Ohubala 35
35
Ebiko bihuluundu ebyabereswa Abaleefi
1 #
Yos 21:1-42. Mu syaalo sikwalaafu sya Moabbu, niwambuuhe Yorodaani n'otulira Yeriko, Omwaami haandi yeecha yaboolera Musa ati, 2“Boolera Abaisiraeli oti ohweema hu busiha bubanyoolere, bahoyere ohukabaho Abaleefi ebiko bihunuufu biindi, bamenyeengemo haandi ohwayaanga ebyaayo byaabwe nibabyebodoohania. 3Ebiko bihunuufu bino bichia ohuba eby'Abaleefi, haandi nimwo mu bachia ohumenyaanga. Eloba ly'olwaayiro lichia ohuba ely'eng'oombe chaabwe haandi ebisolo byaabwe biindi. 4Eloba ly'olwaayiro lihoyere ohubaambaliyia nilitula erwaanyi, ohutula hu sida sy'esiko sihunuufu emiita emia chine neende amahumi kataanu (450) buli lwaande, 5hu yinyale ohubaayo abuundu yaakanirira akerwa yoosa emiita emia chitaanu-na-chine (900) hu buli lwaande, esiko sihunuufu esyo nisiri akatikaati. 6Muhoyere ohuberesa Abaleefi ebiko bihunuufu bisaasaba eby'obwiiruhiro, yi muundu yeesi anyala ohwiiruhira nikali mbwe yeetere owaasye n'atechoomere. Ohumeeda ohwo, mubaberese haandi ebiko bihunuufu biindi amahumi kane neende bibiri 7alala neende eloba lyaahwo ly'olwaayiro, hu byeemeo binyale ohuhula obuungi bw'ebiko amahumi kane neende bitaanu-na-bidatu. 8Obuungi bw'ebiko by'Esileefi mu buli nono yihoyeere ohukeraaniswa neende obuhoongo bw'esiko esyo.”
Ebiko by'ohwiiruhiramo
(Amal 19:1-13; Yos 20:1-9)
9 #
Amal 19:2-4; Yos 20:1-9. Omwaami yaboolera Musa 10ohuboolera abaandu ba Yisiraeli ati: “Nimuchia ohwaambuha Omwaalo Yorodaani, mani mumale mwiingire mu syaalo sya Kanani, 11muhoyere ohudoola ebiko bihunuufu by'obwiiruhiro yi muundu yeesi anyala yeeruhira naaba niyeetere owaasye n'atechoomere. 12Eyo niyo yaaba achia ohuba neende omuleembe ohutula hu beeho b'omuundu yaaba niyeetere abanyala baadaha ohumusoola. Abulao omuundu yeesi owabirwa omusaanga kw'ohuba naanyala ohuba niyeeta, ohoyere ohwiitwa naatayaasirwe mu siina sy'olwiichuule. 13Mani doole ebiko bihunuufu bisaasaba, 14bidatu ebiri ebukwe wa Yorodaani, haandi bidatu ebiri mu syaalo sya Kanani. 15Bino bichia ohwehoonyerwa koti ebiko bihunuufu by'obwiiruhiro eby'Abaisiraeli haandi neende abateende bosi ababa nibamenyaho oba nibamenyera elalira nabo. Mani oyo yeesi owiita owaasye natachoomere anyala yeeruhira mu silala hu biko bihunuufu ebyo.
16“Nae naaba namuhubbire neende esiindu sy'esichuma, hu yeemao yaafwa, aba ali omwiiti; nae omwiiti yeesi ahoyere ohwiitwa sa. 17Nae naaba naamuhubbire neende ekina niliri mu muhono, ebinyala ohukera omuundu yaafwa, mani omuundu oyo yeecha yaafwa, omuhuyire aba ali omwiiti; omwiiti yeesi aba ahoyere ohwiitwa sa. 18Oba naaba naamuhubbire yaakwa neende esyooki syoosi, esy'olubbaao nisi mu muhono, esinyala ohukera omuundu yaafwa, mani omuundu oyo yeecha yaafwa, omuundu omuhubbire oyo aba ali sa omwiiti; nae omwiiti yeesi ahoyere ohwiitwa sa. 19Mani omwiiho w'ambi bweene w'omuundu weetwa niye oba ali neende obunyala bwiita omuundu mwiiti oyo. Namuhoonya mani yamwakaana, aba ahoyere ohwiitwa sa.
