Mitengo 13
13
Mosi a ngu rumela vasoli tigoni ga Khanani
(Dhewuteronome 1:20-29; Josuwa 2:1-24)
1 Pfhumu Nungungulu a di embela Mosi, khuye: 2“Rumela vama va ya sola litigo la Khanani, nyi vbwetago gu li ningela ga sanana sa Israyeli; ga lihundzu ni lihundzu la vababe vawe mu na rumela mwama moyo, nya muthangeli vbakari gwawe.”
3Mosi a di va rumela kha nga guleletela ga Pfhumu Nungungulu, vama vale nya vathangeli va na Israyeli, nari khu giwulani ga Parani. 4Malina yawe a diri aya: Ga lihundzu la Rubheni, Samuwa, mwamana wa Sakuri;
5ga lihundzu la Simiyoni,
Safati, mwamana wa Hori;
6ga lihundzu la Judha,
Kalebi, mwamana wa Jefone;
7ga lihundzu la Isakari,
Jigeyali, mwamana wa Josefe;
8ga lihundzu la Efrayimi,
Hoseya, mwamana wa Nuni;
9ga lihundzu la Bhejami,
Pilati mwamana wa Rafu;
10ga lihundzu la Zebhuloni,
Ghadhiyeli, mwamana wa Sodi;
11ga lihundzu la Josefe, khu nyumbani ga Manasi,
Gadhi mwamana wa Susi;
12ga lihundzu la Dhani,
Amiyeli, mwamana wa Gemali;
13ga lihundzu la Aseri,
Seturi, mwamana wa Migeli;
14ga lihundzu la Nafitali,
Nahabhi, mwamana wa Vapisi;
15ga lihundzu la Gadhi,
Geweli, mwamana wa Maki.
16Aya khu malina nya vama va rumedwego khu Mosi gasi gu ya holelela litigo la Khanani, Mosi a di riya Hoseya, mwamana wa Nuni lina nya gukhuye khu Josuwa. 17Mosi a di va rumela gu ya sola litigo la Khanani, a va embela, khuye: “Gwelani khu phuvbo ga Negebhi mu hongola kala sigomotunu. 18Mu wona litigo muni ilolo, vathu muni va vbanyago umomo, va na ni tshivba mwendro va mwalo nayo, vangi mwendro vadugwana. 19Mu wona gambe mafu va vbanyago umo, khyadi mwendro khandri yadi; ni madhoropa va vbanyago umo, mwendro ma na ni mazumbo mwendro ma bhiyidwe. 20Mu wona gambe ni mafu yakone, ma nonide mwendro kha ma nona, misimbo yomo mwendro yi mwalo. Tiyani longo, mu nga thavi, mu na ya wuya ni mihandro nya litigo lolo; kholu nango yakone a diri iyo nya guphele guvidzwa dziuvha.”
21Khu guralo, va di gwela va ya sola litigo; gukhugela giwulani ga Sine kala Reyobhi, khu ndzila yi yago Hamati. 22Va di gwela khu Negebhi va vboha Hebroni, avbo va nga bani va romo Ayimani, Sesayi ni Talimayi, livelego la Anaki. Lidhoropa la Hebroni khilo li nga phela gu vbahwa, livbandre na mivili myaga na li si gu vbahwi la Sowani ga Egipito. 23Va di vboha kovani wa Esikoli, avbo va nga ya pila litamo na liri ni gitsatsa nya gikhongolo nya dziuvha, va gi rwala khu pingwi nari vama vavili; va di resa gambe ni maroma ni dzindzawa. 24Wulanga wowo va di wu rana khavo Kova wa Esikoli khu kota nya gitsatsa nya dziuvha va nga pilago vbale va na Israyeli.
Mawonelo ya vasoli nya litigo la Khanani
(Dhewuteronome 1:26-33)
25Guvbelani nya magumana matshigu, va di bwelela khu gusolani nya litigo. 26Va di wuya ga Mosi, ni Aroni gumogo ni tshangano watshavbo wa na Israyeli giwulani ga Parani, tigoni gwa Kadesi. Va ta va embeledzela esi va nga ya si wona ni wufakazi watshavbo, va gu va nonedza mihandro nya litigo. 27Va di ta embeledzela Mosi, va ganela, khavo: “Hi hongode ga litigo eli u hi rumedego; khu lisine litigo li gogago mahwe ni wulombe, mihandro yakone kheyi. 28Aholu, vathu va vbanyago tigoni momo va na ni tshivba ngudzu, va na ni madhoropa nya makhongolo ngudzu ma bhiyidwego, iyoyo hi wonide gambe situgulwana sa Anaki. 29Amaleki a vbahide tigoni gwa Negebhi, Vahiti, Vajebhusi, Vaamori va vbahide gigomoni; Vakhanani va vbahide vbafuvbi ni yiphwa khu dzibambe nya tsongo wa Joridhani.”
30Aholu Kalebi a di degudza vathu, kholu va di gu gorogela Mosi; a ganela, khuye: “Hongoleni, hi na ya dzega litigo lolo, kholu khu lisine hi na ya va pala.” 31Aholu vathu vale a nga hongola navo, va di ganela, khavo: “Gima kha hi na nga dzi kodza gu va pala, kholu avo va na ni tshivba ngudzu guvbindra ethu.” 32Khu guralo, va di sawutela guvivba khu litigo lile va li sodego, mbeli ga va na Israyeli, va ganela, khavo: “Litigo leli hi li tsemakanyidego hi li holelela, litigo li songago vavbanyi valo; vathu vatshavbo hi va wonidego va laphide ngudzu. 33Gambe iyoyo hi wonide sidandrangulu nya sanana sa Anaki, nya lifumbu nya vadandrangulu; guwonani gwathu, hi di fanana ni dzimbera mbeli gwawe, avo navo va di hi fananisa ni dzimbera.”
Actualmente seleccionado:
Mitengo 13: BGG2014
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Gitonga DC Bible © Bible Society in Mozambique, 2014.