Ohubala 17
17
Endabuhi y'Arooni
1Omwaami haandi yaboolera Musa ati, 2“Boolera abaandu ba Yisiraeli bahuberese esaala ehumi neende chibiri, lulala ohutulaanga hu buli mwiimirisi wa buli nono. Yandiika eliita lya buli musaacha hu lusaala lwae 3mani haandi wandiike eliita ly'Arooni hu lusaala luhiihirira Leefi. Yiba yichia ohubaao buli lusaala lulala hulwabuli mwiimirisi w'enono mulala. 4Bulaanu chia ochibukule ochiyire ochiingise mu Yeema ly'Ohubaao hwaange, mani ochite mu moni w'Esanduuku ly'Endagaano, yi mbukaananiraanga naawe. 5Mani olusaala lw'omusaacha oyo yi mba nindoolere nilwo oluchia ohusebuha. Mani mu ngira yino nimwo yi njia ohwaakamisira ohuhwekanyiirisa huhayiireo huno ohw'Abaisiraeli bano.”
6Musa yaboolera Abaisiraeli, buli mulala hu beemirisi baabwe yeechaanga naamuberesa olusaala lulala, hulwabuli enono, choosi choola ehumi neende chibiri alala, mani olusaala lw'Arooni lwosi lwateebwa alala nachio. 7Musa bulaanu yata esaala echio choosi mu Yeema, mu moni w'Esanduuku ly'Endagaano.
8 #
Abaib 9:4. Hu ludaalo lwaloondaho, Musa niyeengira mu Yeema, yabona ati, olusaala lw'Arooni, olwali niluhiihirira enono ya Leefi, nilwo olwali nilusebuuhe. Lwali nilumalire ohwaama ebimuli, ebimuli nibimalire ohumuliha, haandi nilumalire ohweengya ebyaamo by'alumoondi! 9Bulaanu Musa yabukula esaala echio choosi, mani nachiekesa Abaisiraeli boosi. Boosi mani baabona esyo esyali nisiholehaane, mani buli mwiimirisi yaabukulaanga olusaala lwae naalwekobosera. 10Omwaami bulaanu yaboolera Musa ati, “Bukula olusaala lw'Arooni olwo, olukoboseyo olute mu moni w'Esanduuku ly'Endagaano. Luhoyeere ohuliindwa lubeeo ohulabulaanga Abaisiraeli bahayuha mbwe bachia ohufwa sa ohwekanyiirisa hwaabwe nihutaakama.” 11Musa yahola sa koti lu Omwaami yalagira.
12Abaandu ba Yisiraeli baboolera Musa bati, “Ngandi mani eyo niyo enjakamo yeefwe! 13Nikali mbwe oyo yeesi osudaho aambi neende Eyeema aba achia ohufwa sa, mani efwe fweesi huli sa koti abamala ohufwa hale!”
©Bible Society of Kenya, 2019
©Bible Society of Uganda, 2019