Kalinlinima 23
23
Balaam anabitali yɛtɔɣa din daŋ tooni
1Ka Balaam daa yɛli Balak, “Mɛm’ sara maligu bimbina ayopɔin zali ma kpe, ka bo naɣilah’ ayopɔin mini piɛlah’ ayopɔin ti ma kpe na.” 2Ka Balak daa niŋ Balaam ni yɛl’ o ni o niŋm’ shɛm maa. Ka ŋun’ Balak mini Balaam daa kɔrigi naɣila’ yino mini piɛla’ yino m-mali sara pa bimbin’ yini kam zuɣu. 3Di saha ka Balaam daa yɛli Balak, “Zanim’ a sara maligu shɛli bɛ ni zaŋdi nyɔri buɣim ŋɔ gbini, ka n yi kpaŋ ha; di pa shɛli ka Yawɛ ka n sanna. Ka o yi wuhi ma shɛlikam, n ni zaŋ li yɛl’ a.” Ka o daa chaŋ ti du n-tam kuŋkun’ nɛli zuɣu. 4Ka Naawuni daa ka Balaam sanna, ka Balaam daa yɛl’ o, “M me sara maligu bimbina ayopɔin zali, ka zaŋ naɣila’ yinoyino mini piɛla’ yinoyino m-mali sara pa di zaa zuɣu.”
5Ka Yawɛ daa yɛli Balaam, “Labimi ti zaŋ n ni yɛl’ a shɛm yɛli Balak.” 6Ka o daa lab’ o sanna nti nya ka o mini Mɔab kpamba zaa ʒila o sara maligu shɛli bɛ ni zaŋdi nyɔri buɣim maa gbini.
7Ka Balaam daa zaŋ o daanabitali yɛtɔɣa
ni nyɛ shɛli yɛli,
“Balak ŋun nyɛ Mɔab Naa la
n-zaŋ ma Siria wulimpuhili polo
zoya ni tiŋ’ la ni na
nti yɛli ma: ‘Kamina
ti yɛli yɛtɔɣ’ biɛɣu bahi
Yaakubu zuliya ŋɔ zuɣu ti ma.
Wuhim’ ni Izraɛlnim’ simdi tibidarigibo!’
8Ka wula ka n lee ni tooi
yɛli yɛtɔɣ’ biɛɣu bahi
Naawuni ni bi yɛli yɛtɔɣ’ biɛɣu
bahi ninvuɣ’ shɛb’ zuɣu?
Bee wula ka n lee ni tooi yɛli
ni Naawuni ni wuhi ni
ninvuɣ’ shɛb’ bi simdi tibidarigibo
simdi ni bɛ nya tibidarigibo?
9Dama n nyari ba zoya zuɣu,
ka nyari ba daboya zuɣu.
Bɛ nyɛla ninvuɣ’ shɛb’
bɛn be bɛ ko; ka bi tɛhi
ni bɛ mini zuliya shɛli nyɛla yim.
Bɛ wuhiya ni bɛ be bɛ ko
ka chɛ zuliya kam.
10Ŋuni n-lee ni tooi kali
Yaakubu zuliya?
Bee ŋuni n-lee ni tooi kali
Izraɛl zuliya maa pirigibu
bunahi puuni yim?
Chɛ ka n kpila wuntizɔra kum,
ka chɛ ka m bahigu ti be
kaman o bahigu!”
11Di saha ka Balak daa bɔhi Balaam, “Tuun’ bɔ ka a lee tum ma ŋɔ? N zaŋ a mi na ni a ti yɛli yɛtɔɣ’ biɛɣu bahi n dimnim’ zuɣu, nyama, ka a ti bi niŋ ba shɛli, ka naɣ’ niŋla alibarika niŋ bɛ ni?”
12Ka Balaam garigi yɛl’ o, “N di yɛli Yawɛ ni zaŋ yɛtɔɣ’ shɛli niŋ n nol’ ni.?”
Balaam anabitali yɛtɔɣa din pah’ ayi
13Ka Balak yɛl’ o, “Kamina ka ti chaŋ luɣ’ shɛli polo a ni yɛn nya ba; a ku tooi nya bɛ zaa, a kul ni nyala bɛ ni shɛb’ kɔŋko; ka a yɛli yɛtɔɣ’ biɛɣu bahi bɛ zuɣu ti ma.” 14Ka o daa zaŋ o chaŋ Zɔfim mɔɣu ni Pisiga Zoli zuɣu nti me sara maligu bimbina ayopɔin zali, ka kɔrigi naɣila’ yinoyino mini piɛla’ yinoyino m-mali sara pa di zaɣ’ yini kam zuɣu.
15Ka Balaam daa yɛli Balak, “Ʒe a sara maligu shɛli bɛ ni zaŋdi nyɔri buɣim ŋɔ gbini; ka n chaŋ Yawɛ sani kpe ha.”
16Ka Yawɛ daa ka Balaam sanna ti yɛl’ o, “Labimi Balak sani nti zaŋ n ni yɛli shɛm yɛl’ o.” 17Ka o daa lab’ o sani ti nya ka o mini Mɔab kpamba ʒiɛla o sara maligu shɛli bɛ ni zaŋdi nyɔri buɣim maa gbini. Ka Balak daa bɔh’ o, “Wula ka Yawɛ lee yɛli?” 18Di saha ka Balaam daa zaŋ o daanabitali yɛtɔɣa yɛli:
“Zipɔr bia Balak, yiɣisima.
Luɣim’ a tiba wum n ni yɛn yɛli shɛm.
19Naawuni pala ninsala
ŋun ni ŋma ʒiri.
O mi pala daadam
ŋun taɣir’ o tɛha.
O yi lo alikauli, o paani li mi.
O mi yi yɛli shɛli,
o niŋdi li mi.
20Nyama, bɛ zali ma la zaligu
ni n niŋ alibarika niŋ bɛ ni.
O pun niŋ alibarika niŋ bɛ ni,
ka n ku tooi vuui li.
21O bi nya ka zuɣubiɛɣu
be Yaakubu zuliya ni;
bee n-nya ka muɣisigu
shɛli be Izraɛlnim’ sani.
Yawɛ ŋun nyɛ bɛ Naawuni
maa be bɛ sani.
Ka bɛ yɛri ni ŋuna n-nyɛ
bɛ naa m-be bɛ sani.
22Naawuni ŋun daa yihi ba
Ijipti na maa ŋmanila
yɔnaɣ’ yilli bɛ sani.
23Dama sɔtim ku tooi
gbaai Yaakubu zuliya,
ka so mi ku tooi
wa Izraɛlnim’ bukpahigu.
Niriba ni ti tɔɣisi Yaakubu
mini Izraɛlnim’ yɛla ka yɛli,
‘Nyamiya Naawuni ni tum shɛm!’
24Nyama, niriba maa yiɣisirimi
kaman gbuɣin’ nyaŋ la,
ka bɛ ni nyamdi
kaman gbuɣindaa la.
O bi doona ka pa ni o ŋubila
o ni gbaai binshɛɣu, ka nyu
o ni ku binshɛɣu maa ʒim.”
25Di saha ka Balak daa yɛli Balaam, “A yi ku yɛli yɛtɔɣ’ biɛɣu bahi bɛ zuɣu hal baabiɛla, nyin’ di niŋ alibarika gba niŋ bɛ ni hal baabiɛla.” 26Amaa ka Balaam daa yɛli Balak, “M pun bi yɛl’ a ni Yawɛ ni yɛli ma shɛm ka n yɛn niŋ?”
Balaam anabitali yɛtɔɣa din pah’ ata
27Ka Balak daa yɛli Balaam, “Kamina pumpɔŋɔ, ka n zaŋ a chaŋ luɣ’ shɛli polo, di pa shɛli ka Naawuni ti chɛ ka a yɛli yɛtɔɣ’ biɛɣu bahi bɛ zuɣu nimaani ti ma.” 28Ka Balak daa zaŋ Balaam ti du n-tam Pɛɔr Zoli zuɣu luɣ’ shɛli nir’ ni ni tooi zani ka lihi nya bɔpiɛligu maa ni viɛnyɛliŋga. 29Ka Balaam daa yɛli Balak, “Mɛm’ sara maligu bimbina ayopɔin zali ma kpe, ka bo naɣilah’ ayopɔin mini piɛlah’ ayopɔin ti ma.” 30Ka Balak daa niŋ Balaam ni yɛl’ o shɛm maa n-zaŋ naɣila’ yinoyino mini piɛla’ yinoyino mali sara pa bimbini kam zuɣu.
Red Letter Dagbani Bible © Bible Society of Ghana, 2011