Bilangan 12
12
Hwe Miryam Allah en yebil hwena’go ’gela’ge onogorlok a’ge ebam pesi wene
1Pageat Musa ugwe o Kus a’ge wesi ano pam en e, at Miryam Harun emin en Musa obok wiagat ’balogulat e, disogo egesa,
2“Allah en wene Musa mo’gulosoam en nak aphwami mo’gulentasu laga no? Nis mo’gulnentesimu ogo mo’gulentigeat epegi,” oluk egesema, at nenaik ’gain Onuk Logo a’ge en wene egesa a’ge ai esa’go hwelegei. 3At Musa ai ebabut e, aphwami ’gwiangma yema welagai a’ge ’berlegat enemin hegit e, erlak o. Is logon enebabut logo ’gela’ge a’geat de, at ebabut nak e, sebelak ’gela’ge welaga o.
4Asogo oruakma erianoat, at nenaik ’gain Onuk Logo a’ge en Musa emin, Harun emin, Miryam emin, disogo mo’gulentesi,
“His henebe henaganakho at an nowi sum owi werikmu manis o,” oluk mo’gulentesimu legesa. 5Legesema, at nenaik ’gain Onuk Logo a’ge ebe o hena edik a’ge ano ogola en ’bu aga. Asogo ’bu agarik e, o at owi sum a’ge werikmu ebano ’goduk pam edik welat, Harun Miryam emin worlentesimu, inegesarik e, e’bek legesema, 6disogo mo’gulentesi,
“An en wene mo’gulhentaik a’ge yu henesa’go hwelit o. Ap his a’ge en an niak mo’gulontogwi a’ge oruakma, an henaik ’gain Nonuk Logo a’ge nebe enabi pam onorogolema inagalat, wene enabi pam mo’gulentasulat, taga legi o.
7Asogo a’geat de, an neragam a’ge Musa nak e, an neiyagai ’berlegat ene’gerlakma welat ebabut modok he’berik ai en e, asogo mo’guloso erlak o.#Ibr. 3:2
8We, at Musa ai emin nene’berli yet-yet ogulat, wene hisakho u erlakma en, ’baksogo mo’gulosokhwe il niasu o. His en honogorlok erlaksogo wene an neragam a’ge Musa ai ebam pogu legep ai nopaget,” oluk wene yagentesi.
9Yagentasulat olot modok het agarik e, ’bok lasukhwe, 10o hena sum owi werik welagama ano laga. Lasukhwe, erianoat at hwe Miryam ebetne yebil hwena’go ’gela’ge modok onogorlok a’ge dukhesirik agap modok ’gut aga. At agap asogo ’gut agama at ue Harun en yethesi ’gal e, 11at Musa disogo mo’gulesi,
“Eige, nue, nis nenede erlak ’gela’ge wiak tigema re, modok wiak a’ge yu nenebam pagun no yo. 12At hwe yu malik werak dagagokhwe ’gela’ge abel pema akhit mu’gap pagun no yo,” oluk mo’gulesi.
13Asogo mo’gulesimu at Musa en iak loksogo nenaik ’gain Onuk Logo a’ge disogo mo’gulesi,
“Naik Allah o. Hwe yu obap pemen o!” oluk mo’gulesimu,
14nenaik ’gain Onuk Logo a’ge en disogo mo’gulesi,
“At aik en was orogole pam topuksogo pelep a’ge en e, at e’gerli en agauwa sabiren wellep o. Holuk e, o sum owi werikmu yema at leget o’borl akhit agauwa sabiren welemarik en togolik woluk ’gumak o,” oluk mo’gulesimu,#Bil. 5:2-3
15asogoat hwe Miryam sum owi werikmu agauwa sabiren leget o’borl akhit oruakhwe is aphwami Israel a’ge ebano ebela lo erlakma en mo egesa. Pobuk ebe togolik woluk ’gu egesema nak
16is o Hazerot ukpoluk o leimu aphwami erlakma onuk Paran legesarik onowi sum owi werigisa.
Actualmente seleccionado:
Bilangan 12: Wul
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión