Ruusi 4
4
Bboasi adeehya Ruusi
1Bboasi bulaanu yasiingira yaacha abuundu w'emihung'aano, ena siruwa sy'esiko esyo, mani yeehala ebweene eyo. Nae, omwiiho wohubweene wa Elimeleki, omusaacha yi Bboasi yali naalomaloomeho, yasuda aambi, Bboasi yaamulaanga n'aboola ati, “Ewe yicha eno, mwiicha waange, wiihale aasi.” Yesi yeehala aasi. 2Bboasi yadoola ehumi hu beemirisi bomu siko omwo, yaabasaba beeche bosi beehale abweene ao. Nibaba nibamalire ohwiihala, 3Bboasi yaboolera abeeho bae ati, “Bulaanu koti lu Naomi yakoboole ohutula mu Moabbu, adaha ohukusa omukuunda kwali okwa Elimeleki, omwiiho weefwe, 4nae ese mbaasa endi eng'we mwesi muhoyere ohusimanyaho. Mani bulaanu, nikali mbwe ewe okudaha, kukulire mu moni w'abasaacha beehaale ano bano. Nae nikali mbwe ewe haba sookudaha, boola sa otyo, olwohuba obunyala bw'ohukukula butaangira ohuba obwao, hubweemao bweecha yiindi.”
Omusaacha oyo nae yaboola ati, “Ese niise ochia ohukukula.”
5Bboasi yaboola ati, “Otyo! Nikali mbwe niiwe ochia ohukula omukuunda okwo ohutula hu Naomi, wesi oba ochia ohukuliraho neende Ruusi yeesi, omuhasi mufwiirwe Omumoabbu wuno, hu bulaanu, omukuunda kunyale ohudoong'a mu lwaanyi lw'omusaacha wafwa.”
6Omusaacha wuno haandi yaboola ati, “Nisiba sityo, ese njia ohulehuulira obunyala bwaange obwohukula omukuunda okwo, olwohuba siba sichia ohweekesa siti, abaana baange beene, sibaba nibachia ohunyala ohukusihira daawe. Ewe maya akakukula omweene; ese biihirira ohulehana nakwo sa.”
7 #
Amal 25:9. Bulaanu, mu ndaalo echio, ohwomiisa ohukulaana, oba ohukulaasania ebiindu, kwali omunyira okw'omukusi, ohwefwaalulamo esiraato syae, mani yaasiberesa omukuli. Mu ngira yino, Abaisiraeli beekesaanga bati emboosi chalichiingi nichimalire ohuchwichwiiswa.
8Mani, omusaacha oyo yaboolera Bboasi ati, “Ewe niiwe oba okukule,” yefwaalulamo esiraato syae, yaasiberesa Bboasi. 9Bulaanu Bboasi yaboola ati, “Eng'we mweesi mbao muli abaloli enyaanga yino muti ese niise omukuunda okulire ohutula hu Naomi, buli siindu syoosi, esyali esya Elimeleki, haandi neende esy'abaana bae boombi, Kilioni neende Mahiloni. 10#Amal 25:5,6.Haandi ohumeeda ohwo, Ruusi Omumoabbu, omufwiirwe wa Mahiloni, yesi yeehola omuhasi waange. Sino siba sichia ohuliindira ebiindu by'omuundu wafwa mu lwaanyi lwae, mani olwaanyi lwae hu lunyale ohuchiiririra mu baandu bae, haandi neende mu siko sy'engo wae. Eng'we mbano niing'we abali abaloli, hu ludaalo luno.”
11 #
Huc 29:31. Mani abeemirisi abo alala neende abaandu baandi baliwo baboola bati, “Eee, efwe huli abaloli. Omwaami ahoya yaahola omuhasi wao oyo yaaba koti Rakeeli neende Leya, abeebulira Yakobbo abaana abaangi muno. Ewe wesi ohoya weehola omuyinda mu nono ya Efuraimu, haandi waamanyihana mu Bbetilehemu ayakiire. 12#Huc 38:27-30.Abaana ba Omwaami achia ohuhuberesa ohubitira mu muhasi muyere wuno, bosi bahoya baahola olwaanyi lwao lwaaba koti olwaanyi lwa Peresi, omwaana wa Yuda neende Tamari.”
Bboasi neende abeechuhulu bae
13Mani Bboasi yaabukula Ruusi yaamuyira engo wae ohuba omuhasi wae. Omwaami yaamuberesa ehabi, yaayera enda, yeebula omwaana musyaani. 14Abahasi baandi baboolera Naomi bati, “Omwaami afume! Ahuberese omwiichuhulu musyaani enyaanga yino ohuhuliinda. Omusyaani oyo ahoya yaamanyihana mu Yisiraeli mwoosi! 15Muhoomwaana wao oyo yahuheera muno, haandi yahahuholera ebiindu biingi muno, ohuhira abaana bataanu-na-babiri abalaamba. Haandi bulaanu buti yahamala ohuhuberesa omwiichuhulu musyaani, ochia ohuhuleetera obulamu buyaaha, haandi amale ahuberese obuliindi mu ndaalo chao ch'obukofu.” 16Naomi yesi yabukula omwaana oyo, yaamuta hu mataango kae, mani yeehola omulesi wae.
17Abahasi bali nibabasibirana beecha mani baakuliha omwaana oyo bati, Obbedi. Bachia baabooleraanga buli muundu bati, “Eng'we, Naomi yebuule omwaana musyaani!”
Mani Obbedi oyo niye owaba laatang'ene Yese, owali laatang'ene Daudi.
18Luno nilwo olwiibulo, ohutulana hu Peresi, ohwoola hu Daudi: Peresi yali laatang'ene Hesirooni, 19Hesirooni laatang'ene Raamu, Raamu laatang'ene Aminaadabbu, 20Aminaadabbu laatang'ene Nahasoni, Nahasoni laatang'ene Salimoni, 21Salimoni laatang'ene Bboasi, Bboasi laatang'ene Obbedi, 22Obbedi laatang'ene Yese, neende Yese laatang'ene Daudi.
©Bible Society of Kenya, 2019
©Bible Society of Uganda, 2019