20“Omuundu yeesi naaba niyasyuula owaasye yeesi, mani yeecha yamwiita naamusiindiha yaakwa aasi oba naamulasiire esiindu syoosi, 21oba naamuhubbire neende esifuusi sa, aba aliho omusaanga kw'obwiiti sa mani aba ahoyere ohwiitwa sa. Omwiiho w'ambi muno hu muundu oba niyeeterwe niye oba ali neende obunyala bw'ohwiita omwiiti oyo. Namukoonya mani yaamunyoola aba ahoyere ohwiita sa.
22“Nae nikali mbwe omuundu yeesi yeecha yeeta owaasye n'atachoomere yaatasyuulana nae, oba ohubitira mu husiindiha yaakwa sa aasi, oba ohumulasira sa esiindu syoosi. 23Oba bonaho oti, kata natabeere niyewuunjireyo, omuundu yeesi alasa sa ekina mani lyeecha lyeeta omuundu yeesi yaaba n'atechoomere ohunyaala, haandi otabeereho naali na obusuku bwoosi. 24Mani emisaango koti ekyo, abaandu boosi bahoyere ohukiheenga nibakwiira omuundu oba niye owiitire owaasye, nae haba sibahoyeere ohukwiira omwiiho w'omuundu ofwiire oba naadaha ohumusoola. 25Abaandu boosi baba bahoyere ohuwonia omuundu oba naaliho omusaango kw'ohwiita n'atachoomere ohutula hu mwiiho w'omuundu weetwa, mani baba haandi bahoyere ohumukobosa mu siko sihunuufu sy'obwiiruhiro yi muundu wuno aba naali yi yeeruhira. Ahoyere mani bulaanu ohumenya ebweene eyo ohwoola lu muundu oba naali Omulaamisi Muhuluundu esiha esyo afwiira. 26Nae nikali mbwe omuundu oliho omusaango kw'ohwiita n'atechoomere yeecha yaatula mu siko sy'obwiiruhiro syaaba niyeeruhiramo esyo 27mani haandi nikali mbwe omwiiho w'omuundu weetwa niyeecha yaamufuumbula mani yamwiita, ohwiita huno hw'ohusoola haba sihuba nihuli obwiiti bweene daawe. 28Omuundu yeesi oliho omusaango kw'ohwiita n'atechoomere ahoyere ohudoong'a sa mu siko sy'obwiiruhiro ohwoola ohufwa hw'Omulaamisi Muhuluundu, mani luunyuma lwasino, aba ahoyere ohwekobolera engo wae. 29Amalako kano kadiira hweeng'we neende hu beechuhulu beeng'we yoosi yi muba nimuchia ohumenyaanga.
30 #
Amal 17:6; 19:15. “Omuundu yeesi ohumabira omusaango kw'obwiiti, ahoyaanga awoseswa mani anyoolwa naali neende omusaanga hu yeetwa lwoong'ene luunyuma lw'ohunyolaanga Abaloli babiri oba abaangi ohuhiraho ao; obuloli bw'omuundu mulala haba sibumala ohulumirisa omuundu hu musaango kw'obwiiti daawe. 31Omwiiti yeesi ahoyere ohwiitwa sa. Haba saafukiirirwa ohweewonia esiholwa sino neende ohutuunga sa eseende choong'ene daawe. 32Nikali mbwe omuundu yeesi aba niyeeruhiire mu siko sy'obwiiruhiro, mutakanyaanga atuunga sa eseende mani anyala ohwekobolera engo daawe, ohutusaho lwoong'ene Omulaamisi Muhuluundu naaba n'amalire ohufwa. 33Nikali mbwe mwoola mwasihola mutyo, muba muchia ohubaha omukwoobo esyaalo sino si muba nimumenyeremo. Obwiiti bubaha esyaalo omukwoobo, mani ataali ohufwa hw'omwiiti, aba abulao omuduunga kw'ohulabisibwa esyaalo esyo si muundu aba niyetiirwemo. 34Mutabahaanga omukwoobo esyaalo si muba nimwamenyamo daawe, olwohuba ese niise Omwaami mani haandi ndamenya mu baandu ba Yisiraeli.”
©Bible Society of Kenya, 2019
©Bible Society of Uganda, 2019