Matayo 17
17
Yesu akakanaya na Musa na Elĩa oko kitwa aho ahĩndũkĩrĩbawa
(Mk 9.2-13; Lk 9.28-36)
1Nʼenyũma wʼebiro ndatu, Yesu mwatwala Petero na Yakobo, na Yoane mugala wabo Yakobo. Neryo mwatwalabo ĩbobene oko kitwa kiri-kiri. 2Neryo Yesu mwahĩndũkĩbwa embere syabo, nʼobũsũ buwe mobwakangabasanĩa ngʼeryuba, nʼesyongimba siwe mosyabya nyeru-nyeru ngʼekyakakala. 3Neryo lebaya, Musa na Elĩa mobabutukira kubo ĩbakakanaya na Yesu. 4Neryo Petero mwasũbĩrya mwabũga na Yesu ati, Mukama, lyowene busana netu eribya hano; wamanza, ngandĩhĩmba hano hʼamahema asatu, enguma busana nawe, nʼenguma busana na Musa, nʼenguma busana na Elĩa. 5Abere akĩnabũga, ekĩtũ ekĩkangabasenĩe mokyasũkũlĩryabo; neryo, omulenge mwalũa omo kĩtũ ati, Oyũ ni Mugala wage mwanze, namamutsemera ndeke; mũmwowe! 6Omugulu abiga bowa ekĩ, mobawa ahisi mobubaha kutsibu. 7Neryo Yesu mwasa mwatũla kubo ati, Muhangane, simubahe. 8Nabo babere basumba ameso wabo, mobatalangira ho mundu, inina Yesu ĩyowene.
9Neryo babere bakandagala oko kitwa, Yesu mwaganĩabo ati, Simubwire mundu ebyo mwamalolako omo bũlĩme, erĩhĩka aho Omugala wʼomundu asyalũbũkĩra erĩlũa oko baholĩ. 10Kandi abiga ba Yesu mobamũbũlya bati, Busana nakĩ abakangĩrĩrya bʼEmigambo bakabũga bati Elĩa atolere ĩnĩatsũka erĩhĩka, kwehĩ? 11Yesu mwasũbĩryabo ati, Elĩa akandisyasa, ĩnĩasũbya emyatsi yosĩ. 12Nĩkwa ngababwira nyiti, Elĩa abĩrĩhĩka, nabo sibetamuminyerera, nĩkwa mobamukola ngoko banzĩre. Litya Omugala wʼomundu asyagalwa omo byala byabo. 13Neryo abiga mobaminya kwʼakanaya nabo busana na Yoane Mũbatĩsya.
Yesu akalamaya omũlwana oyuli kwʼembĩnga
(Mk 9.14-29; Lk 9.37-43a)
14Kandi omugulu bahĩka oko ndeko, omundu mwahĩka uku Yesu, mwamũkũkamira ati, 15Omukama, Uganyire mugala wage; kusangwa nĩ mũtũtsa, kandi alwere kutsibu; kusangwa ngendo nyingi akawa omo lĩko, nʼengendo nyingi omo magetsi. 16Kandi monamuletere abiga bawe, nabo mobatalũkĩre erĩmũlamya. 17Yesu mwasũbĩryabo ati, ĩnywe lulengo lwʼerĩtendĩkirĩrya nʼolʼobuhaka! Nasĩkala nenyũ omo mugulu ungahi kwehĩ? Nasyababegerya omugulu ungahi kwehĩ? Munyiretere ye hano. 18Neryo Yesu mwakunga embĩnga, neryo moyamũlũako, nʼomũlwana oyo mwalamĩbwa neryoneryo.
19Neryo abiga mobahĩka uku Yesu ahate bandu bati, Busana nakĩ twataluka erihigira embĩnga eyo yʼeyĩhya kwehĩ? 20Yesu mwasũbĩryabo ati, Ni busana nʼerĩkĩrĩrya lyenyũ lĩke. Kusangwa kwenene ngababwira nyiti, Mwamabya nʼerĩkĩrĩrya ngʼembuto yʼeharadalĩ, mwasyabwira ekitwa ekĩ muti, ũhũmĩre erya, nakyo kyasyahũma; kandi sihali kindu kyasyabalema. [ 21Nĩkwa omuhanda oyũ sialĩlũamo lite erisaba nʼeritsira kalyo.]
Yesu akaswahula omwatsi wʼoluholo luwe
(Mk 9.30-32; Lk 9.43b-45)
22Omugulu babya bakalendera haguma eGalĩlaya, neryo Yesu mwabwira abiga ati, Omugala wʼomundu akandisyahoterwa oko bandu, 23abakandĩsyamwĩta, kandi asyalũbũkĩbwa enyũma wʼebiro bisatu. Neryo mobakwa bũlĩge bo kutsibu.
Epalata yʼeHekalũ
24Kandi babere bahĩka eKapernaũmũ, abasolesya bʼepalata yʼeHekalũ mobahĩka uku Petero, bati, Omũkangĩrĩrya wenyũ sialisola epalata yʼeHekalũ kwehĩ? 25Petero ati, Ega. Neryo abere ahĩka omo nyũmba, Yesu mwatsũka erĩmũbũlya ati, Sĩmonĩ, Ũkaganĩraya ũtĩkĩ kwehĩ? Nindi yukasola kutse eririha engemu oko bami bʼekihugo kwehĩ? Ni bana babo, kutse ba bagenĩ kwehĩ? 26Petero mwamũsũbĩrya ati, Nĩ bagenĩ. Neryo Yesu mwamubwira ati, Neryo abana siberiha. 27Nĩkwa tũkasyagalyabo, ugende oko ngetsi, Uguse oburobo, wĩmaye erĩhere erĩkatsũka erihuluka, neryo wamabĩkũmbũla obuno bwalyo, ũkandĩeya mwʼekĩtsĩpa, wĩmayekyo utusolere, tũnawe.
اکنون انتخاب شده:
Matayo 17: KB80
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bible in Kinandi © Bible Society of the Democratic Republic of Congo, and Bible Society of Uganda, 1980.