Matio 9
9
Jizọs Ḅe Gbọrị Oju Fị Owuḅọ Gwọmẹ
(Mak 2.1-12; Luk 5.17-26)
1Jizọs Ḅe arụ mị ḅụkụlọ se vinpịkị ḍapa mị saḅa koro se Oria ama mị mun mẹ, 2anịanga gbọrịapụ oju fị owuḅọ nwọ ọkịḅo Ọ̀ pịrịmẹ, mọnọye ọgọnọ ḅọlọlọ sime waraḅẹ. Jizọs Ḅe inia ḅereni ḅaka la ọkụ nwọ ọrị sịkị, Ọ̀ nwọse oju fị owuḅọ ḅe ḅẹmẹ, “Kuḅie kụrọma, ị̀ya tọkụ! Ị́ya sima ḅụ ini ḅarasin ị́ pịrịsam.”
3Oloko ḍieapụma ḅe tọn apụ nwọse inia ḅụ ḅẹmẹ, “Ḅe ḅọ Ḅe ọ̀ Tamụnọ fiesimaḅẹ!”
4Jizọs Ḅe ini koromarịye nemi se nwọ ḅẹmẹ, “Nde ó gose nwọ sime siaye koromarịye? 5Cheye sarasaratẹịn nwọḅẹ na ‘Ị́ya sima ḅụ ini ḅarasin ị́ pịrịsam,’ anịkanịka ‘Sịsẹ se nwẹngị’? 6À se ó ḍie ḍọkịmẹ na Tomoniḅọ Tọkụ Ḅe mị tomonikiri ọ̀ kụrọ nyanamẹ, siḅụ-ḅarasin nweni pịrị.” Anị Ọ̀ nwọse oju fị owuḅọ ḅe ḅẹye-ẹ, “Sịsẹ chịẹ ị́ya mọnọye mị deki, se so warị mun!”
7Tomoniḅọ ḅe ọ̀ sịsẹ se so warị mun mẹ. 8Tomonima anị ọrị sịkị, inia ḅalafamẹ, se Tamụnọ Ḅe tokonimẹ, ọ̀ nwọ sime kụrọ se tomoni pịrịye gose.
Jizọs Ḅe Matio Ḅe Chịnmẹ
(Mak 2.13-17; Luk 5.27-32)
9Jizọs Ḅe anịanga koromasomẹ, se Ọ̀ nwẹngịmamun-arị sịkị, Ọ̀ gbọrị amaigbiki ochoḅọ nwọ ọrịmẹ, Matio nwọ chịnḅọ, oria fịrịnwẹngị warị ḅie sime waraḅẹ. Ọ̀ nwọse ọ̀ ḅẹmẹ, “Ị̀ ḍuko.”
Matio ḅe sịsẹ se Ò ḍukomẹ.
10Jizọs Ḅe Matio ḅe warị ḅie sime se ye fịarị ogbo anị tọn-a amaigbiki ocho apụ na simịẹapụ na sọ ḅo Jizọs Ḅe na oria ọḅụḍukoapụma na ḅụ sọ se dẹbụl ọgọnọ yefịye-ẹ. 11Farisiapụma ḅie tọn apụ mịn mị ọrị se nwọse Oria ọḅụḍukoapụma gbelamẹ, “Cheye gose ọ́mịna yeḍieḅọ ḅe amaigbiki ocho apụ na simịẹapụ na ye fị gboloma-ao?”
12Jizọs Ḅe ini ḍukoayema naa se nwọ pẹkẹrẹmẹ, “Oju kpụrụkpụrụapụma ini ḅịrịḅọ ḍọkịkẹ, ọkụma obiapụma kẹngẹ-ẹ. 13Ó mun, se Tamụnọ ọkwẹịn mị fiearịye nwọ ḍọkị nemi, ‘À nama se mịẹ agba ḅikẹ, ọkụma iḅi ye mịẹ ḅara anị à ḅiye-ẹ.’ À ḅo simịẹka apụma nwọ chịn-ẹḅokẹ, ọkụma simịẹapụ ma-ẹ.”
Ḅuruseḅụḅama Gbakịma Ḅẹrẹ Mị
(Mak 2.18-22; Luk 5.33-39)
14Jọn Mengisaraḅọ ḅe ọḅụḍukoapụma Jizọs Ḅe damaḅo se Ò gbelamẹ, “Nde mine na Farisiapụma na sịkịmamgba ḅuruseḅụḅaama ọkụ, ọkụma ị́ya ọḅụḍukoapụma ngịsị ḅuruseḅụḅaamaka ḅara?”
15Jizọs Ḅe nwọse ini pẹkẹrẹmẹ, “Ọ́ chịn ḅara ereya nyọ sime igoniapụma, ereya nyọ ḅụ kururu ḅe, ereyaḅọ ḅe ini na simearịogbo? Ye mịẹmịẹ ḅara ḅụ anị ọkọ paka ẹkẹ, ọkụma ene ḅoḅịa, ini inia ḅie ereyaḅọ ḅe nwọ dekisinḅịa, anịsịkị ini ḅuruseḅụḅaamaḅịa.
16“Ịwọ ḅịtẹ-pẹkẹrẹ se olomu ḅụchụaye sẹlẹḅịa ḅọ ofori-ẹ, anịatịḅị ịwọ ḅịtẹ-pẹkẹrẹ mị pụrụkụḅịa se anị ḅụchụaye mị kantẹịnḅịa. 17Anịkanịka ịwọ iru se olomusa nama apụra ololo ḅie chụaḅịa ḅọ ofori-ẹ, anịatịḅị olomu nama apụra ololoma kanḅịa, iru mị ọsụn faḅịa, se nama apụra ololoma siḅịa. Anịnakaraka, ịwọ iru mị ini anị se ịwọ nama apụra ololoma ḅie chụaḅịa se arịmgba iḅi ḅara ḅụ simeḅịa.”
Owunitịḅịnịḅọ Ḅe Ḅarọ Ma Na, Ḅara se Jizọs Ḅe Ḅụchụaye Lama Eremeniḅọ Ma Na
(Mak 5.21-43; Luk 8.40-56)
18Jizọs Ḅe mịn mị nwọ ḍuko ini pịrịarịogbo, gbọrị Juapụ tịḅịnịḅọ Ọ̀ damaḅomẹ, Ọ̀ tọrọkọ kpẹrẹkị koro, se nwọ ḅẹmẹ, “Ị̀ ndụḅa ma mịkirikiri á fịmẹ, ọkụma ḅo Ị́ ḅarama se árịa ọgọnọ gbana, se á ḍumoḅịa.”
19Anị Jizọs Ḅe sịsẹ se ò ḍukoye-ẹ, oria ọḅụḍukoapụma Ọ̀ ḅụ sọ mun mẹ.
20Gbọrị eremeniḅọ, pulo oyimaịn kụra fịnjị nwọse siḅara se ḅụ ideri ḅọ, Jizọs Ḅe ọḅụju ḅụ wẹrị ḅo se ḅara se Oria ḅụchụaye ḅịpị okolo lamamẹ. 21Á nwọse á ḅụ ḅẹmẹ, “À pa ḅara se Oria ḅụchụaye mị kẹngẹ nwọ lama ọkụma, ị̀ ḅụ iḅiḅịa.”
22Jizọs Ḅe vinpịkị se árị ọrịmẹ, se nwọ ḅẹmẹ, “Kụrọ kuḅie nyana ị̀ ndụḅa, ị́ya ḅereni mị mịẹse ị́ ḅụ iḅisam.” Anị gbọrị kirikiri eremeniḅọ ma á ḅụ iḅimẹ.
23Jizọs Ḅe ḅo tịḅịnịḅọ ḅe warị lasịkị. Ọ̀ ḍụẹịn ḍipi gose ti kọn-arịapụma na, tomonikpo mị na nyọ fiemarị ḅara nwọ ọrị sịkị, 24Ọ̀ nwọ ḅẹmẹ, “Ómine mgba ọ́ paka! Tọkụ ma á fịkẹ á papa mọnọaḅẹ!” Inimgba sakị Ò se kpọtimẹ. 25Tomonima nwọ pakaso kirikiri, Jizọs Ḅe tọkụ ma jukuru ḅie sọmunmẹ, á ḅara ọlọ, se á sịsẹmẹ. 26Mịn nwọ pakaye mị wasama anị ama mị mgba kelemamẹ, sẹ mị ḅie.
Jizọs Ḅe Mama Tọrụmgbọlụpụn Owuapụ Gwọmẹ
27Jizọs Ḅe anị nyọ mị nwọ koromasomẹ, se Ọ̀ nwẹngịmamun-arị ogbo, mama tọrụmgbọlụpụn owuapụ sakị Ò ḍuko se olokuaḅẹ, “Ḍikiḅụgerere nyana wa pịrị, Devid Tọkụ!”
28Jizọs Ḅe warị mị ḅie sọ sịkị tọrụmgbọlụpụn mama owuapụma Ọ̀ damaḅomẹ, se ori ini gbelamẹ, “Ó ḅereni na àrị ineda ọ́ gwọḅịa-ẹ?”
Ini nwọ pẹkẹrẹmẹ, “Iin, Nyanaḅọ!”
29Jizọs Ḅe ḅara se inia tọrụmgbọlụma lama se nwọ ḅẹmẹ, “Ye anị ó ḅereni ḅara mị nwọ paka!”— 30inia tọrụmgbọlụma finji mẹ. Jizọs Ḅe kụrọma nwọse ini ḅẹmẹ, “Mịn mị ó ḍuko gbọrịḅọ sọ pịrị ma!”
31Anịsọ ini pakaso sịkị, Jizọs Ḅe gboloma ḅẹrẹ mị ini nwọ ḍuko sẹ mị ḅie anị ama mị ḅie mgba nwọ kelemamẹ.
Jizọs Ḅe Ḅịpị Iniki Kọn Gbọrị Owuḅọ Gwọmẹ
32Tomonima soarị ogbo, jịn apụ pịkị gbọrị sitẹmẹ ḅie ḅụ sime ḅịpị iniki kọn ḅọ se Jizọs Ḅe damaḅomẹ. 33Ò sitẹmẹ ḅe desin kirikiri, tomoniḅọ ḅe sakị ọkwẹịnmẹ, se ijira tomonikpo mị ḅụ saramẹ. Ini nwọ ḅẹmẹ, “Mịn mị kịkẹye Izrẹl ḅie ngịsị ma wa ọrịkẹ!” 34Ọkụma Farisiapụma nwọ ḅẹmẹ, “Si-a-tẹmẹma ḅe tịḅịnịḅọ ḅe mị kụrọ se ọ̀ pịrị se Ò si-a-tẹmẹma desin-arịye-ẹ.”
Jizọs Ḅe Tomoni Ma Ḍikitịḅịfoinmẹ
35Jizọs Ḅe ọ̀ nwẹngị amama na ịwọ amama na kelemamẹ. Tẹkẹwarịma ḅie ò yeḍiemẹ, ori Amanyanakiri mị ḅe Iḅi Ḅẹrẹ nwọ ḍukowasamamẹ, se pịkị si-obi goyegoye na, obi tọrụkịrịkịrị kọn apụ mamgba na gwọmẹ. 36Ò tomonikpo mị ọrị sịkị, ori ini ḍikitịḅịfoinmẹ, anịatịḅị inia ḅụḅalaḅalaḅẹ, ini pịkị ḅarachụa nyanakẹ, ḍikiḍikiḅọ oforika anana simeọkụ. 37Anị ọ̀ nwọse oria ọḅụḍukoapụma ḅẹye-ẹ, “Sokusịkị ḅe fịayema ḅaka waraḅẹ, ọkụma àrị koḅirimaḅịa fịrịnwẹngịapụma bokẹ. 38Sokuḅịayema nyanaḅọ ḅe ọ́ nwọ tẹkẹ, mịẹse ọ̀ fịrịnwẹngịapụ fịrịma pakụma se oria sokuayema koḅirima.”
اکنون انتخاب شده:
Matio 9: OBTP
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The Bible Society of Nigeria