Ohubala 25
25
Abaandu ba Yisiraeli nibali Peyori
1Abaisiraeli nibali nibateere ekaambi yaabwe mu hoondo y'Akasia, abasaacha bachaaka ohuyirana neende abahasi ba Moabbu abali ebweene eyo. 2Abahasi bano babalangaanga hu bidyaalo by'ebiyaanwa, yi nasaae w'Abamoabbu yenamirwaanga. Abaisiraeli balichaanga ebyohulya haandi beenamira neende nasaae mweene oyo 3Bbaali wa Peyori. Omwaami yabanyoolerera 4yaboolera Musa ati, “Bukula abeemirisi boosi aba Yisiraeli mani, nimuunjisiremo oluyaali, mubeete esideete ng'alang'ala, mani ao bulaanu ese haba siimba niinjia ohwemeeda ninyoolereere abaandu bano.” 5Musa yaboolera abahoongo abo ati, “Buli otula hweeng'we achia ohwitaanga buli musaacha oli mu nono yae oweehola omwiinamiri wa Bbaali wa Peyori.”
6Mulala hu Baisiraeli yabukula omuhasi Omumidia yamwiingisa mu yeema lyae mu moni wa Musa neende abaandu boosi, nibali ohuliriraanga aambi neende omulyaango kw'Eyeema ly'Ohubaao hw'Omwaami. 7Finehaasi, omwaana wa Eliasaari haandi omwiichuhulu wa Arooni omulaamisi, yabona sino, yasiingira mani yaatula mu muhung'aano. Yabukula efumo, 8mani yaloonda hu musaacha oyo, neende omuhasi oyo, mu yeema mani naabisa efumo elyo mu baandu abo boombi. Mu ngira yino yiti, oluumbe lwali niluli ohusihirisa Yisiraeli lwaakama, 9nae lwali nilumalire ohwiita abaandu elifu amahumi kabiri neende chine, (24,000).
10Omwaami yeecha yaboolera Musa ati, 11Hulw'esiholwa si Finehaasi aholere, sisisiiri omunyoolefu neende abaandu ba Yisiraeli. Ahayiire elalira ohwesimiirisira ohwiinamira nasaae wuundi ohutusaho ese, mani sakira haba simbasihiriise neende etima lyaange. 12Sakira omuboolere oti, ndi ohuhola nae endagaano eyichia ohubaao endaalo choosi echiicha. 13Omweene oyo neende abeechuhulu bae bamalire ohwiihaswa koti abalaamisi b'olubeerera, olwohuba haba siyesimirisiire owundekeraaniaho, yaleetao obuleheri hulw'esyonoono sy'abaandu.
14Eliita ly'Omuisiraeli weetwa neende omuhasi Mumidia lyali “Simuri” omwaana wa Salu, omwiimirisi w'edaala liindi mu nono ya Simeoni. 15Eliita ly'omuhasi lyali “Kosibbi.” Suuri, laatang'ene, yali omwaami w'omukaanda kuundi okw'enono kw'Abamidia.
16Omwaami yaalagira Musa ati, 17Seeta Abamidia mani obasihirise, 18hulw'esyonoono si bahuholera nibahubachirisa nimuli Peyori, neende olwa Kosibbi, oweeterwa mu siha sy'oluumbe lwali Peyori.
©Bible Society of Kenya, 2019
©Bible Society of Uganda, 2019