Matio 3
3
Yohané nganyu' benntùn tse
(Mark. 1.2-8; Luk. 3.1-18; Mfa' Gha. 19.4)
1Ntùm tshen lé'njù là, Yohané nganyu' benntùn ntse tum, nke ntshob ntshob Nsi num kônkwa Yudéa, 2ntshob #Mat. 4.17; Mark. 1.15ndù: Bin kaṅ ntù tsine, nummbe nufen kamànyam à ghebte. 3A #Es. 40.3yi ze Esaya ngatshob ntshob Nsi na' ntshob ndù: Nze mèn kua' mà kônkwa ntshob ndù: Bin nabte manze Tshùaben, ndate bon manze tse, ngù a tsine. 4Yohané #2 Fen. 1.8lo ghù nzwe i ze bo lo' nyiaṅ kamél nabte yi là, mba kob ngub tun i; jujù i na' mb'a ngamntàn bo ṅwa'a. 5Njoṅ ba Yérusalém fa, njoṅ ba Yudéa fa mba njoṅ ngôngô fa ts'a be mbaṅ Yordan nà tum, nèn ntèl i, 6mbam nukebwô tshobe, a nyu' yub ntse Yordan.
7A #Mat. 12.34; 23.33be yen mba ba Férésia mba ba Sadukai yàm tshwèt nse' num kwéntse là, ntshob bo ndù: Nzwit ngamnyu, we bèn ntshob bin ndù bin kù yantù z'a nsi se' l'à? 8Bin yam tàm nekaṅ ntù s'a ku'ni là. 9A #Yoha. 8.33ke' bwô bin ke ntshob ntùm ntù tsin ndù: Abraham b'a tà yag, nummbe me tshob bin ndù Nsi ku' nekaṅ men ndoṅ ni, ngù bon Abraham yi. 10Ne #Mat. 7.19mbe be, bo à yab njàm num nga ntù. Ndùlala, njoṅ ntù fa mi a ke' yam ntàm mebwô là, bo num nkeb i ma' ntùm mbwôge. 11Tu wul àm, me ke nyu' zin à ntùm ntse ndù bin kaṅ ntù tsine; là mèn z'a tshwèt nse' njam àm nà ta ntshùa àm, me ke' ku'ni neket nketo' mi. Tu wul i nsi nyu' zin à ntùm Ywèt Nelàn mba mbwôge. 12A ghù ke'te i bu i, a nsi ke'te njoṅ nsa fa mi bo tsham nà, tse'te nsa ntùn yab ntùm nta, là ton nga' mi ntùm mbwôg z'a ke' be bi là.
Kwéntse Yésu
(Mark. 1.9-11; Luk. 3.21-22; Yoha. 1.32-34; Mfa' Gha. 10.38)
13Yésu lo Galiléa nèn ntèt Yohané Yordan ndù a nyu' i ntse. 14Là Yohané gha, ntshob ndù: O bèn nku' nenyu' àm ntse, o bèn nse' m'a ndùke? 15Là Yésu bùnte ntshob yi ndù: Faṅ nà, be ghù ndùlala ndonni, nummbe a bwô ndù be ghù njoṅ nunetsin fa bumte. Ndùlala, Yohané faṅ. 16Ngelaṅ Yohané nyu' i ntse là, be ndùse Yésu tum ntse. Tshù, kamànyam gha' nte nge, a yen Ywèt Nsi swe', nse' num i ndù a fute bwoṅsaṅe. 17Tshù, #Net. 22.2; Yobk. 2.7; Es. 42.1; Mat. 12.18; 17.5; Mark. 1.11; Luk. 9.35nze mèn fe kamànyam, ntshob ndù: Yen ni b'a Mén àm ze me num nkô i, mbèn njab ntù àm fa num i là.
اکنون انتخاب شده:
Matio 3: BMa
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
La Sainte Bible en Bamiléké-Medùmba © Alliance Biblique du Cameroun, 1993. All rights reserved.