Ohubala 24
24
1Ohwoola esiha sino Bbalamu bulaanu yali n'amalire ohumanya ati Omwaami yali n'amudahiise ohuberesa ehabi abaandu ba Yisiraeli, haba siyakobolayo ohuchia ohukoonyeresa obulolero daawe, koti lu yaholaanga hale. Yakaluuhana yatingaala ena siparara 2yabonera elalira abaandu ba Yisiraeli nibamenyere nibakabuhaaneengemo emikaanda-emikaanda ohweema hu buli nono. Mwooyo wa Nasaae bulaanu yamuniina, 3yatuumbula obunabbi buno buti:
“Emboosi cha Bbalamu omwaana wa Bbeyore,
Emboosi ch'omusaacha onyala ohubona bulai muno,
4Oyo onyala ohuwulira bi Nasaae alomaloma.
Neende emoni chihang'aasire mbona mayuula
Ohuboneherwa hutula eyri Nasaae w'Obunyala.
5Amayeema ka Yisiraeli nga manyirifu,
6Koti enyiriri endeeyi ch'eminaasi
Oba koti endalo chohuugenya ly'omwaalo,
Koti amakaha ka Omwaami yataaka
Oba koti emiseengese kiri huundulo w'amaachi.
7Bachia ohunyoola efula embitiirifu
Mani bataake emwo yaabwe mu mikuunda kirimo omunyiti kumala.
Omutuki waabwe achia ohuba omuhunuufu ohuhiraho neende Agaga,
Haandi obutuki bwae buchia ohubaambaliyisibwa mubuleeyi neende mu bubaambali.
8Nasaae niye owabatusa mu Misiri;
Abalwaanira koti eng'oombe ndaawu ndalu.
Beenyinya abasuku baabwe,
Baata amakuumba kaabwe, nibahalaka-halaka obuyiingo bwaabwe.
9 #
Huc 49:9;
Huc 12:3. Esyaalo esiri koti edalang'i nwaani;
Niyiri ohukona abulao oyo yeesi onyala ohwenyiira ohuyisiingisa.
Oyo yeesi oberesa Yisiraeli ehabi yesi aba achia ohunyoola ehabi,
Nae oyo yeesi obwaaba Yisiraiei yesi aba achia ohubwaabwa.”
10Bbalaki yafuumba ebikoonde neende etima mani yaboolera Bbalamu ati, “Ese hulaangire ohwiicha ohubwaaba abasuku baange, nae ewe bulaanu kano mahabi kadatu amalaamba n'obaberesaanga sa ehabi. 11Mani bulaanu siingira oweeo ochie engo wao! Ndali nisuubiise ohuhutuula, nae hane mbao Omwaami ahuhaire ohunyoola omutuulu okwo.”
12Nae Bbalamu yakobolamo ati, “Ese naange ndali nindaboolera bawamwaanda ba waandumira endi 13kata neende niwahabeere noochia ohuumba efeesa yoosi neende esaabbu yoosi eyiri mu dooho lyao, kata sindahanyalire ohulekeeresa esilagiro sy'Omwaami ndaahola esiindu syoosi esyaange. Njia ohuboola ebyo byoong'ene bi Omwaami yamboolera ohuboola.”
Obunabbi buundi bwa Bbalamu bumaliirihayo
14Bbalamu yaboolera Bbaraki ati, Ese bulaanu mbano ngobola engo eyiri abaandu baange, nae nitawaao, ndi ohuhulabula ebiindu bi, abaandu ba Yisiraeli bachia ohuhola abaandu bao mu ndaalo chiicha. 15Bulaanu yatuumbula obunabbi buloondaho buno buti:
“Emboosi cha Bbalamu omwaana wa Bbeyori,
Emboosi ch'omusaacha onyala ohubona bulai,
16Oyo onyala ohuwulira bi Nasaae alomaloma
Haandi yakaanira amakesi katula eyiri oyo owa Aakulu Muno.
Neende emoni hang'aase, mbona mayuula
Ohuboneherwa hutula eyiri Nasaae w'Obunyala.
17Ndewuunja mu biha biicha,
Mani ndaabona esyaalo sya Yisiraeli.
Omutuki, oli koti eng'ining'ini yimesa,
ochia ohwiihala hu butuki mu syaalo esyo.
Koti efumo lyahabbyoosohe n'atulira mu Yisiraeli.
Achia ohuhuya abeemirisi ba Moabbu
Haandi aseenakire aasi abaandu boosi aba Seeti.
18Achia ohuyiingirira abasuku bae mu Edomu
Mani ahole eloba lyaabwe libe elyae,
Yisiraeli niyisichiiririra sa niyisiyiingiraanga.
19Esyaalo sya Yisiraeli sichia ohubaseenakira aasi
Mani yimale yimaliirise abahabe nibawonao.”
20Mani niyali n'asisiiri muhuboneherwa, Bbalamu yabona Abamaleki yatuumbula obunabbi buno buti:
“Amaleki syali nisiri esyaalo sihiramo byoosi amaani,
Nae muhumaliiriha sichia ohusihiririra elalira.”
21Niyali naali muhuboneherwa yabona Abakeeni, yaatuumbula obunabbi buno buti:
“Abuundu yi mwamenya ao w'omuleembe, w'omuleembe koti esiswi syateengehwa aakulu hu lwaande lw'olwaanda,
22Nae kata katyo eng'we Abakeeni muchia ohusihiriswa
Asiria nisichia ohubapeeya ohuwaao naang'we.”
23Bbalamu haandi yatuumbula obunabbi buno buti:
“Baandu siina bano abali ohwebuusira emukulu?
24Abaseeti bachia ohusyaabala ohutula mu Saipurasi;
Bachia ohuyiingira Asiria neende Ebberi,
Nae abeene abo, mu hukalulirwa, bachia ohusihirira endaalo choosi pe.”
25Bulaanu, Bbalamu niyamala atyo, yeetekeha yaakobolayo engo wae, nae Bbalaki yediirira engira yae.
©Bible Society of Kenya, 2019
©Bible Society of Uganda, 2019