LUKAS 9
9
Nanusub i Jisus ra mopor am ruo ngaulun maamaya' Nano
(Mat. 10:5-15; Mrk. 6:7-13)
1Piawo' ri Jisus mopor am ruo ngaulun maamaya' Nano. Anii' No ilo ra kapandayan am kuasa' mampagiru' ra riwato am mamabas ra ulun marualan. 2Susubo' No boo ilo mongoi pamabas ra ulun marualan am pampabala' ra ati kulaan i Aki Kapuuno' mamarinta. 3 Indagu i Jisus risilo, “Pai' kau pagibit ra atan ayuk pana ra ugar mino. Pai' kau pagibit ra susukur, katia' pakitaakan, akanon, ruit kapoam bayang ralinan. 4Ati ayuk intok mangapu ramuyun, ayan kau ra baloi raginio saboi manding kau ra intok ra bokon. 5Ati ayuk intok kalo mangapu ramuyun, iruani' min am kabuli' min kaau ru kasut mino koson mampakara' toojo risilo.”
6Ugar maamaya' ri Jisus am ongoi ilo ra moonong pamagunan mampabala' ra Tanou Moonsoi am mamabas ra ulun marualan ra ati ayuk nasukuan nilo.
Magalabo i Irodis
(Mat. 14:1-12; Mrk. 6:14-29)
7 Pakaining i Irodis, raja' ru libung Galilia, ra ngaangai' ondo' nasauk no, nagalabo io boo sabap ra kon ru ulun, “Naayag saguli' i Juanis Mampariu'!” 8Mokoondo' poyo minindagu ra i nabi Ilia naayag saguli'. Bokon i poyo minindagu ra sangulun nabi ra bokon intor ra nabi ra galing i naayag saguli'. 9Indagu i Irodis, “Pinaingguluan ku noyo i Juanis. Kaa' osoi poyo sotopot no ulun ragitio? Masuang norongog ku ra tunung intor Riso.” Ginio boo ra gumogot toojo i Irodis tumuum ri Jisus.
Nampaakan i Jisus ra limo ngaribu ngaulun
(Mat. 14:13-21; Mrk. 6:30-44; Jua. 6:1-14)
10Saguli' rasul-rasul am pantunung ilo ri Jisus ra ngaangai' binaal nilai. Ibito' ilo ri Jisus ra rondo' intok masiluk mamaar ra pekan Bitsaida. 11Pakatutun ulun masuang no ra giu' Io, sunu' ilo ri Jisus. Apuo' No ilo am pantunung Io ati kulaan i Aki Kapuuno' mamarinta am namabas Io niayuk ra ulun marualan.
12Ra iopalunggai', ratong mopor am ruo ngaulun maamaya' Nali am indagu, “Intok ragitio masiluk. Moonsoi susubon Mu ngaangai' ulun no muli' koson makauyum ilo ra akanon am pambalangan ra ati ayuk pamagunan ondo' nakainggaar no.”
13Kaa' taam i Jisus, “Akau ayuk pana mampaakan risilo.”
Indagu maamaya' Nano, “Kaa' limo ngampila' ruti' am ruo ngaunor papait ayuk soroi ramon. Mongoi akai kia bali ra akanon koson pataakin risilo ti?” 14(Suang ru ungkuyon ra giu' i limo ngaribu ngaulun.)
Indagu i Jisus ra maamaya' Nano, “Pantulibungo' min ilo ra kukula' ngampulupuk, limo ngoopor ngaulun ra sampulupuk.”
15Gagayaa' nilo nanusuban ri Jisus i. 16Alapo' ri Jisus limo ngampila' ruti' am ruo ngaunor papait i. Pantingaa' Io ra limbowon am paringkuanang ri Aki Kapuuno'. Pipilango' No ruti' am papait no am pataaki' ra maamaya' Nano koson tatayaron ra ulun-ulun no. 17Pagagakan ilo ngaangai' saboi naasug. Luluro' ru maamaya' ri Jisus suwo ru akanon i am suang no mopor am ruo ngambakul.
Pangintapatan ri Pitrus ri Jisus
(Mat. 16:13-19; Mrk. 8:27-29)
18Igondo' ragili, tatanga' i Jisus misasangulun makiasi', ratong maamaya' Nano Riso. Pangkuot i Jisus risilo, “Maya' ra ragu ru ulun, osoi kia Aku ti?”
19 Taam ilo, “Mokoondo' mindagu ra i Juanis Mampariu' kou lair. Mokoondo' mindagu ra nabi Ilia kou. Bokon no poyo mindagu ra okou ti lair sangulun intor ra nabi ru galing i ondo' naayag saguli'.”
20 Pangkuot i Jisus, “Kaa' maya' ra pamaguangan min, osoi kia Aku ti?”
Taam i Pitrus, “Okou noyo i Kristus, Mamamayag ondo' sinusub ri Aki Kapuuno'.”
Nambala' i Jisus ra kaimbalaan am patayan Nano
(Mat. 16:20-28; Mrk. 8:30—9:1)
21Pangampol i Jisus risilo koson kalo mambala' ra baal raginio ra osoi ayuk pana. 22Tungguli' ri Jisus, “Anak ru Ulun musiti' maimbolo' toojo am anggalon ru tingganai ru ulun ru Jaudi, tingganai imam Jaudi am mangingila' ra Ukum ri Musa. Potoyon io, kaa' malupus kataluan bayagon Io saguli'.”
23 Indagu Io risilo ngaangai', “Osoi masaga' maya' Raki' no, lilianin no katasuan ru kaayagan nano galama'. Moonong orou mansaan io ra salip nano galama' am maya' Raki'. 24 Ulun ondo' masaga' maya' ra kasagaan nano galama' kalo makaalap ra kaayagan mantilayun. Kaa' ulun ondo' mampataak ra kaayagan nano, arati' no gumagaya' io Raki', io no makaalap ra kaayagan mantilayun. 25Atan onong ru sasangulun no amon ru makaalap io ngaangai' rapu' ru tana' ti, kaa' maluusan am mapusaan io ra kaayagan nano? Maaru' kolondo' onong. 26Osoi ayuk mauyu' mangiou Raki' am pangilaan Kuno, Anak ru Ulun pana mauyu' mangiou ra ulun no paat ra Io matong ra tauli no. Matong Io mabaya' ra katulayan Nano am niayuk Ama' Nano am poyo katulayan ru malaikat-malaikat ondo' matulai kaga'! 27Balain takamin ra mokoondo' niayuk ulun ragiti ondo' kalo matoi saboi makakito ilo ati kulaan i Aki Kapuuno' mamarinta.”
Katulayan ri Jisus
(Mat. 17:1-8; Mrk. 9:2-8)
28 Pakasaminggu' i Jisus nangila' ra ngaangai' ondo' pangilaan ra raitii' ni, ibito' No boo i Pitrus, Juanis am i Jakubus ra rasawat ru rondo' gunung mongoi pakiasi'. 29Liliwa' Io makiasi' ra giu' i, minalui bulos Nali am binayang Nali pana nasauk ra mapulak manguliat. 30Pulusat ru ruo ngaulun nabi, io no i Musa am i Ilia, nagigindagu ri Jisus. 31Karuo nabi ti minintalang nabaya' ra sinda intor ra suruga' am nagigindagu ilo ri Jisus intor ra baal ru patayan Nano ondo' masauk giu' ra Jirusalim ra maagu no. 32Paat ragili nakalunus i Pitrus am rangan-rangan nano. Kaa' kakarat ilo am kakito nilo i Jisus nabaya' ra katulayan Nano am mokoondo' poyo ruo ngaulun minigor nabaya' Riso. 33Paat ra ruo ngaulun no sumaguli' mangiruan ri Jisus, indagu boo i Pitrus, “Tuan, moonsoi toojo itakau ragiti. Mangkalukub akai talu ringai'. Rondo' Rirun no, rondo' ri Musa am rondo' niayuk ri Ilia.” (Minindagu i Pitrus kon raginio sabap ra kalo nakapandai io ra atan ondo' sotopot no raguon.)
