Bilangan 11
11
O Tabera eba en tigisa wene
1Agauwa mesik erlige re, aphwami Israel a’ge modok enebe wiagat welat e,
“Degenikmu yema nenebit o,” oluk nenaik ’gain Onuk Logo a’ge mo’guligisa. Asogo mo’gulegisema esa’go hwelegeirik e, olot het a’bik agarik, odouk enebam ’belakpou waga. Asogo ’belakpou wagama re, ene’gerlakma en magale lobuk-lebaksogo nasulat, is onowi sum owi werik a’ge ebano esa’go’gwe ’berlek ne’gei. 2Asogo ne’geimu is aphwami ebano en,
“Musa, delnenebin o,” oluk eniak ngai-wai ogulat onuk ’baligisa. Asogo mo’gulegisema, at Musa en se’ban pam nenaik ’gain Onuk Logo a’ge ’gonu mo’gulesimu, owi nasu laga a’ge ebano nekhi egei.
3O eba en, nenaik ’gain Onuk Logo a’ge ogodouk is ene’gerlakma en lobuk-lebaksogo ne’gei ai en, o ebano onuk Tabera tualigisa ai o.
Musa en aphwami Israel onuelak ’gain welemagoluk enebe 70 en pulogo edigenebesi wene
4Aphwami Israel a’ge wegesa ai, aphwami ap ’bok a’ge enemin wegesayat o. Is ap ’bok a’ge ebano wam nele modok agama re, is aphwami Israel a’ge enemin en,
“Eige, nis wam mesik nolo e. Nenebit e,” oluk ogulat e, disogo egesa,
5“Nis o Mesir welat e, hiane o’go ’belak erlak weat no’gulat e, ’gorluk emin, semangka e’gen emin, bawang ’gela’ge onuk prei emin, bawang merah a’ge emin, bawang putih a’ge emin, no’gu lege a’ge ebano nenede ebet ago yo. 6Yogodak e, so’boru di a’ge yu a’ge logon no erlak, we, manna nak no’gu lege ai en nenanni modok erlak ago yo, nenebit e,” oluk ogu legesa.
7 #
Kel. 16:13-15,31 So’boru manna ai ebe re, e e’gen wei a’ge ai ’gela’ge a’ge re, orogole re, momi a’ge we weiyat weik iltak ’gela’ge. 8-9So’boru manna ai ’bu agalat e, hup o moru lil emin aphwami Israel a’ge onowi sum owi werikmu eba ’bu aga laga. Asogo ’bu agoam e, aphwami Israel a’ge enebe lak-wak ogulat odoksogo re, sagalogo ul ’gela’ge onuk tepung ’gela’ge takpoluk kue duk a’ge de, ebak a’ge werarogu legesa. Oduk e, kue minyak e zaitun e’gen a’bosu pam werarogwi a’ge ’gela’ge.
10Aphwami Israel a’ge ebano onowi sum owi werikmu ebano o ’goduk o’gwe dalogol-yalogol edik welat e,
“Degenikmu yema nenebit e,” oluk Allah onogola en mi-miarak pogumu re, Musa esa’go hwelegei. Asogo hwelegeimu, at nenaik ’gain Onuk Logo a’ge ano olot modok het egeimu re, at Musa ogola modok wiak aga.
11Ogola asogo wiak agarik e, nenaik ’gain Onuk Logo a’ge disogo mo’gulesi,
“Hat en an nopaget nede disogo wiagap taga legen. Hat an nebe hebit en taknebasu legen a? Aphwami enebe ’berlegat ai paget an en taga lemagoluk ne’gik pam pegen ai nopaget. 12An en is enebe nogola otluk dagenebegis no? Hat en e, aphwami en malik yagasogo wogonoboluk no’gwi ai ’gela’ge, is ai an en wogonoboluk o nena’bu-nene’balak wogentaigoluk wene weragenebegenma ebayat louwagoluk, mo’gulnigen ai nopaget. 13Is en,
Wam woknentemen, oluk orlumamit ’balogulat modok oruak ai hil yerentemen o. Is aphwami ’berlegat ai paget an wam ’geba a’ge ’balentaik no. 14An en yabuk yu tu re, e’gin modok a’bik o. Is enebaget e, e’gin a’bik asogo tu re, an e, mia o. 15Hat en asogo modok taknebasu lorogun holuk, hede niemen o. An nebam e’gin-pe’ginsogo taknebasu legen ai, erlak emagoluk nebe perleneat watnobumu re, op o,” oluk wene yagesi.
16Asogo wene yagesimu, at nenaik ’gain Onuk Logo a’ge en Musa disogo mo’gulesi,
“Aphwami Israel a’ge enebe enarlue holuk, aphwami en e,
Is eria re, nonuelak ’gela’ge welat tugulom e, enebabut elirat o, oluk opogwi a’ge holuk enebe 70 odoksogo enebemen o. Onoboluk e, an nilem wogonoboluk nowi sum owi werikmu onobou woroguntik e, hat heragam inemagoluk mo’gulentemen o. 17Mo’gulentagun holuk, an nebe ’bu eiktik e, eria en wene mo’gulheselat, an Narogun hat wokhegis a’ge ano logon is ai wogentasulat, tik o. Asogo wogentaikmu re, aphwami yu enebaget hat hematek nak hebam e’ginsogo taga lorogun erlak o. We, is en lethiogu lema o. 18Yogodak, hat en aphwami ai wene disogo mo’gulontomup,
Henebe loruk o’gwe paget e, degelhorlomup o. Henaik ’gain Onuk Logo a’ge en e, his wam nele en nge togulat,
Nenebit o. O Mesir obat welege a’ge o, oluk ogu legep ai, henaik nesa’go hwelegistik e, loruk o’gwe an henaik ’gain Nonuk Logo a’ge en his eino wokhentasuam nagup o. 19Wokhentasuam no’gu lorogup ai, agauwa mesik erlige nak ogo erlak, agauwa ’biren nak ogo erlagat, agauwa huabenam ogo erlagat, agauwa 10 pam ogo erlagat, agauwa 20 pam ogo erlagat. 20We, dugwi mesigat nemak oruakhwe no’gu lorogup o. Asogo no’gwi modok woloroguptik ologun pam e, henebam obotut agalat, eme lukhogulat, togu lorogup o. Asogo togup ai re, an henaik ’gain Nonuk Logo a’ge hene’gerlakma welegi a’ge ai uknobogulat,
Nonowi o Mesir ukpoluk wege ai nebit e, oluk ebam eberogulat nilemat nge togulat, togu legep ai enat o, oluk egei, oluk mo’gulontomup o,” oluk mo’gulesi.
21Asogo mo’gulesimu, at Musa en nenaik ’gain Onuk Logo a’ge disogo mo’gulesi,
“Aphwami an en wogonoboluk waga legi a’ge yema enebe ’berleksogo re, 600.000 oruak o. Ye, enebe a’bik asogoat a’geat de, hat en e,
An en wam wogentaik o. Elitsogoat wogentaikmu dugwi mesigat a’ge pam elirat no’gu lema o, oluk egen ai no’gosogo oluk egen o.
22Wam sapi emin, domba emin, ebe a’bik is werakpoluk sakho onogum ningsogo no a’ge ebe ’geba oruak en egen. Hiane ik laut ye’gelakma ogola welago a’ge ai ’berlegat wokho is wogontoma elirat no epegen a?” oluk mo’gulesi. 23Asogo mo’gulesimu, at nenaik ’gain Onuk Logo a’ge en disogo mo’gulesi,
“An nanni erlak we, wei nak tu epegen a? An en mo’gulhegis ai demat perlene ema ya? Erlak a. Ebe demat agoam en hil hagunat o,” oluk mo’gulesi.
