Bilangan 13
13
Musa en, ap enebe 12 a’ge en enilen wogu lemagoluk peragenebesi wene
1Nenaik ’gain Onuk Logo a’ge en e, Musa disogo mo’gulesi,
2“Aphwami Israel a’ge ena’gul onuk lo’bok onuelak ’gain mesik-mesik da ’gegik ya ’gegik, o Kanaan an en wokhentaikmu eba enilen wai louwagoluk peragonobomup o,” oluk mo’gulentesi.
3-15At nenaik ’gain Onuk Logo a’ge en Musa mo’gulesi a’ge hegitsogoat o aphwami erlakma Paran leimu en aphwami Israel a’ge onuelak peragenebesi a’ge yu:
ena’gul onuk Ruben, Syamua Zakur omlogo,
ena’gul onuk Simeon, Safat Hori omlogo,
ena’gul onuk Yehuda, Kaleb Yefune omlogo,
ena’gul onuk Isakhar, Yigal Yusuf omlogo,
ena’gul onuk Efraim, Hosea Nun omlogo,
ena’gul onuk Benyamin, Palti Rafu omlogo,
ena’gul onuk Zebulon, Gadiel Sodi omlogo,
ena’gul onuk Manasye, Gadi Susi omlogo,
ena’gul onuk Dan, Amiel Gemali omlogo,
ena’gul onuk Asyer, Setur Mikhael omlogo,
ena’gul onuk Naftali, Nahbi Wofsi omlogo,
ena’gul onuk Gad, Guel Makhi omlogo.
16At Musa en is o ano enilen wai louwagoluk peragenebesi a’ge ap aiyat o. Ap mesik onuk Hosea Nun omlogo at onuk ’get a’ge Yosua tualegei.
17At Musa en ap ebano peragenebasulat disogo mo’gulentesi,
“His o yema en ik elarukmu laguptik e, o Kanaan ogodima akhit en til til e, dom pam ligomup o.
18Henilen wil lagalat e, o eba no’gorak oruak. Aphwami enebe ’gesogo oruak. Enebe a’bik oruak a? ’Biren nak a. Is enanni oruak a? Erlak a. 19O eba ebabut no’gorak oruak. Op a? Wiak a. Onowi pakleget yat a’ge wogo nak oruak a? Wogo erlak oruak a. 20’Gwiang eba re ’gerak o? op a? Wiak a? E a’bik oruak a? Erlak a? Ye, wene ’berlek togolik woluk manup o. Henilen wil lagalat e, e e’gen pema dagan-dagan togolik manup o,” oluk mo’gulentesi. O ai erlige anggur e’gen hurle eigoluk tagokhwe legesa.
21Is ap ebano ik elaruk akhit o ai enilen wil lagalat e, o aphwami erlakma lei onuk Zin ogodima en ’bekhit erabu o Rehob ebela onuk Hamat horoksogo legesa. 22Naduk o ano ogodima akhit o onuk Hebron, is aphwami ap onuk Enak ene’balak ena’gul onuk Ahiman emin, Sesai emin, Talmai emin, welegesema legesa. O Hebron ano naduk werigisarik e, tahun sabiren oruakhwe pobuk o Zoan Mesir oruakma werigisa. 23Is lagalat e, do’go onuk Eskol legesarik e’gen anggur momogou mesik modok e’gin a’ge ’balogo ap enebe ’biren e ’go’gosogo woluk wegesa. Wogulat e, is e e’gen delima a’ge emin, ara a’ge emin ogo wolugat wegesa. 24Is ap Israel a’ge anggur momogou ano eba ’baligisema, o do’go ano onuk Eskol tualigisa. 25Is ap ebano o ai enilen wogulat e, agauwa 40 pam welegesarik en pobuk togolik wegesa. 26Wegesarik e, is Musa emin, Harun emin, aphwami Israel a’ge enebe ’berlegat emin, o aphwami erlakma o Paran leimu o onuk Kades eba enebe odoksogo oruakma ene’bek wegesarik e,
“Disogo hege o, asogo hege o,” oluk mo’gulontogulat, e e’gen daganogo woluk wegesa a’ge onugontogulat, tigisa. 27Asogo mo’gulentigisarik, Musa disogo mo’guligisa,
“Nis e, o eba nenilen wokho modok pobirak pege a’ge re, ’gwiang modok moli opma re, di a’ge yu a’ge e’gen modok a’bik osokhwe hegerik e, e’gen weiyat logon ’balluk wege a’ge yema o.
28Asogo a’geat de, aphwami o eba welagai a’ge enebe re, enebagase lok nak welat enanni ogo a’bik a’ge oruakma hege o. Onowi kota re, lok nak a’ge re, leget helep a’ge pakleget ningtak a’ge modok werik oruakma hege o. Ye, enebe logon e, is enebe lok onuage’ga yat a’ge en dogo’gwe a’ge en oruakma entige o. 29Aphwami ena’gul onuk Amalek a’ge, onowi re, o eba ik o’but hegit welagai. Ye, aphwami ena’gul onuk Het a’ge emin, Yebus a’ge emin, Amori a’ge emin, onowi re, dom pam welagai. Asogo oruakhwe is aphwami ena’gul onuk Kanaan a’ge nak e, ik laut ye’gelak a’ge nak e, esa’go’gwe ’berlegat emin, ik Yordan elaruk o’but ’berlegat emin, ’berlegat is modok oruakma hege o,” oluk mo’guligisa.
30Asogo mo’gulegisema, is aphwami logon en e,
“No’gosogo tul, nonogorlok o,” oluk Musa ebam orlumamitsogo mo’gulogu legesa a’ge ebano enede ha’buk uagoluk, at ap Kaleb en disogo mo’gulentesi,
“Honogorlok hagup. Nis aphwami o eba a’ge mabenap onobuogoluk nenanni elit welege ai en, yogodak yayat warenebi lorik, enebe mukho lebigonoboluk, o eba nis nagat sebeluok o,” oluk mo’gulentesi.
31Asogo mo’gulentesi a’geat de, is ap Kaleb emin enilen wai legesarik wegesa a’ge ebano en e, disogo egesa,
“Nis nenanni erlak a’ge re, is aphwami eba welagai a’ge enanni modok a’bik entige a’ge ebano re, nis en warenebi lo modok mia o,” oluk egesa. 32Asogo oluk, aphwami Israel a’ge welegesa’gwe ene’bek ’gwi lagalat, o enilen wil legesarik hegesa a’ge ebano paget mo’gulontogulat, eniak eseiyat logon emin labelogo mo’gulentil denagalat e, disogo mo’gulentigisa,
“Aphwami o eba a’ge enebagase modok lok a’ge nak nenil hege o. A’ge re, aphwami logon ’gwiloma modok ugonobo puk ai en e, nis modok erlak omul o. 33Aphwami ena’gul onuk Enak a’ge en dogo a’ge eba re, enebe lok welat, onuak yat nak oruakma nenil entige o. Nis nenebe is enemin walhoma re, nis nenebe ho’bukhak ’gela’ge epege o. Ye, is en ogo re, nis nenebaget asogoat opogwi,” oluk eniak eseiyat la’belogo mo’gulentigisa.
Actualmente seleccionado:
Bilangan 13: Wul
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión