Yosua 4
4
Amakina k'esiichuliso koombahwa
1Mani esyaalo syoosi nisyali nisimalire ohuhalakania Yorodaani, Omwaami yaboolera Yosua ati, 2“Doola abasaacha ehumi neende babiri, mulala ohutula mu buli nono, 3mani obalagire ohudoola amakina ehumi neende kabiri ohutula akatikaati wa Yorodaani, ohutula abuundu bweene yi balaamisi beemaanga. Baboolere bakiinge amakina kano bachie nako mani bakate aasi abuundu yimuchia ohuta ekaambi esiro syaleero.”
4Bulaanu Yosua yalaanga abasaacha ehumi neende babiri ba yali n'adoolere, 5yaboola ati, “Muchie mwiingire mu Yorodaani mu moni w'Esanduuku ly'Endagaano y'Omwaami Nasaae weeng'we. Buli mulala hweeng'we, ahoyere ohukiinga ekina lala hu beka, buli litula hulw'enono ya Yisiraeli. 6Amakina kano kachia ohwiichulisaanga abaandu esiindu si Omwaami aholere. Mu biha biicha, abaandu beeng'we nibahabateebeenge amahuluundu k'amakina kano yi muli, 7muba muchia ohubabooleraanga muti, amaachi ka Yorodaani kaakama ohuhulukusa Esanduuku ly'Endagaano y'Omwaami lyahalakania omwaalo kuno. Amakina kano kachia ebiha byoosi ohwiichulisaanga abaandu ba Yisiraeli hu siindu syaholehanira ano.”
8Abasaacha bano baloondakana neende elako lya Yosua elyo. Koti lu Omwaami yali n'alagiire Yosua, babukula amakina ehumi neende kabiri ohutula akatikaati wa Yorodaani, buli lala hulw'enono ndala ya Yisiraeli, baakakiinga baakayira abuundu w'ohwoombahamo ekaambi, bakatuula abweene ao. 9Yosua yesi yoombaha amakina ehumi neende kabiri akatikaati wa Yorodaani, abuundu yi balaamisi bakiingaanga Esanduuku ly'Endagaano beemaanga. (Amakina kano kasisiiri abweene ao ohwoola olwaalero.) 10Abalaamisi bano beema sa akatikaati wa Yorodaani ohwoola lu buli siindu si Omwaami yalagira Yosua ohuboolera abaandu ohuhola syeeholehera. Sino sa nisyo si Musa yesi yali niyalagira.
Abaandu baalaala muno nibahalakania omwaalo kuno. 11Mani boosi nibali niboolere hu lu koongo luundi, abalaamisi alala neende Esanduuku ly'Endagaano y'Omwaami bataangisamo mani beemirira abaandu. 12Abasaacha b'enono chia Rubbeeni neende Gaadi haandi neende esituundu sy'enono ya Manaase, nibeetekeheere ebiita, bataangirira buli muundu yeesi ohuhalakania, koti lu Musa yali n'ababoolere ohuhola. 13Mani mu hubaao hw'Omwaami, aambi abasaacha elifu amahumi kane (40,000), abali nibamalire ohwetekehera ebiita baambuha baachia boola hu syaalo sikwalaafu esiri aambi neende Yeriko. 14Esiindu si Omwaami yahola hu ludaalo olwo, syakera abaandu ba Yisiraeli baabukula Yosua ohuba omusaacha muhunuufu muno. Bamwiisamo oluyaali obulamu bwae bwoosi, koti sa lu bali nibeesa mu Musa.
15Mani Omwaami haandi yaboolera Yosua 16ohulagira abalaamisi abali nibakiingire Esanduuku ly'Endagaano ohuniina batule mu Yorodaani. 17Yosua yahola sa atyo, 18mani abalaamisi nibali hu bahoola hu genya ly'omwaalo, omwaalo kwachaaka haandi ohuhulukusa, mani kwaafuuchira aakulu w'amagenya kakwo.
19Abaandu baambuha Yorodaani hu ludaalo lw'ehumi olw'omwoosi kutaangira mani baachia boombaha ekaambi mu Giligaali, ebukwe wa Yeriko. 20Ao niwo yi Yosua yoombaha amakina ehumi neende kabiri kala akatuswa mu Yorodaani. 21Yaboolera abaandu ba Yisiraeli ati, “Mu biha biicha, abaandu beeng'we nibabateeba amahuluundu k'amakina kano, 22muba munababooleraanga ebidiira hu biha bi Yisiraeli yaambuhiramo Yorodaani hu loba lyoomu lyeene. 23Mubabooleraanga muti, Omwaami Nasaae weeng'we yabahamisira amaachi ka Yorodaani ohwoola lu mwali nimumalire ohuhalakaniamo, koti sa lu yatuhamisira Enyaanja Njahanyu. 24Mani ohweema hu siholwa sino, buli muundu yeesi oli hu syaalo achia ohumanya obuhunuufu bw'amaani k'Omwaami koti bwaaka, mani mwiise oluyaali mu Omwaami Nasaae weeng'we endaalo choosi pe.”
©Bible Society of Kenya, 2019
©Bible Society of Uganda, 2019