Matayo 28
28
Erĩlũbũka lya Yesu
(Mk 16.1-10; Lk 24.1-12; Yn 20.1-10)
1Neryo enyũma wʼekiro kyʼeSabato, ekiro kyʼerĩtsũka eyenga kyabere kyasonda erikya, Marĩa Magdalene nʼogundi Marĩa mobayalebya eyisinda. 2Neryo lebaya, mohabya omũsĩkĩ munene. Kusangwa omũlaĩka wʼomukama mwandagala akalũa elubula, mwahĩkaho mwakũmbagalya erĩbwe eryo mwĩkala kulyo. 3Erisosa liwe lyabya ngʼerĩpalya lyʼobũtũkũ, nʼesyongimba siwe syabya nyeru-nyeru ngʼenzururu. 4Abateya mobatitimana busana nʼerimubaha, neryo mobabya ngʼabandu baholĩre.
5Neryo omũlaĩka mwabũga nʼabakalĩ ati, Simubahe, kusangwa nyĩnasĩ ko mukasonda-sonda Yesu oyo wabambawa oko musalaba. 6Siali hano, abĩrĩlũbũka ngoko abũga! Mwase, mũlebaye aho Mukama alũe agotsere. 7Mugende lũba, mubwire abiga buwe kwʼabĩrĩlũbũka oko baholĩ, kandi lebaya, akabatanga eGalĩlaya. Eyo yo mwasyamulolerako. Lebaya, nabiribabwira. 8Neryo mobalũa okwʼisinda ko lũba nʼeriubaha nʼobutseme bunene, mobatibita eriyabwira abiga ba Yesu.
9Neryo lebaya, Yesu mwahĩndana nabo ati, Mwabũkĩre! Neryo mobamũhĩkako, mobahamba ebisando biwe, mobamũramya. 10Neryo Yesu mwabwirabo ati, Simubahe; mugende muyabwire abagala betu baye eGalĩlaya, eyo yo basyanyilolerako.
Abateya bakatũlago
11Neryo abakalĩ babere bakagenda, lebaya, abandi bʼoko bateya mobagenda oko mũyĩ, mobayabwira abahererĩ bakulu ebyosĩ ebyabere. 12Neryo babere babĩhĩndana nʼabakulu bʼAbayũda nʼerihanana haguma, mobaha abasĩrĩkanĩ bʼesyofranka nene, 13bati, Mũbũge muti, Abiga buwe mobakahĩka omo kiro nʼerĩmwĩba omugulu tũlweto. 14Kandi omũtabalĩ amowa omwatsi oyũ, twasyamwowĩsya, ĩtwababalya omwaga. 15Neryo abateya abo mobĩmya esyofranka esyo, mobakola ngoko babwirawa. Engulu eyĩ moyatsungana omo katĩkati kʼAbayũda erĩhĩka mũnabwĩre.
Yesu akabutukira abiga buwe
(Mk 16.14-18; Lk 24.36-49; Yn 20.19-23; Emĩb 1.6-8)
16Neryo abiga erĩkũmĩ nʼomuguma mobaya oko kitwa kyʼeGalĩlaya aho Yesu ahula. 17Neryo babere balola uku Yesu mobamũramya, nĩkwa abandi mobatikatika. 18Neryo Yesu mwasa mwabũga nabo ati, Ehamũlĩ yosĩ nabirihabwayo omo lubula nʼomo kihugo. 19Neryo mugende, muyire abiga oko bihanda byosĩ; mũbatĩsayebo omo lĩna lyʼĨse, nʼeryʼOmugala, nʼeryʼOmũlĩmũ Abũyĩrĩre. 20Mũkangĩrĩrayebo bakole ebyosĩ ebyo nabiribahana. Kandi mwibuke! Ingye ko ndi haguma nenyũ ebiro byosĩ erĩhĩka okwʼihwererera lyʼemigulu.
اکنون انتخاب شده:
Matayo 28: KB80
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bible in Kinandi © Bible Society of the Democratic Republic of Congo, and Bible Society of Uganda, 1980.