ROMA 1
1
Aroo
1:1-7
1Naek srar ayesi, Allah iswar ma dorkwar fa ḇeḇe kawasa ḇyesi ro Roma. Allah kyinfir aya ma ikanow ḇardi aya kwar fa yaḇaryas Ankankinem Ḇeḇye ḇyedi.
2Ankankinem Ḇeḇye ani, Allah ḇyeasasi kwar ro awar ḇeponya faro nabi-nabi ḇyesi, ma sfasepeni kwar ro Refo. 3Ankankinem Ḇeḇye ḇekur Allah Rumkun ḇyedi, isoine Manseren koḇedi Yesus Kristus, mboi roḇaḇe snonkaku ḇyedi, ḇyeḇarpur ro Daud, 4ḇape roḇaḇe Manseren ḇyedi fyasna ḇadir i Allah Rumkun ḇyediri. Ine ḇyeḇefasna ḇadir kuker papoik ḇesyadadi, aḇiḇer ḇyedi rofandu marmarya. 5Kuker i kako, Allah ḇyuk saswar ma fakamamanḇe aya fa yaḇe manwawan, insa yakfin snonkaku ro er-er – syakam fa sesyowi Kristus, ma sikyar faro snonsnon ḇyedi. 6Wos ḇekur er-ersyakam ma naek ayesi mkokako ro Roma isoine; naek srar mkoḇe ḇeyor kwar fa mkoḇe kawasa faro Yesus Kristus.
7Iso eḇedari yafas faro naek srar ayesimko, iḇyekada Allah kma koḇeja ma Manseren Yesus Kristus ḇyeḇok ma ḇyuk aski mufaḇe naek srar mkokam.
Paulus imarisen fa ryaḇe Roma
1:8-15
8Ḇepon kaku, kuker snonsnon ro Yesus Kristus, yakofen kasumasa faro Allah snar naek srar mkokaem, snar sup swan ine ḇesiper simnaf kwar, mboi mkokyar kaku faro Yesus Kristus. 9Mboi Allah yuffarmyan kuker sne ḇesiper ro ḇaḇe ḇararyas Ankankinem Ḇeḇyeya, kuker Rumkun ḇyedi, iso ḇeḇesaksi maro aya, mboi rofyor yabe yanadi ido, yaswarepen mko besyakwar; 10yabenadi kuker kaku ḇeri faro Allah insa ḇyuk fa yasma fafisu fa yarakaki mko. 11Yamarisen yasrow naek ma srar mko, insama yarwas fakamaman yasma ro Allah Rur ḇyeja fa syambraḇ ser mko. 12Kakara yedi isoine, snar kokam kokyar faro Yesus Kristus, inja ibye kosonemyaeko.
13 #
Kis. 19:21
Naek srar mko, yamarisen insama mkofawi, mboi nabor kaku kwar yamarisen fa yarakaki naek srar mko, ḇape roi ḇedwarek aya naisya ḇesya kwar. Yamarisen insa rofandu naek ma srar mko kako mkofararur insa fararur ayeja ḇyebon, raris moḇ fararur ayeja ḇyebon rofandu er-er ḇeḇe Yahudiḇasya ro moḇ ḇese. 14Snar yasma wawan faro er ḇesesyakam, ḇesma farkarkor kwar ma ḇesma farkarkor ḇaim, iḇye ḇefawisya ma ḇefawi ḇaimsya. 15I eḇedar fa yamarisen kaku yaḇaryas Ankankinem Ḇeḇye faro naek ma srar ḇekain ro Roma mkoya kako.
Papoik ro Ankankinem Ḇeḇyeya
1:16-17
16 #
Mrk. 8:38
Yakyar kaku faro Ankankinem Ḇeḇyeya, snar ikada Allah papoik ḇyedirya snar ḇyuk koreri faro snonkaku ḇekyarsya, ḇepon kaku faro kawasa Yahudisya ma er ḇesesya kako. 17#Hab. 2:4Snar kuker Ankankinem Ḇeḇye ani, Allah fyasna rariso nyan ḇaḇeoser snonkaku kuker Allah iḇye kaḇer wer; isoine kakyar faro Allah, ro randakya isof papupesya. Imnis fas-fas ro Refo, “Snonkaku ḇekyar faro Allah isof ḇaḇeoser ḇyedi kuker Allah iḇye kaḇer wer, snonkaku ani nari ikenem!”
Snonkakusya sasar sena
1:18-32
18Ro boiyaswa Allah fyasna masasor ḇyeja faro sasar ma ḇarḇor snonkakusya sena, snar sasar ma ḇarḇor annakam nadwarek snonkakusya fa sifawi farkarkor ḇenapes Allah ḇyenaḇa. 19Snar rosai snonkakusya sifawiḇa ḇekur Allah sḇaḇirna ro sisnesna ma kakara sena, snar Allah mankundi fyasna nakwar. 20Rofyor Allah ifrur supswan ine, Allah rari ḇyena komam ro komkasna ḇana, isoine ḇaḇe Manseren ḇyena ma papoik ḇekain fyoro-fyoro ḇyena, snonkakusya sifawina kwar ro roi ḇeḇor Allah ifrur kwarna. Inja snonkakusya sisma sanoyo ḇaḇeri fa sbuki ḇyesano wareksi. 21#Ef. 4:17-18Snonkakusya sifawi Allah ḇesyaḇoi, snonkaku ansi sesyowi Allahḇa ma sikofen kasumasa faroiḇa. Imboi snonkakusya skara roi famfnom munda; snar sisnesna npanpan kwar. 22Skara ḇo soḇo sifawi nananem, fama smamkir royoḇaḇeri. 23#Ul. 4:16-18Sisyom faro Allah ḇekenem fyoroya ḇaḇoi, sisyom faro amfyanir ḇesnai farari roi nari ḇemarna; isoine snonkaku, mansya, ma aiwan ḇeḇe wemin rifiaksya ma aiwan ḇeyanawersya.
24Eḇedari Allah myam monda siḇo ḇyuk fa sifrur raris marisen sena fa sifrur roi ḇeyarwarem rofandusi. 25Allah ḇekakuya, sfadweri kuker roi ḇekakuḇa. Isoine roi sifrur ro ḇramin naiso sisyom farona. Mboi ḇefrursiya iso sisyom ma sḇansuba rofyoro-fyoro faroyakada! Amin.
26Snar snonkaku ansya sifrur rariryanja eḇedari Allah myam mondasiḇo siso mankunsi rmomen ḇefrur mamyai sena. Bin sesya kako sfarḇuk kuker snonsya werḇa; imnis rari ḇaḇekawin ro snonkakuḇa ḇoi, sfarḇuk kuker bin ḇesesya. 27Snonsya kako sakḇerarirya; sfarḇuk kuker binsyaḇa ḇoi, sfarḇuk kuker snon ḇesesya, isof snon ansi sifrur roi ḇefrur anonef faro snonsya, isof mankunsi sikamar fararur ḇeḇyeḇa sena.
28Ma snar snonkakusya sḇaḇir fa skarem Allah ḇa, inja Allah ḇyuksi faro kakara ḇeyun fras farosi, isof sifrur roi ḇeḇarḇor na: 29Sisnesna nafo kuker ḇarḇor ḇeḇor kam ḇenapesḇa ma roi ḇekakuḇa, isoine sasewar nana, arwarem, masasor, sifo kuker swaruser mamun, rakrakrok ma ankarkar. 30Simarisen sifrur fanor snonkaku ḇese; simewer sḇeuser sinan, semararesi, sifawi rariḇa, ma sayin faro Allah, ma simarisen semandaw. Simarisen sḇesewar fawawinanem ḇebabo fa sḇukifrur roi ḇeḇarḇor, 31simewer skara snonkaku ḇesesyandi, sisaswarḇa ma sisoasuserḇa. 32Mboi sifawi kaku Allah sasoser ḇyena isoine mansei ḇefrur rariryaido nari isma samamyai marmari. Rariryano sifrur roi ḇeḇyeḇa anna ḇesyakwar kako, ma ssḇuk kaku faro snonkaku ḇefrur rariryasya.
Actualmente seleccionado:
ROMA 1: LAIBHW
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión