Mitengo 14
14
Va na Israyeli va ngu bomba gubela tigoni ga Khanani
(Mitengo 17:6-11)
1Tshangano watshavbo wu di khuga, wu womba huwa khu lito nya gukhugege, vathu va di lila ni wutshiguwule. 2Va na Israyeli vatshavbo gumogo ni tshangano watshavbo va di ngurangura va wugela Mosi ni Aroni, va ganela khu gyawe, khavo: “I tshukwana na hi fede tigoni ga Egipito mwendro giwulani momu! 3Khu ginani Pfhumu Nungungulu a hi residego tigoni momu gasi hi fela guta songwa khu matshari, vagadzi vathu ni sanana sathu va na modwa va tshaniswa; khandri di gwadi hi bwelela tigoni ga Egipito, gani?” 4Muthu ni muthu a di embela ndriyaye, khuye: “Hongoleni hi hathe muthangeli, hi bwelela tigoni ga Egipito!”
5Khavbo avbo, Mosi ni Aroni va di thega khu khovbe vbavbatshi mbeli nya tshangano watshavbo wa na Israyeli. 6Khu guralo, Josuwa, mwamana wa Nuni gumogo ni Kalebi, mwamana wa Jefoni, a gu vamowo nya vale va nga hongolago guya holelela litigo, va di pferula guambala gwawe, 7va gu ganela ga tshangano watshavbo wa na Israyeli, khavo: “Litigo hi nga li tsemakanya hi li holelela, litigo nya ladi ngudzu. 8Nari gukhwatshi gugola ga Pfhumu Nungungulu gu na ni ethu, a hi vbohisa ga litigo lolo, a hi ninga li khala lathu, litigo nya ladi li gogago mahwe ni wulombe! 9Mu nga wugelini Pfhumu Nungungulu, gambe mu nga thavi vathu va tigoni mule, kholu, avo va na khala guhodza gwanu. Va mwalo wuthavelo kholu Pfhumu Nungungulu a na ni ethu. Mu nga va thavi!”
10Tshangano watshavbo wu di alakanya gu mu pfara khu siwindri, aholu wudhumo wa Pfhumu Nungungulu wu di wonega vbatshani nya Tshatsha nya Tshangano ni ga vatshavbo va na Israyeli. 11Pfhumu Nungungulu a di embela Mosi, khuye: “Kala lini vathu na va gu nyi yeyisa? Kala lini na va bomba gu nyi tumba? Ambari na nyi giride sisamadziso nya singi vbakari gwawe? 12Nyi na va vbedza khu tungu nyi va mbembisa, aholu uwe nyi na gu gira lihundzu nya likhongolo eli li gu na ni tshivba nya guvbindre avo.”
Mosi a ngu lombelela khu vathu
13Aholu, Mosi, a di phindrula Pfhumu Nungungulu, khuye: “Vagipiti khandri va dipwa basi, avo va pwide gupwani u duside vathu vava khu tshivba yago vbakari gwawe, 14Aholu va embede gambe vathu va tigoni momu. Avo va pwide gupwani Uwe Pfhumu Nungungulu u womo vbakari ga vathu vava, ni gu uwe u ngu va yeyedza khovbe yago, ni gupwani lipfhi lago la gu khala vbatshani gwawe, vbamihanitunu wa gu thanga mbeli gwawe khu lipfhi, vbawutshigutunu gambe u womo vbakari gwawe khu nilo. 15Wa gu songa vathu vava gukhwatshi wa gu songa muthu moyo, va nya mayigo vale va ngapwa ndruma yago khu gale va na ganela, khavo: 16“Pfhumu Nungungulu di sasede va na Israyeli mugiwulani, kholu a di tandrega gu va vbohisa ga litigo a tumbisidego gu va ninga.
17Khu guralo, olu, nyi ngu gu lomba Uwe Pfhumu Nungungulu, u nonedza tshivba yago nya yikhongolo ngudzu; kha nga idzo u leletedego khidzo, khuwe: 18Eni Pfhumu Nungungulu nyi ngu hwela gu goroga, Nyi na ni wuhindzi ni gu divalela; nyi tsetselelago milandru ni sighoho; gambe kha nyi digi gu tsayisa avo va ghohidego, nyi ngu tsayisa sanana khu sighoho sa vavelegi, kala gitugulwana nya wuraru nigyo nya wu na. 19“Khu guralo, tsetselela vathu vava, gukhedza khu wuwadi wago nya wukhongolo; kha nga gambe u tsetseledego vathu vava gukhugela tigoni ga Egipito kala avba.”
Gutsayiswa ga va na Israyeli
(Dhewuteronome 1:34-40)
20 Pfhumu Nungungulu a di ganela, khuye: “Nyi na va tsetselela kha nga guganela gwago. 21Aholu, khu lisine, kha nga olu nyi vbanyago ni wudhumo wa Pfhumu Nungungulu wu na tadzago litigo, nyi ngu tiyisa gukheni 22mwalo ni moyo ga vathu vatshavbo va wonidego wudhumo wangu, ni sisamadziso nyi giridego tigoni ga Egipito ni giwulani, aholu va nyi lingidego likhumi dzinyondro, va si yingisi lito langu; 23#Wona gambe: Hebh 3:18.mwalo ni moyo a na wonago litigo eli nyi sambanyidego gu ninga vababe vawe, mwalo na moyo nya ava va nga nyi yeyisago a na gu li wona. 24#Wona gambe: Jos 14:9-12. Aholu, githumi gyangu Kalebi, nyi na mu vbohisa ga litigo lolo a hongodego aya li sola, li na khala laye ni la livelego laye, kholu a nga tedwago khu liphuvbo nya guhambane ni vambe, ni olu a landrisago khu lisine ndzila yangu, 25Vaamaleki ni Vakhanani va gu vbanyela kovani, mindru bwelelani, gimbilani mu thonona giwulani khu ndzila nya Yiphwa nya Gufuvile.” 26Pfhumu Nungungulu a di embela Mosi ni Aroni, khuye: 27“Kala lini na nyi gu timisela tshangano yoyu nya guvivbe na wu gu nyi wugela? Nyi pwide gungurangura ga va na Israyeli va nyi girelago litshigu ni litshigu. 28U na va embela, khuwe: Kha nga olu nyi vbanyago, a ngu ganela Pfhumu Nungungulu, nyi na mu girela kha nga edzi mu ganedego dzindzeveni gwangu. 29Sirumbi sanu si na thega giwulani momu ni mwatshavbo enu mu nga lovedwago, gukhugela enu mu nga enedzago magumavili myaga guya mbeli, enu mu nga nyi yeyisago. 30Khu guralo, ni moyo nya enu mwalo a na belago ga litigo nyi sambanyidego gukheni nyi na mi vegani mu khala umo, vbavbandze basi ga Kalebi, mwamana wa Jefoni, ni Josuwa, mwamana wa Nuni, 31ni sanana esi mu nga khenu si na modwa khu valala vanu, avovo Eni nyi na va vbohisa gasi va kodza guti litigo enu mu li bombidego. 32Aholu ga enu vambe, sirumbi sanu si na thegela giwulani momu.
33 # Wona gambe: Mit 32:13. Sanana sanu si na legalega giwulani momu, gipimo nya magumana myaga, na va rwala nandru nya gumba tumbega gwanu, kala guvbela sirumbi sanu giwulani momu. 34Kha nga olu mu vbedzidego magumana matshigu na mu gu holelela litigo, mu na rwala milandru yanu gipimo nya magumana myaga, kholu litshigu limwedo mwaga rumba; gasi mu fela gu dziti gukhenu Eni nyi Swihade. 35Eni Pfhumu Nungungulu nyi ganede isoso; Nyi na gira kharalo ga tshangano yoyu nya guvivbedwe khu monyo, wu nyi wugedego; va na vbela giwulani momu, va fela umo.
36Vama vava va nga rumedwago khu Mosi guya sola litigo, avbo va nga wuyago, va dita thela ghudzeghudze ga tshangano watshavbo va ganela guvivba khu litigo, va wugela Mosi. 37Avo vama vale va nga ganelago guvivba khu litigo, va difa khu tungu mbeli ga Pfhumu Nungungulu. 38Aholu Josuwa, mwamana wa Nuni, ni Kalebi, mwamana wa Jefoni, vamowo nya vale va nga bani va hongode guholelelatunu nya litigo, kha vafa gilo.
Va na Israyeli va ngu padwa tigoni ga Horima
(Dhewuteronome 1:41-46)
39Mosi a di ganela magana yatshavbo yaya ga vatshavbo va na Israyeli, khavbo avbo, va di lila khu wuvi nya wukhongolo. 40Va di phindrula ni mambagugya, va gwela tshokhatunu nya gigomo, vaya, khavo: “Khethu ava! Hi ghohide; gambe hi dzi emisede gu gwela wulanga Pfhumu Nungungulu a hi tumbisidego.”
41Aholu Mosi a di va embela, khuye: “Khu ginani mu hambanisago sileletelo sa Pfhumu Nungungulu? Enu gima kha mu na dugelela.” 42Mu nga hongoli, kholu Pfhumu Nungungulu a na bani nari mwalo vbakari gwanu; mu ngayi mu ya dzi ningela ga valala vanu. 43Kholu Vaamaleki ni Vakhanani, vomo vbale mbeli gwanu, mu naya sasedwa khu matshari, kholu mu nga hambana ni Pfhumu Nungungulu; Pfhumu Nungungulu kha na mi dwanela.
44Aholu, avo va di dzi gurumedza va gwela tshokhatunu nya gigomo, ambarulo, Ngasa nya Gidzumeledzwano ya Pfhumu Nungungulu, gumogo ni Mosi, kha va nga khuga khu vbakari nya lizumbo. 45Vaamaleki ni Vakhanani, va nga bani va gu khala gigomoni mule, va di relela vata va sasela, va gu va lundra kala tigoni ga Horima.
Actualmente seleccionado:
Mitengo 14: BGG2014
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Gitonga DC Bible © Bible Society in Mozambique, 2014.