Ohubala 34
34
Enjaho chikabaniamo eloba
1Omwaami yaberesa Musa 2ebilagiro biloondaho bino hulw'abaandu ba Yisiraeli: “Nimwiingira mu Kanani, eloba li njia ohubaberesa, enjaho ch'obwaami bweeng'we chichia ohuba chiti. 3Olwaaho lw'emwaalo luchia ohutulira hu sichiimi sya Siini hu lwaaho lwa Edomu. Luchia ohuchaakira ebukwe yi njakamo y'emwaalo w'Enyaanja y'omuunyu. 4Ao mani luba luchia ohukaluuhana nilwiiha emwaalo ahakira ha Akirabbiimu mani lwemeede niluchia nilubita mu Siini ohwoolera elalira emwaalo bweene mu Kadesi Bbarinea. Ao luchia haandi ohukaluuhana luchaake ohuniina emukulu w'emuumbo ohwoola hu Hasaari Adaari, haandi ohwemeeda niluchiiririra ohwoola hu Asimooni, 5yi luba luchia haandi ohukaluuhanira niluchoomere ehoondo yiri hu lwaaho lwa Misiri, mani lweemeo lwiiche lwoole hu nyaanja ya Mediterania.
6“Olwaaho lw'emuumbo nalwo luchia ohuba Enyaanja ya Mediterania.
7“Olwaaho lw'emukulu nalwo luchia ohuloondakana neende olunyiriri ohutulira hu Mediterania ohwoolera elalira hu Lugulu Hoori 8haandi ohutula abweene ao, ohwoola hu Hamati-Pasi. Luchia ohwemeeda ohuchia ohwoola elalira hu Sedadi 9neende hu Sifurooni, mani luchia ohwaakama hu Hasaari Enaani.
10“Olwaaho lw'ebukwe nalwo luchia ohuloondakana neende olunyiriri ohutulira elalira hu Hasaari Enaani ohwoolera elalira hu Sefamu. 11Luchia haandi ohutula ao mani lwiihe lwiiche lwoole emwaalo hu Ribbila, ebukwe wa Aini, haandi mani lwemeede ohuchia ohwoola hu bigulu biri enaagenya ly'ebukwe ly'Enyaanja ya Galilaya, 12mani haandi lwiihe emwaalo niluchiana neende Omwaalo kwa Yorodaani, ohwoolera elalira hu Nyaanja y'omuunyu.
“Chino nichio echichia ohuba enjaho chine ech'esyaalo syeeng'we.”
13 #
Hub 26:52-56. #Yos 14:1-5. Musa yaboolera Abaisiraeli ati, “Lino bulaanu nilyo eloba li muchia ohukabanamo nimuubba eha, eloba li Omwaami mweene aleheere enono chitaanu-na-chine neende esituundu. 14Enono chia Rubbeeni neende Gaadi haandi neende olwaande lw'ebukwe lwa Manaase, abo bamala ohunyoola omukabo kwaabwe, okwakabanisibwamo ohweema hu madaala kaabwe, 15hu lwaande lw'ebukwe lwa Yorodaani, eyitekehaane neende Yeriko.”
Abeemirisi abali neende obunyala bw'ohukabaniamo eloba
16Omwaami haandi yeecha yaboolera Musa ati, 17“Eliasaari omulaamisi neende Yosua omwaana wa Nuuni nibo abachia ohukabaniamo eloba elyo hulw'abaandu boosi. 18Haandi chia odoola omwiimirisi mulala ohutula mu buli nono oba naachia ohubahoonyaho ohulikabaniamo.” 19Mani kano niko ameeta k'abasaacha abo: Ohutula mu nono ya Yuda, yali Kalebbu omwaana wa Yefune. 20Ohutula mu nono y'abaana ba Simeoni, yali Semueli omwaana w'Amihudi. 21Ohutula mu nono ya Bbenjamini, yali Elidaadi omwaana wa Kisilooni. 22Ohutula mu nono y'abaana ba Daani omwiimirisi, yali Bbuuki omwaana wa Yogili 23Ohutula mu basyaani ba Yosefu bali bati: ohutula mu nono y'abaana ba Manaase omwiimirisi, yali Hanieli omwaana wa Efodi. 24Mani haandi ohutual mu nono y'abaana ba Efuraimu omwiimirisi, yali Kemueli omwaana wa Sifatani. 25Ohutula mu nono y'abaana ba Sebbuluuni omwiimirisi, yali Elisafani omwaana wa Parininaki. 26Ohutula mu nono y'abaana ba Yisakari omwiimirisi, yali Palitieli omusyaa wa Asaani 27Haandi ohutula mu nono y'abaana b'Aseri omwiimirisi, yali Ahihudi omwaana wa Selomi. 28Ohutula mu nono y'abaana ba Nafutaali omwiimirisi, yali Pedaheeli omwaana wa Amihuudi. 29Mani bano nibo abasaacha ba Omwaami yalagira ohuba neende obunyala ohukabaniamo obusiha bw'eloba ly'abaandu ba Yisiraeli mu syaalo sya Kanani.
©Bible Society of Kenya, 2019
©Bible Society of Uganda, 2019