Engaado 6
6
Ohulabula huundi
1Mwaana waange, niweemereraanga owaasyo,
oba omweene weteere mu bunyala bw'omuteende;
2niweeteka mu byoolomaloma,
emboosi chomu munwa kwao nicho echihuboya.
3Mani ewe, mwaana waange, hola sino wewonie omweene,
olwohuba oli mu bunyala bw'omuundu wuundi;
chia yaali, mani weloongoyase, omwekweede ahuhoonye.
4Otabechaanga mu hukona endoolo sa
neende ohwiihala owuluuheho.
5Wewonie koti embooko yiruha omuyiimi,
koti eyoni libbachuuhe mu mahono k'omuteki.
6Omukata ewe, chia obonereho hu make;
wehaliirise engeri chi kaholeramo emirimo, mani okeekereho amakesi.
7Haba sikali neende omweemeresi yeesi,
kata omulambuusi oba omutuki,
8nae keebiihira ebyohulya byaako mu siminyu,
mani keteekehera ebyohulya muukesa.
9Omukata ewe, waheyalise ao ohwoola liina?
Wahasimuhe liina ohutula mu ndoolo chao?
10 #
Eng 24:33,34. Waheengao noboola oti, “Haangoneho budiidi,
hafuumbeho amahono budiidi, mbuluuheho budiidi.”
11Nae n'osisiiri muhuyiriita, obumanani bwahahuseete,
koti omutemo ohuseetere neende ebilwaaniso.
12Omuundu mubi abula obuhoonyi,
akeendaana neende enomanoma hyaamu,
13atemyatemya emoni chae, ahwesahweesa amakulu kae,
asyoomesa olwaala lwae.
14Mu mbaasa yae ehyaamu, abaasa ohuhola ebibi,
yemeeda ohusalaania obulekeeresi;
15mani sakira amasira kahamwooleho nataamanyire;
mu biha bidiidi, yahabe afunihe-funiihe bubi muno bi atahalerwa.
16Biluwo ebiindu bisaasaba bi Omwaami yasyuula,
bitaanu-na-bibiri, eby'omusiro eyiri Omwaami:
17etingaala y'ohwepaaha, olulimi lubacha,
neende amahono keedisa amabaanga kabula omusaango,
18Omwooyo kubaasa ohuhola ebibi,
amakulu kaanguya muno ohuhola ebibi,
19omuloli otusa obuloli bw'obubacha,
neende omuundu osalaania eby'obusoolo mu baasye.
Ohulabula hudiira hu bucheke
20Mwaana waange, liindaanga ebilagiro bya laatao,
haandi otebiriraanga enjekesa ya maakoo.
21Biihaanga mu mwooyo kwao emboosi chaabwe buli ludaalo;
haandi ocheboyeenge muukosi mwao.
22Chinaahwimirireengemo, n'okeenda;
chinaahuliindeenge, niweyaliise;
haandi chinaalomalomeenge naawe, n'osimuha.
23Olwohuba ebilagiro, taara nilyo haandi enjekesa, bulafu nibwo,
haandi ohwoolobya hw'ohukolola, niyo engira y'obulamu.
24Ochiliindaanga hw'onyale ohuwona omuhasi mubi,
neende ahalimi h'omuhasi mucheke.
25Otekoombaanga obulai bwae mu mwooyo kwao,
haandi ebikye by'emoni chae bitahudiiraanga;
26olwohuba malaya anyala ohukulwa neende eseende chikula omugaati
nae omuhasi mucheke aleetera obulamu bwao ohusihirira.
27Omuundu anyala ohwakata omuliro muumbafu mwae
mani engubo chae chahaya ohuya?
28Oba omuundu anyala ohuseena hu maanda kabalire
mani amakulu kae kahaya ohumamuha?
29Mani nasilala nilwo lu siri neende omuundu okona neende omuhasi w'owaasye;
abulao omuundu omudiiraho otachia husaandisibwa.
30Abaandu haba sibalekeeresaanga omwiibi owiiba
ebyohulya mbwe huyeekute, enjala niyimuluma?
31Haandi nibaba nibamudiirire, atuunga amahabi kataanu-na-kabiri ohuhirao;
mani atuse atuunge buli siindu syomu nyuumba yae.
32Mani omuundu okona neende omuhasi w'owaasye abulamo amakesi;
omuundu osihola omweene yesihirisa sa.
33Yahalekerswe haandi ahuywe,
mani yahadiirwe esoni chitahawe.
34Olwohuba embaliha yidiisa omwene muhasi etima,
mani achia ohwetuunga abula ohukwiira esisa.
35Haba saacha hufukiirira otuunge esiindu syoosi ohwenunula,
oba ebiyaanwa byao biingi haba sibyahamaleo etima lyae.
©Bible Society of Kenya, 2019
©Bible Society of Uganda, 2019