24Asogo mo’gulesimu, at Musa ebe libagarik e, wene nenaik ’gain Onuk Logo a’ge en mo’gulesi a’ge ai, is aphwami Israel a’ge onuelak enebe 70 ebano odoksogo enebesirik e,
“Nenaik ’gain Onuk Logo a’ge owi sum owi werikmu ebano eragam o’gwe wali’gogo edik welemis o,” oluk mo’gulentesi. 25Asogo mo’gulentesimu, nenaik ’gain Onuk Logo a’ge ebe o hena ogola en ’bu agarik e, wene mo’gulesi. Mo’guleselat e, Musa yo’go pesirik Arogun wogesi a’ge ano logon togolik wokho is ap enebe 70 ebano wogentesi. Asogo wogentesimu, nenaik ’gain Onuk Logo a’ge Arogun is ebano enebam ’belakpou wagama re, is eniak e, ap Allah iak mo’gulontogwi a’ge en eniak loksogo ogwi ai ’gela’ge egesa a’geat de, pobuk ogu legesa erlak.
26Asogo oluk, is ap onuelak 70 a’ge ebano enebe ’biren, mesik onuk e, Eldad, ye, mesik e, onuk Medad, emin is enarilak enemin nenaik ’gain Onuk Logo a’ge owi sum owi werikmu ebano lo erlakma en, onowi sum owi werikmu ebano mo egesa. Asogo mo egesarik onowi sum owi werikmu ebano oruakma, Allah en Arogun enebam ’belakpou wagama, is emin eniak loksogo ap Allah iak mo’gulontogwi a’ge en ogwi ’gela’geat egesa. 27Asogo egesema, ap souwe a’ge mesigat nak Musa e’bek lagarik e, disogo mo’gulesi,
“Is ap Eldad emin, Medad emin, disogo ogwi o,” oluk mo’gulesi.
28Asogo mo’gulesimu at Yosua ap Nun omlogo ebe souwe pam enat Musa lethasu laga a’ge ano en e, esa’go hwelegeirik e, Musa disogo mo’gulesi,
“Nue o. Is en ogwi ai mo uagoluk wene yagontomup o,” oluk mo’gulesi. 29Asogo mo’gulesimu re, at Musa en e,
“Hat en,
At nak ese lemak, oluk nebam eberise legen ai nopaget. An e, nenaik ’gain Onuk Logo a’ge Arogun eiyagai enebe ’berlegat wogontoluk e, enebe ’berlegat at iak mo’gulontogwi a’ge ’gela’ge nak tagenebelep e, oluk epasu legi o,” oluk mo’gulesi. 30Asogo mo’gulesirik e, at Musa ap Israel a’ge onuelak enebe 70 a’ge ebano enemin togolik onowi sum owi werikmu ebano wegesa.
Nenaik ’gain Onuk Logo a’ge en tue yemalmal ’gela’ge onuk puyuh perakpou waga wene
31Asogo egesema, nenaik ’gain Onuk Logo a’ge en e, sogwei ik laut ye’gelak hegit ebano en perakpou wagama punhau wagalat, tue yemalmal ’gela’ge onuk puyuh ano woluk wagama, ’gwiang hegit satu meter ’gela’ge modok sebelogoat ’bou etil waga. Wagarik e, o sum owi werik o’gwe ebano en ’bou eselat, duk agalat e, eragam o’gwe modok a’bigat duk etil laga. 32Asogo duk etil lagama re, aphwami ebano enede enagai pam o agauwa ai erlige hwedik odoktogulat, elaluk marogulat, erlige en hup en ’bekhit tono ’gela’ge ogo marogulat, odoktogulat, togu legesa. Aphwami enebe lo’bok e, tue e’gin e, 1.000 kilo ’gela’ge maregisa. Asogo maregisarik o sum owi werikmu ebano eragam o’gwe ebano wali’gogo asu ’belak poluk ering houwagoluk pil legesa. 33Sue ebe no’gukhweat de, modok a’bik ebam louksogo seik-’beik egeimu nenaik ’gain Onuk Logo a’ge en olot het aphwami ebano enebam pesirik, ou obotut wiak a’ge enebam perakpou waga. 34Sue ano no’gwi modok oruakma en ou ano asogo ene’bek perakpou wagama, enebe a’bik waregesema ’gwiangma salenebegisa ai en, o eba onuk Ono’gonu Wiak en Waregesema oluk onuk tualigisa.
35Asogo tigisarik, aphwami ebano o eba en e, o onuk Hazerot ebano wegesarik onowi sum owi ebano werigisa.
Actualmente seleccionado:
Bilangan 11: Wul
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión