Tito 2
2
Enjekesa yadyeeri
1Nae ewe, ohoyere ohweekesa ebifukiirisania neende enjekesa yadyeeri. 2Yekesa abasaacha bahuluundu bahaye ohubechaanga abameesi, nae babecheengemo amakesi, babecheenge ab'efukiirira ndai, ab'obuheeri bulai, haandi abeesimiirisi. 3Mu ngeri nasilala eyo, yekesa abahasi bahuluundu beebiseenge koti abahasi bali neende obulamu bwoolerefu buhoyera. Bahae ohubechaanga abamoonyi oba abawaambe b'obumeesi. Bahoyere ohweekesaanga ebihole bilai, 4hu banyale ohweekesa abahasi baraaga ohuheeraanga abasaacha baabwe neende abaana baabwe, 5ohuba abeliinda, abataaliho esibi, haandi ohubechaanga abahasi bomu daala abalai, haandi abawulira abasaacha baabwe, hwaabuleo omuundu yeesi ochia ohulomalomaanga bubi hu Mboosi yitula eyiri Nasaae. 6Mu ngeri nasilala eyo yekesa abaraaga beegeendereseenge haandi beetuka abeene. 7Nae mu biindu byoosi ewe omweene ohoyere ohubechaanga esyohuboneraho sy'ebiima bilai. Bechaanga owadyeeri haandi omumaliirifu mu njekesa yao. 8Wehoonyereenge emboosi ndai chitayiinganisibwa, hu basuku bao banyale ohudiirwa esoni nibahaywa ohuba neende esiindu sibi syoosi sibahatulomalomaho. 9Abawaambe bahoyere ohuwuliraanga abaami baabwe, haandi ohubasaangaasaanga mu buli siindu. Sibahoyere ohukalusanianga neende abaami baabwe, 10oba ohubeebaangaho. Nae bahoyere ohweekesanga bati balai haandi beesikwa mu buli siindu, mani mu buli siindu si bahola, abaandu banyale ohusiima enjekesa yidiira hu Nasaae Omuwonia weefwe.
11Olwohuba Nasaae yamala ohweekesa abaandu boosi embabaasi chae ech'ohubaonia. 12Embabaasi echo chitweekesa ohwebwaaba obulamu butatya Nasaae, neende obwekoombi bw'obulamu bwomu syaalo, mani hu hunyale ohweetuka abeene, ohuba abaluungifu, haandi abatya Nasaae mu syaalo muno, 13nihuliindiriire Oludaalo lwoolerefu lu husuubira, lu luyaali luhoongo lwa Nasaae weefwe neende Omuwonia Yesu Kristo lwahabonehereho. 14#Sab 130:8; Hut 19:5; Amal 4:20; 7:6; 14:2; 1 Pet 2:9. Kristo yeyaanayo hulweefwe mani yaatununula mu bibi byoosi, haandi neende ohutulabya hube abaandu bae aboolerefu beene, haandi abadaha huhola ebiindu bilai.
15Beekese ebiindu bino byoosi, haandi wehoonyere obunyala bwao bwoosi noobagumia emyooyo haandi niwoolobya abahutekeeresa. Leha omuundu yeesi atahulekeeresaho.
©Bible Society of Kenya, 2019
©Bible Society of Uganda, 2019