ROMA 2
2
Popahuku i mPue Ala
2:1-16
1 #
Mat. 7:1, Luk. 6:37 Ua kaʼinceʼenya ee waʼa ngkasangkompo, ara isema komi painaka da ndipetisala tau ntaninya? Bereʼe jayanya komi da mantoʼo yoami! Maka ane komi mampetisala tau ntaninya, ntanoka komi seʼe mampowia anu ewanceʼe, mewali komi mabotusi hukumi ngkaliomi woʼu. 2Da tapaincani, ane i Pue Ala mabotusi huku ntau anu mowia ewanceʼe, botusi i mPue Ala setu mayoa. 3Paikanya komi woʼu ee waʼa ngkasangkompo, mampowia powia anu nditulurika waʼa ntau ntaninya! Neʼe boi ndisarumaka komi da lapa ungka ri popahuku i mPue Ala? 4Bara komi da mampesaru-saru puru ndaya i mPue Ala, kapande ndaya pai kayombu ndaya anu bangke? Manoto ndiincanimo i Pue Ala mampatongawa kapande ndaya-A maka pepokonoa da naka pura-pura komi da majea ungka ri kasalaami. 5Paikanya ua kapeni ndayami bareʼe ndipokono majea. Mewali komi ngkaliomi anu marangani kanee hukumi ri tempo ngkagero lino, ane ndatujumo i mPue Ala karau ndaya-A da mangabotusi popahuku anu mayoa. 6#Pol. 62:13, Pat. 24:12 Maka i Pue Ala da manciliki pura-pura tau, malulu powianya. 7I Pue Ala mawai katuwu anu monco pai bereʼe kapusanya ri waʼa ntau anu todo mampowia anu madago, tau seʼe da marata peawa pai pebangkei anu bareʼe da reʼe kapusanya. 8Paikanya waʼa ntau anu podo maendo koronya ngkalionya pai bareʼe meaya ri Pue Ala, paikanya malulu anu majaʼa, waʼa ntau setu da ndapokarau i mPue Ala. 9Sambaʼa-sambaʼa tau anu mampokono mampowia anu majaʼa da marata kapari pai pejeani; kaʼisa-isanya to Yahudi, pai waʼa banca ntaninya. 10Paikanya pura-pura tau anu mampokono mowia anu madago da ndawaika peawa pai pebangkei sangkani pai karodo ndaya ungka ri Pue Ala; kaʼisa-isanya ri to Yahudi ewanceʼe woʼu ri waʼa ntau banca ntaninya. 11#Paw. 10:17 Maka i Pue Ala siwia pampeole-A tau.
12Waʼa banca ntaninya mampowia salaa ua bareʼe naincani waʼa mpadika agama nto Yahudi. Mewali tau seʼe da ndabotusi ri sambaliku waʼa mpadika setu. Paikanya waʼa nto Yahudi mampowia salaa seʼi naincanimo waʼa mpadika setu; inceʼe puʼunya tau seʼe da ndabotusi malulu paewanya waʼa mpadika setu. 13Maka kasimadago muni ntau pai i Pue Ala, banya ua pangaincaninyamo waʼa mpadika agama nto Yahudi, paikanya ua pawianakanya anu teʼuki ri waʼa mpadika setu. 14Waʼa ntau ntaninya anu banya to Yahudi bareʼe naincani waʼa mpadika agama nto Yahudi. Paikanya ane nawianaka ntau seʼe silulu pai waʼa mpadika setu ua pepokononya ngkalionya, raya ntau seʼe ngkalionya anu mewali padikanya, mau bareʼe naincani waʼa mpadika agama nto Yahudi. 15Ri poʼengko ntau seʼe anu mampatongawa pangalulunya waʼa mpadika setu, teʼukimo ri raya ntau seʼe. Pompau ndaya ntau seʼe mampakanoto inceʼe, tesasaoyo tau seʼe napetisala pai tesasaoyo napakamonco nunawa-nawa ntau seʼe. 16Ewanceʼemo da pewalinya ri reme anu ndapakanoto setu. Ri reme setu – malulu Nuntu ngKatuwu anu kupobambarika – I Pue Ala mampoliu i Yesu Kerisitu, da mabotusi pura-pura anu tesambuni ri raya pai ri nawa-nawa ntau pura-pura.
To Yahudi pai waʼa mpadika agama nto Yahudi
2:17–3:8
17Paikanya seʼi-seʼi waʼa ngkasangkompo ewambeʼimo komi? Komi mangaʼaku kakominya to Yahudi. Komi mekekeni ri waʼa mpadika agama nto Yahudi pai maʼai kawongko ndayami ua pokentami pai Pue Ala. 18Komi marata totoraka ungka ri padika setu painaka ndiincani pepokono i mPue Ala, ndiincanimo mampakanoto mbeʼi anu madago. 19Manoto kojo ri rayami kakominya topombawanaka ntau buta, pai mewali reme ri oyo ntau anu lau ri tongo mbani; 20komi mewali guru ntau tengo pai guru waʼa ntau anu bareʼe mayombu ponawa-nawanya. Ndiincanimo kojo ri waʼa mpadika agama nto Yahudi, komi mampotumpu waʼa pangaincani pai totoraka anu monco. 21Komi mampaguru tau ntaninya; paikanya wenu painaka bareʼe ndipaguru koromi ngkaliomi? Komi mampaguru tau da naka neʼe melima, paikanya ara wenu komi ngkaliomi melima? 22Komi mampaguru tau naka neʼe mosalara, paikanya ara wenu komi mosalara? Ndipobanciika lamoa paikanya komi mangantima aga-aga ungka ri banua lamoa? 23Komi ndiepe meruumo ungka ri tau ntaninya maka komi mampotumpu waʼa ncongka i mPue Ala anu naparata i Musa, paikanya komi mampetikodimo i Pue Ala ua bareʼemo ndilulu songka-A? 24#Yes. 52:5 Lau ndaʼuki ri Sura Magali ewaseʼi, “Ua kakominya to Yahudi painaka toʼo i mPue Ala ndaposari ri oyo waʼa banca ntaninya.”
25Ane komi mepoʼinaya ri waʼa mpadika agama nto Yahudi, nepa da reʼe yowenya ndapasuna komi. Paikanya ane bareʼe ndikoto malulu waʼa anu ndapepokauka ri raya waʼa mpadika setu, bareʼemo liu-liu reʼe yowenya pangasuna komi. 26Ane sambaʼa tau anu banya to Yahudi pai bareʼe ndasuna, mangalulu waʼa mpadika agama nto Yahudi, ara bareʼe da ndaimba i mPue Ala siʼa ewa sambaʼa tau anu roomo ndasuna? 27Pai tau anu bareʼe ndasuna setu da mampetisala komi to Yahudi, maka komi anu mampotumpu waʼa mpadika agama nto Yahudi seʼi ndasuna woʼu, tongawa komi maewa waʼa mpadika setu. Tau seʼe bareʼe ndasuna, paikanya tau seʼemo anu malulu waʼa mpadika agama nto Yahudi. 28Maka tau anu monco kato Yahudinya banya podo ua mampotoʼo to Yahudi; pai tau anu monco-monco kojo roomo ndawianaka ada mpopasuna ri koronya. 29#Paw. 30:6 Kamonconya, sambaʼa tau anu ndatoʼo to Yahudi kojo inceʼemo tau anu rayanya meraya nto Yahudi; pai popasuna anu monco inceʼemo popasuna ri raya anu napotetalaka Inosa mPue Ala, banya anu teʼuki ri raya ncura. Tau anu ewanceʼe da mangarata peunde anu ungka ri Pue Ala, banya ungka ri tolino.
اکنون انتخاب شده:
ROMA 2: LAIPMF
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید