Matayo 24
24
Yesu akahula erihera lyʼeHekalũ
(Mk 13.1-2; Lk 21.5-6)
1Neryo Yesu mwalũa omo Hekalũ, nĩkwa abere anemugenda, abiga buwe mobahĩka erĩmũkangya emĩhĩmbĩre yʼeHekalũ. 2Yesu mwasũbĩryabo mwabwirabo ati, Simwetalangira ebindu byosĩ ebĩ kwehĩ? Kwenene ngabũga nenyũ, hano sihendisyasĩgala erĩbwe nʼeriguma endata oko lindi, eritendisyasambulirwa ahisi.
Amalĩge nʼeryendererya
(Mk 13.3-13; Lk 21.7-19)
3Neryo Yesu abere anĩkere oko kitwa kyʼeMĩzeĩtũnĩ, abiga mobamũhĩkako ahate bandu bati, Utubwire emyatsi eyĩ nga yasyabya oko mugulu wahi, kandi ekiminyikalo kyʼerĩhĩka lyawe nga ni kyahi, nʼerihwererera lyʼemigulu eyĩ ni kiro kyahi kwehĩ?
4Neryo Yesu mwasũbĩryabo ati, Simuleke mundu akabatalya. 5Kusangwa abangi basyasa omo lĩna lyage bati, Ĩngye indi Kristo, kandi basyatalya bandu bangi. 6Mwasyowa engulu yʼamalwa nʼolombĩ lwʼamalwa; mũlebaye, simubahe. Emyatsi eyĩ itolere ĩyahĩka, nĩkwa endũlĩ isiriyaberwa. 7Kusangwa ekihanda kyasyalwa nʼekindi kihanda, nʼobwami bwasyalwa nʼobundi bwami, kandi hasyabya esyonzala ehandi nʼehandi, nʼemĩsĩkĩ ehandi nʼehandi. 8Nĩkwa emyatsi yosĩ eyĩ iri ngʼerĩtsũka lyʼerikunda lyʼomukule.
9Neryo basyabahotera, nʼerĩbahĩra omo malĩge, kandi basyabĩta. Ebihanda byosĩ byasyabakwa obusu busana nʼerĩna lyage. 10Oko mugulu oyo, abandu bangi basyaleka erĩkĩrĩrya lyabo, kandi basyahoterana nʼerĩkwana obusu. 11Kandi abamĩnyererĩ bʼamabehĩ basyahangana nʼerĩtalya abangi. 12Kandi kusangwa ebibi byasyakanya, olwanzo lwʼabangi lwasyaholoka. 13Nĩkwa omundu oyo wasyayĩyĩnĩa erĩhĩka oko ndũlĩ yo wasyalamĩbwa. 14Kandi Engulu Yowene yʼobwami eyĩ yasyatsũka erĩtũlaganĩbwa omo kihugo kyosĩ busana nʼerĩmĩnyĩsya ebihanda byosĩ, neryo endũlĩ yasyahĩka.
15Neryo omugulu mwasyalangira ekĩkalĩre kyʼerĩherya ekyahulawa nʼomũmĩnyererĩ Danĩelĩ, ikihangene ahabũyĩrĩre; oyukasoma aminye ndeke! 16Neryo abali eYũdea basagire oko bitwa. 17Omundu oyuli endata oko nyũmba, syakime ati, akenda ebindu ebiri omo nyũmba yiwe. 18Nʼomundu oyuli omwʼirima syasubire olukimba luwe. 19Nĩkwa obũlĩge oko bakule, nʼoko bakalĩ abakaha abana babo bʼamabere oko biro ebyo! 20Nĩkwa musabe Nyamuhanga muti erisaga lyenyũ siribye oko mugulu wʼeritsuku, kutse oko kiro kyʼeSabato. 21Kusangwa oko biro ebyo hasyabya obũlĩge bunene isibwebwatabya okwʼĩtsũka lyʼekihugo, erĩhĩka na lino, kutse sibwendisyaswabya butya na kera. 22Nĩkwa kumbe Nyamuhanga atalĩkũhĩhaya ebiro ebyo, sihali mundu wangalamĩbwe. Nĩkwa abĩrĩkũhĩhyabyo busana nʼabayisogawa buwe.
23Neryo omundu amababwira ati, Lebaya, hano ho Kristo ali! Kutse ati, Yolya halya, Sĩmũlĩge. 24Kusangwa abakristo bʼamabehĩ nʼabamĩnyererĩ bʼamabehĩ basyahuluka basyakangya ebĩmĩnyĩsyo nʼebyʼeriswekera, busana nʼerĩtalya abayisogawa ba Nyamuhanga, kyamatokekana. 25Mũlebaye, nabiribabwira emyatsi yosĩ erĩmbere.
26Neryo bamababwira bati, Lebaya, ali omo mbwarara, simuyeyo. Kutse bati, Lebaya, ali omo bisenge, Sĩmũlĩge. 27Kusangwa Omugala wʼomundu asyasa ngʼakarabyo akakakoleraya kakalũa eyo eryuba likahuluka nʼerĩkangabasanĩa, nʼerĩhĩka eyo eryuba likalengera.
28Ahali ekĩnda, ho amahungu asyahĩndana.
Erĩhĩka lyʼomugala wʼomundu
(Mk 13.24-27; Lk 21.25-28)
29Nĩkwa neryo-neryo enyũma wʼobũlĩge bwʼebiro ebyo, eryuba lyasyabya mwĩrĩmya, nʼomukera siendisyaswakola, nʼesyongũnũnũ syasyatogonga erĩlũa omo kyanya, nʼebyʼamaka byʼomo kyanya byasyatenga-tenganĩbwa. 30Neryo ekiminyikalo kyʼomugala wʼomundu kyasyahuluka omo kyanya; neryo ebihanda byosĩ byʼomo kihugo byasyasũsũmana, kandi byasyalangira Omugala wʼomundu akasa oko bĩtũ byʼekyanya nʼobũtokĩ bunene nʼolukengerwa lunene. 31Neryo Yesu asyatuma abamalaĩka buwe nʼomulenge munene wʼengubi, nabo basyahĩndanĩa abayisogawa ba Nyamuhanga erĩlũa oko bihande bini byʼekihugo, erĩtsũka oko ndũlĩ nguma yʼekyanya erĩhĩka oko yindi ndũlĩ yʼekyanya.
Omũsyo wʼomuti wʼomũtĩnĩ
(Mk 13.28-31; Lk 21.29-33)
32Lino mwige omũsyo wʼomuti wʼomũtĩnĩ. Omugulu akatohaya emitahi yago, ikabya myolo-myolo, neryo akalasaya ebikoma byago, Ukaminya ngoko mugulu wʼomwisi ali hakũhĩ. 33Litya nenyũ nibya, omugulu mukalangira emyatsi eyĩ ĩkahĩka, muminye omugulu kwʼali hakũhĩ, oko lũkyo. 34Kwenene ngabũga nenyũ, olulengo olũ sĩlwendĩsyalũaho emyatsi eyĩ ite yabererera. 35Ekyanya nʼekihugo byasyahwaho, nĩkwa ebĩnywa byage sibyendisyahwaho.
Sihali mundu oyo wasĩ ekiro kutse endambĩ
(Mk 13.32-37; Lk 17.26-30,34-36)
36Nĩkwa sihali mundu oyo wasĩ erĩhĩka lyʼekiro ekyo, kutse esaa eyo, nomo bangabya bamalaĩka bʼelubula, kutse Omugala, nĩkwa Tata yũnasĩ, ĩyowene. 37Kusangwa erĩhĩka lyʼomugala wʼomundu lyasyabya ngʼomwatsi wʼebiro bya Noa. 38Kusangwa ngʼomo biro ebyo embere wʼerigunga lyʼamagetsi, mobabya bakalya nʼerĩpũlya, mobabya bakahĩkya nʼerĩherũkanĩa, erĩhĩka oko kiro ekyo Noa ingira omo bwato. 39Mobataminya ekyabya erĩhĩka aho erigunga lyʼamagetsi lyasira nʼeritwala bosĩ. Erĩhĩka lyʼomugala wʼomundu ko likandisyabya litya. 40Oko mugulu oyo, abalume babiri basyabya omwʼirima; omuguma asyatwalwa, nʼomuguma asyasĩganĩbwa. 41Abakalĩ babiri basyabya bakaswa oko luso, omuguma asyatwalwa, nʼomuguma asyasĩganĩbwa. 42Neryo mũtegaye! Kusangwa sĩmwasĩ ekiro kyahi Omukama wenyũ asyasa. 43Nĩkwa muminye ekĩ kyo ndeke, Omwenye nyũmba alibya asĩ esaa omũrahĩ asonda erĩhĩka, nga mwateya ĩsĩangalekĩre enyũmba yiwe ikatulwa. 44Busana nʼomwatsi oyũ mubye ĩmũnasĩkĩre, kusangwa Omugala wʼomundu asyasa oko ndambĩ mũtalengekenĩe.
Omugombe oyuteregula nʼoyukalegula
(Lk 12.41-48)
45Omugombe oyuteregula nʼowʼamenge nindi kwehĩ? Yo nʼoyo mukama wuwe asĩgĩra bagombe bʼenyũmba yiwe erĩteya nʼerihabo akalyo kabo oko mugulu atolere. 46Obutseme buli oko mugombe oyo mukama wuwe akamwegaya akakola atya omugulu omukama oyo akahĩka eka. 47Kwenene ngababwira nyiti omukama oyo asyamuyira mo mũteya wʼebindu biwe byosĩ. 48Nĩkwa omugombe mubi oyo amayibwira omo mutima wuwe ati, Mukama wage siendisyasa lũba, 49ĩnĩatsũka erĩswĩrya abagombe balĩkyabo, nʼerirya, nʼerĩpũlya haguma nʼabakũndĩrya. 50Neryo omukama wʼomugombe oyo asyasa ekiro atemulindirira, nʼoko ndambĩ atasĩ. 51Omukama oyo asyamũtsũtsanga mo bitswe-bitswe, nʼerimuha omwanya haguma nʼabatebya. Hasyabya eririra eyo nʼerikeregeta ameno.
اکنون انتخاب شده:
Matayo 24: KB80
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bible in Kinandi © Bible Society of the Democratic Republic of Congo, and Bible Society of Uganda, 1980.