Mt 23
23
Ngo'o mia Befarizieñ a beyeme bekalate
(Mk 12:38-40; Lk 20:45-47; 11:39-52)
1Ane Yésus a nga kobô jama bôt a beyé'é bé 2na: Beyeme bekalate a Befarizieñ be too éto Môze yôp, 3jam ese ba jô mia ba'ala'an a bo'one de, ve te boone avale ba bo. Amu be nji bo ane ba jô. 4Ba ka'a adite mimbe'e e ne ayaé ya be'e e bitule bi bôte befe, ve bebien te kômbô fô'é mie a ônyu viap.
5Mam mese ba bo, ba bo me ve amu na bôt be yene be. Ba bo bikpwaé bekalate be Zambe biabe ndam a bo miñwôndé ya mengômesane map ayap. 6E mebô'ô bidi, ba nye'e bito mintômba, nalé fe bi ya ôsu e meba me Zambe, 7mebatan e mevôme bôt ba sulan; ba nye'e bôt be lo'one be na Rabi. 8Ve mia, te mia kañese lobane na Rabi; môte wua nye a ne ñye'ele wônan, mia bese mi ne bobenyañ. 9E *si nyô, te mia loone môt éziñ ésoo wônan, amu mi bili wua ve Esoo wônan a ne yôp. 10Te mia lobane na beliti bôte *zen, amu nliti zene wônan a ne wua ve Krist. 11Nyô a dañe beta môt e be mia a ye bo mbo ésaé wônan. 12Nyô a bete émiene yôp a ye silibane si a nyô a suu émiene si a ye betebane yôp.
13Bidim a mia, *beyeme bekalate a Befarizieñ bôte bebadu'u, amu mia dip éjôé ya yôp ôsu be bôt; miabebien teke nyiin été a teke jô'é ba ba kômbô nyiine na be nyiin.
14Bidim a mia *beyeme bekalate a Befarizieñ bôte bebadu'u! Amu mia nyoñe minkus e biôme bise be bili, éyoñe te fe mia bo ayabe meye'elane na bôt be yene mia.
15Bidim a mia, *beyeme bekalate a Befarizieñ bôte bebadu'u, amu mia bômane mañ a si asu ya dutu môte wua a éyoñe mi dutuya nye, mia veñesane nye mone ya ébé nduan a dañe mia tañe biyoñe bibaé.
16Bidim a mia, mindindime belitizen, mia mia jô na: Môt a kalane *nda Zambe teke jam é ne bo nye, ve nyô a kalane or a ne été nye a ntii mvôla. 17A mia mekut a mindindim jé ja dañe dañ anen ye or ye *nda Zambe ja telé or étyi' 18Mia jô fe na: Nyô a kalan ata'a metuna'a teke jam é ne été ve nyô a kalan mvean ô bete été yôp nye a mbili mvôla. 19A mia mindindim, jé ja dañ anen, ye mvean ye ata'a metuna'a da telé mvean étyi' 20Nyô a kalane ñhe ata'a metuna'a a kalane de a biôme bise bi bete été yôp; 21a nyô a kalan *nda Zambe a kalane je a nyô a too été. 22Nyô a kalane yôp a kalan éto njôane Zambe a nyô a too je yôp.
23Bidim a mia, *beyeme bekalate a Befarizieñ, bôte bebadu'u, amu mia ve *ngab awômô ya mesep, ôsim a ndôñ, ve mi vuane jam da dañ anen e metiñ: nya ntyi'ane mejôô, nkoon éngôngo a mbunan; mam mana mme mi nga yiane bo, ve teke jô'é ma mevok. 24A mia mindindime belitizen, mia viane léé afi a mine kamel.
25Bidim a mia, *beyeme bekalate a Befarizieñ, bôte bebadu'u! Amu mia fubu *élaé a be'e mfa'a ya atan, ve mfa'a ya été bi too njalan a wup nalé fe ôzañ akum. 26A ndindime Farizieñ, taté'é fubu *élaé mfa'a ya été, nalé atane dé da ye fe bo *mfuban.
27Bidim a mia, *beyeme bekalate a Befarizieñ, bôte bebadu'u! Amu mia funane mesoñ me ne ndubane fem, mme ma yené abeñ atan, ve été me ne njalan a bivese mimbim a mvin mevale mese. 28Nalé ate fe mia, mia yené bezôsôô be bôt atan, ve été mi ne njalan a nsisime bebadu'u a wu mbia be mam.
29Bidim a mia, *beyeme bekalate a Befarizieñ, bôte bebadu'u! Amu mia lôñe mesoñ bekulu mejô a kôme mesoñ bezôsôô be bôt, 30a mia jô na: Nge bi nga too melu b'ésaa bangan, bi nji ye bo beébe bebe'e ayem bap ya metyi bekulu mejô. 31Avale ya na mi ne bengaa ba wosane bebien, amu mi ne bone be bôt be nga wôé bekulu mejô! 32Jé éfe! Ke miabebien mia tu'a jalé mimboon b'ésaa benan. 33A benyo, mvoñe mekpwe! Aval avé mia ye tup a mate ntyi'ane mejô ya étôtôlan' 34Ajô te, mi lôô, ma lôme bekulu mejô, mimfefek a *beyeme bekalate e be mia; mia ye wôé bevo'o ya be be a tyelé bevo'o *krôa, a bibi bevo'o minkasa e meba me Zambe, a mia ye tibili bevok e tisone nyô a nyô fok; 35ndembene zôsôa metyi ase a nga sôébane si a ye zu be mia, ataté metyi Abél, zôsôa môt, a kui metyi me Zakari, mona Barasi; nye mi nga wôé e zañe *nda Zambe a ata'a metuna'a. 36Ma jô mia bebela na: Jame te ese da ye boban e miaé bôte wuna.
37A Yérusalém! A Yérusalém! Wo wo wôé bekulu mejô a lume ba ba lômbane be wo *mekok! Ngo'o abime biyoñ me nga kômbô kôane bone bôé ane ngale kup a kôane bone béé e mefabe mé si! Ve mi nji ke kômbô nalé! 38Tame yenan! Nda jenan ja ye li'i bilik asu denan. 39A ma jô ñhe mia na: Te ke selan a ataté éyoñe ji mia ye bo te beta yene ma akekui mi jôya na: Ebotan a nyô a zu a jôé Nti!
اکنون انتخاب شده:
Mt 23: BDCB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bible en langue Bulu © L'Alliance Biblique du Cameroun, 2007, 2015.