ISAYA 8
8
Muyaayi wa Isaya kuva kuli kelolero ku vandu va Isiraeli
1Yahova yambolera, “Vugula kibaho kenene na ong'ode ku muzinduguta zinene yizi; ‘Maheri-shalali-hashibazi’.#8:1 Maheri-shalali-hashibazi: Avalolekizi valahilwa mukiyaro. 2Ndavugura Uria musaalisi kandi Zakaria muyaayi wa Jeberekia, kutumika kuli avalolekizi avasuuvirifu ku inzi.”
3Lwinyima, ndaali harara nu mukali wange muporofeti, na yavereka. Yivula mwana muyaayi. Maku Yahova yambolera, “Umuguriki lieta lilie ‘Maheri-shalali-hashibazi.’ 4Kigira, imbiri wu mwana uyu akikiri kuviruka kandi kumanya kovora, ‘Baba wange na Mama wange,’ mwami wa Asiria alaza kulanya uvuhinda vwosi vwa Damasiko na viosi via laanywa via Samaria.”
Mwami wa Asiria yaazaa
5Yahova yamoloma ku inzi kandi navoora, 6“Kigira avandu yava vamali kusura amazi kutura mu kisunikiru cha Shiloa, agitulukaa galaha, mioyo jiavo jakuza imbiri wu mwami Rezini nu mwami Peka, 7Inzi Yahova, ndaleta mwami wa Asiria harara na mahi geege goosi kwingilira avandu vi lidaala linene lie Ivuyuda. Valavalwana ligali kuli amazi gumugera gwa Efurate gwizuye kuduuka ku lujinga. 8Galakavitiri mu lidaala linene lie Ivuyuda; galizula ligali kali kukunika vindu viosi.”
Nyasaye aveeye harara ni kunyi! Zimbaha zizie ziavambuka zilakinga kivala.
9Munyi avizihiiri ziosi, mwivungikize harara, muvuti! Muhuliri, munyi avaveeye muvivala ihale. Mwetegeke kulwana, navuzwa muve avati! Yee, mwetegeke, navuzwa muve avati! 10Mulohiza makuva ginyu harara, navuzwa si mulaguuta mba. Mumolome kuli munyala! Navuzwa goosi gaveeye agavuzwa, kigira Nyasaye aveeye harara ni kunyi.
Yahova yiganihizaa Muporofeti
11Yahova yanziganihiza ni zinguru zizie zinene mbule kolonda zinzira ziavandu valonda. 12“Utahambana mulilohiza liuvwivisu lia vandu mba, kandi utatia vindu viavatizaa mba. 13Wizulizi ndi, inzi Yahova Wuvunyali, mbeeye mutakatifu; inzi mbeeye wa ivi udukana kutia. 14Kigira litihiza liu vutakatifu vwange, mbeeye kuli ligina liavandu vikigitara ku; mbeeye kuli mutego guligumira avandu vamadala ga Ivuyuda na Isiraeli kandi na vandu va Jerusalemi. 15Avanyingi valakikigitale; valagwi haasi nukusionolanywa. Valakagumilwi nu mutego.”
Lieganihiza kwenya zing'anagani kutura ku Avakuzu
16Munyi, aviigi vange geenya mulindi kandi kuviki amakuva ga Nyasaye amali kumba. 17Yahova yiivisi kutura ku vandu veve, navuzwa inzi musuuviraa kandi mbikaa lisuuvirizwa liange muye.
18Inzi harara na vana vange koveeye kuli kelolero chi lieganihiza kutura ku Yahova Wuvunyali omenya ku kiguru cha Ziyoni. Yakutuma kuli makuva gaveeye mwoyo ku vandu va Isiraeli.
19Navuzwa avandu valakovolera oteeve amakuva kutura ku vasigitiri, na valaguli kandi visohoro ni viganda. Valavoora, “Kali ndio avandu gavadukiraa vateeve amakuva kutura ku miroho midamanu kandi veenye zing'anagani kutura ku vakuzu muvogono vwayavo avaveeye mwoyo.”
20Uvativuliri ndi, “Muhulirize ga Yahova amwigizaa! Mutahulirizi amigizu gavasigitiri mba, agavamuvoolera sigalatuliza ho vudinyu mba.”
Ing'inga yu Vudinyu
21Avandu valagendagenda mu kivala, mu linyang'ana kandi ninzara. Mu inzara nu vutima vwavo, valalaama avami vaavo kandi Nyasaye wavo. Vanyara kohenza igulu mwigulu 22anoho kohenza hasi, navuzwa si valalora kindu mba, nitali vudinyu, kisundi chi litihiza kenene ichavahirwa mu.
©Bible Society of Kenya, 2019