ZING'ANO 22
22
Vulahi vwu Kuva ni Miima Milahi
1Nivulahi kotovola lieta lilahi kuvita kotovola uvutugi ovonene, kandi nivulahi kuva ni miima milahi kuvita ifeza anoho zahabu.
2Mutugi harara nu mudaka vaveeye kindu kilala. Yahova yavalomba vosi.
3Mundu mugeri alolaa vuhimwa mayeleha, navuzwa mundu musiru azizaa maduuka mu vudinyu inyima yiduli.
4Utie Yahova kandi wegehizi na ulanyora madanyi gu vutugi, uluyali kandi ulahindira.
5Amafwa kandi mitego viveeye munzira yavandu vachamu, uyu wilindaa yeleha kuvio.
6Wigizi mwana kuli adukanaa komenya, na sialivilira lwa ava muhindira mba.
7Mundu mutugi yamiha mundu mudaka, na uyu wegobaa aveeye mutugwa wu mwegobizi.
8Mundu utagaa vudamanu alagesa kivi, ni lidambiza lia dambiza vandi lilahelizwa.
9Mundu oveeye muhaani alagasizwa kigira ahaanaa viukulia vivie ku vadaka.
10Ukungi mundu oveeye wikehenyahenye, na lihing'ana lilatula ho, mahangali, kandi ovolembani, vilahera.
11Mundu uyanzaa uvunifu vwu mwoyo kandi oveeye wi zimbavasi, mwami alava mulina weve.
12Yahova ahenzerizaa mundu oveeye ni limanya, navuzwa atungaminya makuva gu mundu utaveeye musuuvirifu.
13Mundu mugata ayaanza kohonga hango, avoora ndi isimba inyala kumunyoola niiva alatula ichova.
14Amakuva gu mukali muheyi gaveeye kuli vogo, gagumiraa yavo va Yahova aveeye nu vutima navo.
15Uvusiru vwayizula mumwoyo gwumwana, navuzwa imbimbu yukuhaana mageri ilatuliza uvusiru muye.
16Mundu udambiza vadaka kunangwa aduuki komeeda uvutugi vwivwe, kandi oyo uhaanaa kihanwa kumutugi vombi valagwa vadaka.
Zing'ano 30 Zio Vogeri
17Huliriza na nda kwigiza aga vandu avageri vamali kovora. Ohenzerizi amigizu gaavo, 18na ulasangala niiva ulagizuliza ma ugavoole. 19Nyenya usuuviri Yahova, yiki nicho kigiri ngovolere zing'ano yizi kalunu. 20Inzi mali kokong'odera zing'ano 30 ziveeye mu ni limanya kandi na miigizu amalahi, 21kandi zilakwigiza agaveeye amalungi kandi gagiligali. Maku lwutumwa kwenyeleriza, ulaleeta mativuli malahi.
Lugano Lwu -1-
22Utanula mudaka kigira aveeye mudaka mba, anoho utavadambiza mu kiyaalo mba. 23Yahova alasingilira kiyaalo chavo, kandi alalanya yavo avalanyaa avadaka.
Lugano Lwa -2-
24Utalomba vulina nu mundu wuvutima vululu ligali mba, 25Kigira unyala kwiga miima jaavo ma uvuli kugirung'ana.
Lugano lwa -3-
26Utalaga kutunga magovi gu mundu wundi mba. 27Niiva ulavula kutunga, valavugula kali kidali chicho.
Lugano lwa -4-
28Utasunda kigingi chu lwako kikulu cha vaguuga vovo vatuunga mba.
Lugano lwa -5-
29Ololaa mundu oveeye nu vusiza ku miyinzi jije milahi? Uyu alatumika imbiri wu mwami, kandi si alatumika imbiri wa vandu vataduukanaa mba.
©Bible Society of Kenya, 2019