FARFYAR RO MANWAWANSYA 28
28
Paulus ro myos Malta
28:1-10
1Rofyor nkorande kwar kuker ḇayaye, insape nkofawi, sup ani kada myos Malta. 2Kawasa ḇekain ro myos ani senaḇye faro nko. Sikaḇen for ḇeba oso ma sembuk nko fa nkodapen for ani snar mekem ya iḇe imyun ma pnunek ya iba. 3Fafisu Paulus iryur ai snaw-snaw ono fa ḇyuk kaḇen for ya, ikak ḇeknampu oso isasyar ro moḇ ani ma darek Paulus ḇrasi. 4Rofyor snonkaku ansi smam ikak ḇekur ro Paulus ḇrasi ani, sawos yae si ḇo soḇo: “Snon ine snon mamun dirya, snar, isma faspar kwar ro soren, ḇape Karwar Napnapes ḇyuk fa ikenem ḇa.” 5Ḇape Paulus kyekef ikak ani ḇefor ya dori, ḇoi isyur ikak ani ḇa. 6Rarirya skara ḇo soḇo, nari ḇrasi iḇyar roḇaido nari imar ḇo isapi ro fafisu ani beri. Ḇape siwaf fyoro kwar, ma smam royo ḇa ḇekuri, inja skara wer ḇo soḇo karwar oso irya.
7Swafoḇa ro moḇ ani kosma gubernur ro myos ani saprop ḇyedi. Gubernur ani snori Publius. Isrow nko ma fyan nko pyum kaku ḇeras rikior. 8Ro fafisu ani Publius kmari isam ma isar. Paulus syun ro sim ḇyedi; Paulus ḇyenadi ma isawar dofen i ma ḇyuk pararei faro i. 9Snar roi ḇeḇesya ani ifnai fa ḇeduf ḇeso ro myos ani sra faro Paulus ma ifrur si fa siprei kako. 10Kawasa ansi semaf nko ma rofyor nko syoḇ ro dia, sfasos roi ḇeḇaryam faro nko.
Paulus ifyafer ro Roma
28:11-16
11Ḇarpur ro paik rikior nko syoḇ ro dia nkek kapal beraker Aleksandria ro fafisu primya ḇepyar ro myos ani. Kapal ani ḇyekakop Dioskuri. 12Nkosma rande ro Sirakusa ma nkokain ro dia beras rikior. 13Ro dia nko sye siser, ma nkorande ro Regium. Ras oser posa wambraw ya iso ma ro ras ḇeḇesuru ya nko rande ro Putioli. 14Ro dia nko srow kina-kina jemaat, ma raris fararyor sedi nkokain nus si ḇeras rifik. Posa kwar nkosyoḇ ḇe Roma. 15Naek srar ḇekain ro diwa simnaf nko kwar ro roi ḇekur nko inja srama sisrow nko isof ro Forum Apius ma Tres Taberne. Rofyor Paulus myam si, ikofen kasumasa faro Allah ma isma samambraḇ ro sneri.
16Nkora kwar ro Roma, ssḇuk faro Paulus fa kyain ro rum mankundi ḇyedi kuker sordade oser ḇewareni.
Paulus ma kawasa Yahudi wawos sena ro Roma
28:17-29
17Ḇarpur ro ras rikior Paulus dor snonkaku ḇebarara er Yahudi ma rofyor siryur kwar, Paulus ikofen ḇo doḇo: “Naek srar, yafawi yafrur sasar oso faro er koḇesi ḇa roḇaido rari kpu koḇesi sena ḇa, ḇesyaḇo sfor aya ro Yerusalem ma sḇoḇ aya faro kawasa Roma. 18Rofyor skukeḇ aya kwar, simarisen sisasyar aya, snar sisma sasar oso ḇaḇeri ro aya ḇefasnai yasmai samamyai marmar. 19#Kis. 25:11Ḇape kawasa Yahudi sisampum si inja yakarai ipyum syadi yek mankara faro Kaisar, ḇape kuker karkara ḇa fa yaḇuksof er ayedi. 20Knam ine iso yor mko muma, insa yamam mko ma yawawos kuker mko, snar kakyar kawasa Israel eḇedari sfes aya kuker wanka ine.”
21Ḇape sikofen faro i soḇo: “Nkosma syap ono ro Yudea ḇa ḇekofen ḇadir au ma naek oso ryama ikofen ḇadir roi ḇesasar ro au faro nko ḇa. 22Ḇape nko marisen nkomnaf ro au, rariso swaruser ḇena, snar nko fawi ro ḇar ine, ro moḇ nakam kako ifnai famfaḇri.”
23Raimnai sap ras oso faro Paulus. Ras sap ani srama kuker dandonek ḇeba ḇemoḇ Paulus ḇyeryar roya. Ḇyuk fasasnai ma kesaksian faro si ḇekur Ḇaḇesasoser Allah; ma knam ro Moses sasoser ḇyena ma syap ro nabi-nabi ḇyesewar fa insa sifawi ro Yesus. Wawos ani ro arwo isof mandira. 24Ono sikyar wos ḇyena ḇoi ono kada sikyar ḇa. 25Fananjur ani sibur ḇesisye kuker sna swaruser oser ḇa ro fandu si. Ḇape Paulus ikofen kako wos ine ḇo doḇo: “Kyurbos beri Rur Ḇesren ya wos ikofen faro kpu koḇesi kuker sḇayo Nabi Yesaya:
26 #
Yes. 6:9-10
Mkora faro er ine, ma mkokofen:
‘Nari mkomnaf kuker knaram mkoḇesi, ḇesyaḇo mkokara ḇa,
nari mkomam kuker mkamor mkoḇesi, ḇesyaḇo mkofawi ḇa.
27Snar er ine sisnesna nedip kwar, ma siknasna nadiw,
ma simkasna nenef; insa smam awer kuker simkasna
ma simnaf awer kuker siknasna ma sifawi awer kuker sisnesna,
isof skaḇer ma yaḇuk pararei faro si.’ ”
28“Inja insa mkofawi, korer ḇeraker Allah ani nari ḇyeḇeḇaryas faro er-er ḇeso ma nari simnaf i.” [29Ma Paulus dawos rarirya faro si kwar, kawasa Yahudi ansi sibur ḇesisye kuker sna swaruser oser ḇa ro fandu si.]
Paulus ḇyaryas Allah Ḇaḇesasoser Ḇyedi ro Roma
28:30-31
30Ma Paulus kyain wampasi wambarek risuru ro rum mankundi ḇyakwarek ya; snonkaku ḇeḇor ḇerama faro i sya isrow si. 31Kuker isnai kaku ma royo idwarek ḇa ḇyaryas Allah Ḇaḇesasoser Ḇyedi ma ḇyuk farkarkor ḇekur Manseren Yesus Kristus.
Actualmente seleccionado:
FARFYAR RO MANWAWANSYA 28: LAIBHW
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión