ROMA 2
2
Snonkakusya kam sisma samamyai ro Allah
2:1-16
1 #
Mat. 7:1; Luk. 6:37 Inja snonkaku awne, woḇo buk samamyai faro snonkakuyo ḇese? Ḇape mankundaw ḇardi wakfis ro sasaryaḇa. Snar rofyor buk samamyai faro snonkaku ḇese anya, rarirya buk samamyai ḇardi kako, faro mankundaw snar aw kako wakfrur rarirya. 2Ḇape kofawi mboi rofyor Allah ḇyuk samamyai faro snonkaku ḇefrur rariryansya wos ḇyena nanapes. 3Inja snonkakuyo buk samamyai faro snonkaku ḇese ḇesasarsya, ḇape awḇardi wakfrur sasar kako, inja kwara ḇo woḇo, nari wakfisbur Allah samamyai ḇyukya? 4Oroḇaido woḇo mamkyof Allah saswar ma kaḇaḇaḇ ḇyenake? Mkokam nari mkofawi mboi Allah saswar kaḇaḇ fyasna faro mko kwarya, doḇo insama mkombror ro sasar mkoḇena. 5Ḇape mkoḇrumna npakrek ma mkomewer mkosadwer kenem ḇeḇarḇor mkoḇenandi. Inja mankunmkoiso ḇefanfon samamyai mkoḇena fa nmarḇak syadi wer, rofyor masasor ma samamyai ḇenapes ro Allah ḇyeḇefasnai ro ras ḇepupesya. 6#Mzm. 62:13; Ams. 24:12Snar Allah nari myunsu faro snonkaku oser-oser raris fararur ḇyena. 7Kankenem ḇekain fyoroya ro Allah ḇyuk faro mansei ḇeḇeuser ma ḇeḇenaḇye, sisma syowi ma sanandik ḇekain fyoro-fyoro. 8Snonkaku ḇewasen mankunsi ma ḇemewer ḇeḇeyuser Allah ma ḇefrur ḇarḇorsya, Allah imsor fafaya siḇa. 9Mansei ḇemarisen ḇefrur roi ḇeḇarḇorsya, nari sḇekandera; ḇepon faro kawasa Yahudisya ma er ḇesesya kako. 10Ḇape faro snonkaku ḇemarisen ḇefrur roi ḇeḇyesya, nari sisma sanandik ma ḇaḇesyowi ma aski ro Allah; ḇepon kaku faro kawasa Yahudisya, ma faro er besesya kako. 11#Ul. 10:17Snar Allah ifrur faro snonkakusyakam fa namnis.
12Inja snonkaku ro er-er ḇese ḇeyakfawi sasoser agama Yahudiḇasya sasar sena nari sisma samamyai ro ḇandibur sasoser anna. Ḇape Yahudisya sḇesasar snar sifawi sasoser anna; rarirya sasoser anna naiso nari sḇukisof sina. 13Snar snonkaku ḇemnaf sasoser Refo Yahudi ansya siso Allah ḇyuk napnapes farosyaba, mboi snonkaku ḇeḇeyuser sasoser Refo Yahudi siso Allah ḇyuk napnapes farosya. 14Snonkaku er ḇese ḇefawi sasoser agama Yahudiḇa. Ḇape rofyor mankunsi simarisen sifrur rosai sasoser anna nakofen, rariryaido mankunsi sisnesna naiso ḇeḇesasoser farosi. 15Snar kuker rari sena, nfasna ḇadir mboi rosai sasoser anna nakofen, neḇefas ro sisnesna. Ma sneuser sena kako nfasna sasoser anna, snar fyornoido nbuk sasar faro mankunsi, ma fyornoido nbuk kaku faro mankunsi. 16Rarirya roi nari ḇerarirya ro ras sikofen ani. Ro ras ani-imnis Ankankinem Ḇeḇye yaḇaryas-kuker Yesus Kristus Allah nari ḇyuk samamyai faro roi ḇeborkam ḇeyokef ro sne ma kakara snonkaku.
Kawasa Yahudi ma sasoser agama sedi
2:17-29
17Ḇape, rariso kuker naek srar mko ro baboine? Naek srar mkokarem mankunmkoḇe snonkaku Yahudi ma mkokaf ro sasoser agama Yahudi, ma mkomarares kuker ḇaḇesasoser anna kuker Allah, 18naek srar mkosma fasasna ro sasoser anna, isof naek srar mkofawi Allah marisen ḇyena ma mkofawi rosai ḇeḇyeya. 19Naek srar mkofawi kaku mboi mkoḇe manfarkin faro snonkaku ḇeprafsya ma mkoḇe isna faro snonkaku ḇekain ro pampansya. 20Naek srar mkofarkor snonkaku ḇefawi royoḇasya, ma mkoḇe guru faro romawasya. Naek srar mkofawi kaku, mboi ro sasoser Refo Yahudi anna, mkosma fawawi ma farkarkor ḇenapesya. 21Naek srar, mkoḇuk farkarkor faro snonkaku ḇesesya; inja, snaro naek srar mkofarkor mankunmkoḇa? Naek srar mkofarkor snonkaku besesya insa skaraw awer, ḇape mankun mkoido mkokarawke? 22Naek farkor snonkaku ḇesesya fa sifrur farbuk awer, ḇape mankundaw ido wafrur farbukke? Naek wayin faro karwarsya, ḇape mankundaw ido fasyar papus ḇero rum karwarsya sena fa nwanake? 23Naek waryaḇ snar nwa Allah sasoser ḇyena Musa ḇyuk kwarna, ḇape mankundaw ido wonef Allah ma wamewer waso sasoser ḇyenake? 24#Yes. 52:5Ro Refo sfas radine, “Snar mko snonkaku Yahudi Allah snonsnon ḇyedi ḇyeḇeyonef rofandu er-er ḇesenakam.”
25Rofyor naek srar mkoḇeyuser sasoser ro agama Yahudina ido, sofakfuk mkoḇani ḇyefandun kako. Ḇape rofyor naek srar mkoḇeyuser ḇaḇesasoser aniḇaido, sofakfuk mkoḇena nefromo munda. 26Rofyor snonkaku ḇeḇe Yahudiḇa oso sisofukiḇa, mboi ḇyeuser sasoser agama Yahudi anna ido, nari Allah kyoriḇe snonkaku ḇesofukḇake? 27Rarirya, snonkaku ḇeyaksofukḇasya nari ssḇuk samamyai faro kawasa Yahudi ḇesma sasoser ma ḇesofuksya, snar sikada sisma sasoser agamaḇa ma sisofukḇa, fama siso naḇye sasoser agama anna. 28Snar snonkaku Yahudi kakusya, snonsnon Yahudi mundaḇa; ma snonkaku ḇesma sofakfuk ro baken mundaba. 29#Ul. 30:6Ḇape snonkaku Yahudi ḇekakusya siso ḇesma sofakfuk sne ro Allah Rur ḇyeja ma ḇesma fasapepen munda ro syap snonkaku senaḇa. Snonkaku ḇerarirya ansya sisma sanandik ro snonkaku ḇesesyaḇa, mboi sisma sanandik ro Allah.
Actualmente seleccionado:
ROMA 2: LAIBHW
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión