ROMA 3
3
1Ane ewanceʼe, nunjaa porasinya mewali to Yahudi? Pai nunjaamo yowenya malulu ada mpopasuna? 2Inceʼe manoto maria yowenya! Kaʼisa-isanya maka ri to Yahudi ndapampesarumakaka i mPue Ala waʼa nuntu mPue Ala. 3Paikanya ewambeʼimo ane santila to Yahudi bareʼe todo? Ara inceʼemo puʼunya da mabalisaka katodo mPue Ala? 4#Pol. 51:4 Inceʼe manoto bareʼe kojo! Maka tongawa kojo kabareʼenya bali kamonco i mPue Ala, mau waʼa ntau kambamba-mbamba. Lau ndaʼuki ri Sura Magali,
“Mbolimo siko da tongawa kamoncomu ri waʼa mpau anu nupasowa,
pai siko da ndapakayoa ri tempo mpobotusi.”
5Paikanya da maʼai ngkatongawamo kamonco i mPue Ala ua powia anu majaʼa, nunjaamo anu da tatoʼo? Ara modenggo i Pue Ala ua mangahuku kita? (Lawi pompeoasi seʼi ane malulu katolinota sintempo.) 6Manoto bareʼe! Maka ane i Pue Ala bareʼe monco, ewambeʼi da ndapampakanoto botusi lino seʼi?
7Paikanya ane powia anu modenggo mampatongawa kayoa i mPue Ala pai ndapaunde Sira, makuja painaka tau anu mowia jaʼa setu ntongo ndapetisala ewa tau masalaa? 8Wenu painaka bareʼe maya da tatoʼo, “Aginya kita mampowia jaʼa da naka molanto anu madago?” Lawi reʼe waʼa ntau anu mampetikodi yaku anu mantoʼo kayakunya anu mantoʼo ewanceʼe. Waʼa ntau anu ewanceʼe sintinaja da ndahuku i mPue Ala.
Bereʼe tau anu mangkoto mawianaka pepokono i mPue Ala
3:9-20
9Mewali nunjaamo peruuta ua kakitanya to Yahudi ungka ri banca ntaninya? Manoto bereʼe! Roomo kupesindiuka mantoʼo, madago to Yahudi bara banca ntaninya, pura-pura nakuasaimo ncalaa. 10#Pol. 14:1-3, 53:1-3 Ewa anu teʼuki ri Sura Magali,
“Bereʼe tau anu mayoa, sako sambaʼa.
11Bereʼe sako sambaʼa tau anu marata ndaya,
pai bereʼe sako sambaʼa tau anu manyomba ri Pue Ala.
12Tau pura-pura mantilawangimo i Pue Ala;
pura-pura lingumo.
Bemoreʼe tau anu monco powianya; bemoreʼe sako sambaʼa!
13 #
Pol. 5:10, 140:4 Wuroko ntau seʼe ewa dayo anu teloka-loka,
waʼa mbamba moili ungka jila ntau seʼe,
pai wiwi ntau seʼe mampesuparika nuntuki ewa impo ule.
14 #
Pol. 10:7
Nguju ntau seʼe buke petusaki pai pepara-para.
15 #
Yes. 59:7-8
Magalaga pelinja ntau seʼe ane da majeani pai da mampepate tau.
16Kagero pai kapari da napesawuka ntau seʼe ri mbeʼi-mbeʼi.
17Bareʼemo nakita ntau seʼe jaya ngkarodo ndaya,
18 #
Pol. 36:2
pai bareʼe natubunaka i Pue Ala.”
19Seʼi-seʼi taincanimo pura-pura anu ndaʼuki ri waʼa mpadika agama Yahudi, inceʼe tila ntau anu tuwu ri ara ncongka waʼa mpadika setu. Ane ewanceʼe bemoreʼe tau anu mancapu da pahuku i mPue Ala lino seʼi. 20#Pol. 143:2, Gal. 2:16 Maka bereʼe tau anu mangkoto da simadago pai i Pue Ala ua pangkotonya mawianaka nunjaa anu lau ri waʼa mpadika agama. Kamonconya, waʼa mpadika setu mantujuka tolino tau seʼe masalaa.
Ewambeʼi i Pue Ala mampareʼe jaya ngkasimadago ntolino pai i Pue Ala
3:21-31
21Paikanya seʼi-seʼi reʼemo jaya ungka ri Pue Ala, jaya ngkasimadago ntolino pai Sira; jaya anu bareʼemo mokenta pai waʼa mpadika agama nto Yahudi. Anu nasabi ncura i Musa pai sura waʼa nabi anu mampatongawamo pura-pura setu, 22#Gal. 2:16 kaʼi Pue Alanya mawaimo jaya ri tolino da simadago pai Sira, podo ane tolino meaya ri Yesu Kerisitu. Inceʼi ndapowia mPue Ala tila ntau pura-pura anu meaya ri Yesu Kerisitu; maka bereʼe posisalanya. 23Maka pura-pura tau masalaa pai lawamo ungka ri Pue Ala anu da mancorepaka tau seʼe. 24Mewali, podo ua kapuru ndaya i mPue Ala anu mampepombaika ngkabongo, painaka mokenta muni i Pue Ala pai tolino; jaya setu inceʼemo tolino da ndasorepaka ua i Yesu Kerisitu. 25I Pue Ala mampepombaika i Yesu Kerisitu da naka ua kapate-A setu tolino telapamo ungka ri huku ngkasalaa ane mepoʼinaya tau seʼe ri Sira. Powia i mPue Ala anu ewanceʼe mampatongawa kamonco-A. Maka ganamo kayombu ndaya mPue Ala ri tempo anu ndaliunakamo mangkita kasalaa ntolino, tempo setu Sira bareʼe mahuku tau seʼe. 26Paikanya seʼi-seʼi Sira mampepalisi waʼa ncalaa ntolino mampatongawa kamonco-A. Inceʼe mampatongawa ka-Siranya monco; pai sambaʼa-sambaʼa tau anu meaya ri Yesu, ndapatongawa inceʼe teimbamo tau anu simadagomo pai i Pue Ala.
27Inceʼe puʼunya painaka bareʼemo reʼe jayanya kita da mantoʼo-ntoʼo koro. Iwenu painaka ewanceʼe? Ara ua pawianakata waʼa anu lau ri padika agama nto Yahudi? Banya! Paikanya podo ua meaya, 28kaʼedenya ewaseʼi: Waʼa ntau anu simadagomo pai Pue Ala banya ua pangkotonya mawianaka waʼa mpadika agama nto Yahudi, paikanya podo ua siʼa meaya ri Yesu Kerisitu.
29Ara i Pue Ala setu podo Pue Ala nto Yahudi? Ara banya Sira Pue Ala banca ntaninya woʼu? Monco, Sira woʼu Pue Ala banca ntaninya woʼu! 30#Paw. 6:4, Gal. 3:20 I Pue Ala podo sambaʼa. Sira anu mawai jaya ngkasimadago-A muni pai waʼa to Yahudi, pai Pue Ala ua tau seʼe meaya. Pai Sira woʼu anu mawai jaya ri waʼa banca ntaninya kasimadago muni pai Pue Ala; inceʼe seʼe ua peaya ntau seʼe. 31Inceʼe posokinya banya ua kita meayamo ri Kerisitu da tetajimo waʼa mpadika agama nto Yahudi? Manoto banya ewanceʼe! Kamonconya ua peayata setu, kita da mampobangke padika setu.
اکنون انتخاب شده:
ROMA 3: LAIPMF
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید