14Nunjaamo anu da tatoʼo? Ara bareʼe mayoa i Pue Ala? Manoto kojo kayoa i mPue Ala! 15#Pa. 33:19 Maka ndatoʼo i mPue Ala ri Musa, “Yaku da mantuju kapuru ndaya-Ku ri tau anu kupokono da mantujuka, pai da kutujuka katowe ndaya ri tau anu Kupokono da mantujuka.” 16Mewali pepokono i mPue Ala, bareʼe malulu tangara ndaya ntolino pai pepokono ntolino, paikanya malulu kabuya ndaya mPue Ala ri tau anu ndapokono mampilisi. 17#Pa. 9:16 Maka lau ndaʼuki ri Sura Magali ndatoʼo, “mPue Ala ri datu nto Masiri, ‘Siko kupapewali datu ua tinako ndayaku anu sambaʼa seʼi, inceʼemo da naka ri siko da kupantuju kuasa-Ku pai da naka tebambari toʼo-Ku ri sambawo lino.’ ” 18Mewali, i Pue Ala mantuju kapuru ndaya-A ri sambaʼa tau anu ndatunggai ndaya ewanceʼe. Pai i Pue Ala mampakapeni raya ntau sambaʼa, ane ndatinako ndaya mPue Ala da ewanceʼe.
Karau pai kabuya ndaya i mPue Ala
9:19-29
19Sangaya-ngaya da nditoʼoka yaku, “Ane ewanceʼe wenu painaka i Pue Ala ntongo da mampetisala tolino? Ara banya bereʼe tau anu mangkoto maompo tangara ndaya mPue Ala?” 20#Yes. 29:16, 45:9 Ee waʼa ngkasangkompo! Siko podo tolino, anu bereʼe kuasamu da maewa i Pue Ala! Ara da mewali kura da mantoʼoka tapomoncu ara wenu painaka nupomoncu yaku ewanceʼi? 21Ara banya topomoncu makuasa da mampomoncu kura malulu pepokono ndayanya? Topomoncu malemo tana mapuyu saogu napowia radua ogu kura, sambaʼa napakalese sambaʼa napowia jaʼa-jaʼa.
22Ewanceʼe seʼe woʼu anu ndapowia mPue Ala. Sira mantangara ndaya mampatongawa karau ndaya-A pai mantuju kuasa-A. Paikanya Sira mayombu pai malulu raya ri waʼa ntau anu mangkelo-ngkelo karau ndaya-A. 23I Pue Ala woʼu mantangara ndaya mantuju ri kita kalindo ndaya anu gana-gana anu ndapepombaika ri kita anu ndapotowe. Kita lawi ndapatokamo da mantarima kalindo ndaya setu. 24Kitamo anu roo ndapeboo, banya podo to Yahudi, paikanya ungka ri banca ntaninya woʼu. 25#Hos. 2:23 Maka ri sura i Nabi Hosea ndatoʼo i mPue Ala,
“Waʼa ntau anu banya tau-Ku,
da ndatoʼomo ‘Tau-Ku’.
Lemba anu bareʼe kupotowe,
da ndatoʼomo ‘Anu kupotowe’.
26 #
Hos. 1:10
Pai ri kareʼe ntau anu ndatoʼo, ‘Komi banya tau-Ku,’
njairia waʼa ntau da ndatoʼo waʼa ana mPue Ala anu tuwu.”
27 #
Yes. 10:22-23
I Nabi Yesaya mantoʼo ri kayonto-yontonya kono banca nto Isaraeli, “Mau imba nto Isaraeli ewa kasondo bone ri wiwi ntasi, paikanya podo santila kodi anu da tesorepaka, 28maka bareʼemo masae i Pue Ala da mahukumo sambawo lino seʼi.” 29#Yes. 1:9 Natoʼo woʼu i Nabi Yesaya, “Ane rapanya i Pue Ala anu Makuasa bareʼe mayombu raya ri kita, manoto kita pura-pura da mewalimo ewa Sodomo pai Gomora.”
Pokenta nto Isaraeli pai Nuntu ngKatuwu
9:30–10:4
30Mewali kamonconya ewaseʼi: Waʼa lemba ntaninya anu banya to Yahudi, tau seʼe bareʼe mampari-mpari da naka madago muni pokenta ntau seʼe pai Pue Ala. Paikanya ua peaya ndaya ntau seʼe painaka ndapapokenta muni i mPue Ala tau seʼe pai Sira. 31Paikanya waʼa nto Yahudi anu mompari-mpari malulu waʼa mpadika naka dago muni pokentanya pai Pue Ala. Paikanya bareʼe nakoto ntau seʼe. 32Ara wenu painaka bareʼe naleʼo ntau seʼe? Maka incetu nawaika ntau seʼe banya ua peaya ndaya ri Pue Ala, paikanya ua pangkoto ntau seʼe ngkalionya. Painaka terompo tau seʼe tosube ri, “Watu Ngkatosube”. 33#Yes. 28:16 Kono watu setu ndaʼuki ri Sura Magali ewaseʼi,
“Peole mpodago, ri Sioni lau kudika sambaʼa watu,
inceʼemo watu ngkatosube ntau.
Sambaʼa watu bangke anu da mampakanawu tau.
Paikanya tau anu meaya ri Sira bareʼe da teloo rayanya.”
اکنون انتخاب شده:
ROMA 9: LAIPMF
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید