Ŋaha 29
29
1Bɛ yi kul saɣisiri nira, ka o kul niŋdi tipawumli, o ni ti kabisi yim ka ku lan tooi tib’ kpaŋ.
2Wuntizɔriba yi diri nam, niriba malila suhupiɛlli, amaa ninvuɣ’ biɛri yi su fukumsi, niriba fabindimi.
3Bi’ so ŋun bɔri yɛm, o tirila o ba bee o ma suhupiɛlli, amaa ŋun doli pagɔra ni bahi o buni yoli.
4Na’ so ŋun doli zaligu soli, o tiŋ’ ni mali suhudoo, amaa na’ so ŋun yu liɣiri pam ni wurim’ o tiŋa.
5Ŋunkam paɣir’ o ʒiʒiinikpee ti yaɣi nyɛla ŋun bariti o ʒiʒiinikpee maa zana.
6Ninvuɣ’ biɛri biriginsim puuni zana m-beni, amaa wuntizɔriba bɛn’ yiinila yila, ka mali suhupiɛlli.
7Wuntizɔriba mi nandaamba yɛlimaŋli ni nyɛ shɛli, ninvuɣ’ biɛri bɛn’ ka lala tɛhi’ zilima.
8Ansarisimaaniba wurindila tiŋa, amaa yɛnnim’ bɛn’ maarila niriba suhuri.
9Yɛndan’ yi tahi jɛra ʒiishee, vuri yɔbu mini ansarisi ku mali tariga.
10Ninvuɣ’ shɛb’ bɛn kuri niriba chihiri bɛn ka taali, bɛ nyɛla bɛn bɔri ni bɛ ku ninvuɣ’ shɛb’ bɛn biɛhigu tuhi.
11Jɛrigu n-yihiri suhuyiɣisili palo ni. Amaa yɛndan’ ŋun kul gbib’ li la baalim.
12Naa yi wumdi ʒiri yɛtɔɣa, o kpamba zaa yɛn nyɛla ninvuɣ’ biɛri.
13Tarim’ mini ŋun nahindi niriba zaa malila bin’ yini, Yawɛ n-nyɛ ŋun chɛ ka bɛ zaa nina ne.
14Naa yi doli zaligu soli n-kariti nandaamba saria, o nam ni zani yuui.
15Fiɛbiga mini zuɣu ni kpahibu nyɛla din tiri yɛm, amaa bɛ ni chɛ bi’ so bahi, dihirila o ma vi.
16Ninvuɣ’ biɛri yi nya yaa, biriginsim pahirimi, amaa wuntizɔriba ni nya bɛ lubu.
17Saɣisim’ a bihi, ka bɛ ti a vuhim, ka ti a suhupiɛlli.
18Anabitali yɛtɔɣa yi ka luɣ’ shɛli nimaani nim’ baɣa ka shɛl’ ni, amaa ninvuɣ’ shɛb’ bɛn doli zaligu mali suhupiɛlli.
19Bɛ bi mali noli ni yɛtɔɣa kɔŋko saɣisiri tumtumdiba, dama hal bɛ yi kul baŋ a ni yɛli shɛm, bɛ baɣa ku bɛ di ni.
20A nya ninvuɣ’ so ŋun tɔɣisiri yɛtɔɣa yomyom? Jɛrigu mali tahima gari dilana.
21Bɛ yi pooi dabili o bilim ni, di bahigu ti ku viɛla.
22Suhuyiɣisililan’ nyɛla ŋun tahiri zabili na, ka suhuyiɣisili pam tahiri biriginsim pam na.
23Nir’ karimbaani n-tahir’ o filiŋ na, amaa ŋun siɣisir’ omaŋ’ ni nya jilima.
24Ŋun zaŋ omaŋ’ tabili tayiɣa je omaŋmaŋ’ nyɛvili; o yi wumdi niriba ni yɛri zaɣ’ biɛ’ shɛli din yɛn niŋ tayiɣ’ maa, amaa ka o bi viir’ o gbini.
25Nir’ yi zɔri o taba dabiɛm, di nyɛla zana, amaa ninvuɣ’ so ŋun niŋ Yawɛ naani ni yi yɛla ni.
26Niriba pam bɔri ni naa yuri ba, amaa Yawɛ sani ka nir’ nyari din niŋ kamaata.
27Wuntizɔriba je ninvuɣ’ biɛri yɛlli, ka ninvuɣ’ biɛri gba je wuntizɔriba yɛlli.
Red Letter Dagbani Bible © Bible Society of Ghana, 2011