34Liliwa' i Pitrus lakat ayuk poyo minindagu, ratong boo gaun nangulumput saboi nalaa' ilo kaga'. 35 Kaining nilo bolos intor ra gaun minindagu, “Gitio noyo Anak ondo' pinili' Kutu. Pangkirongog kano Riso!”
36Longgo' bolos i am kakito nilo misasangulun ayuk boo i Jisus ra giu' i. Nongkoror maamaya' Nano am kalo nambala' ilo ra atan ondo' nakito nilai ra osoi ayuk pana.
Namabas i Jisus ra sangulun lalaing sinubol ru riwato
(Mat. 17:14-18; Mrk. 9:14-27)
37Io suabon, tuun i Jisus intor ra gunung i nababaya' ra talu ngaulun maamaya' Nali. Masuang ulun minuma' ri Jisus. 38Sangulun intor ra ulun giminolok makiasi', “Mangingila', ongoyo' raki' ilai' anak langkuir kuno! 39Paat io subolon ru riwato mompopogolok io am inan nano pana kumakang saboi manamputa' kabang nano. Imboloon io ru riwato no ondo' kalo masaga' mingkual intor riso! 40Nakiindangan aku noyo ra maamaya' Muno mampagiru' ra riwato no kaa' kalo naalap nilo.”
41Taam i Jisus, “Akau ti toojo kalo mangintopot am nakalayau! Kalo boo tumaan Aku sumimpung ramuyun!” Indagu boo i Jisus ra ama' ru lalaing no, “Ibito' lalaing muno ragiti!”
42Pakainggaar lalaing no ri Jisus, pinagiampas io ru riwato no am inan nano pana kumakang. Kaa' susubo' ri Jisus riwato no magiru' am babaso' no lalaing i. Pasagulio' boo lalaing i ra ama' nali. 43Nangimuag ngaangai' ulun nakakito ra gayo ru kuasa' ri Aki Kapuuno'.
Nambala' poyo i Jisus ra patayan Nano
(Mat. 17:22-23; Mrk. 9:30-32)
Paat ra ulun-ulun no lakat ayuk poyo nokosolong nagilong ra binaal ri Jisus, indagu Io ra maamaya' Nano, 44“Rongogo' am aratio' min bilin Kutu ragitio: Inaru' noyo ra Anak ru Ulun pataakin ra kuasa' ru ulun.” 45Kaa' kalo nangarati' maamaya' Nano ra rinagu Nali, sabap ra kalo poyo pinatalang risilo arati' ru bilin ragitio am malaa' ilo poyo mangkuot Riso.
Osoi maatang kaga'?
(Mat. 18:1-5; Mrk. 9:33-37)
46 Nagagansang maamaya' ri Jisus ra osoi maatang kaga' intor risilo. 47Nakapandai i Jisus ra pangkaraan nilai, piawo' No boo sangulun lalaing am susubo' no minigor ra kiing Nali. 48 Indagu Io boo ra maamaya' Nano, “Ulun ondo' mangapu ra lalaing ti sabap ra Aku, arati' no mangapu io niayuk Raki'. Ulun ondo' mangapu Raki', mangapu niayuk Riso ondo' nanusub Raki' i. Sabap ra io ondo' kalo maatang ra pamaguangan min ngai', sotopot no io no ondo' maatang kaga'.”
Osoi kalo manggal ritakau, io no bala takau
(Mrk. 9:38-40)
49Indagu i Juanis, “Tuan, nakakito akai ra sangulun ondo' nampagiru' ra riwato ralalom ra inggalan Muno. Inggalari' mai io sabap ra io sala' ka bala takau.”
50Indagu i Jisus ri Juanis am maamaya' Nano ra bokon, “Pai' io inggalari'! Sabap ra osoi kalo manggal ramuyun, arati' no io no bala min.”
Mamagun ru Samaria kalo nangapu ri Jisus
51Paat ra mamaar noyo pangakatan ri Jisus mongoi ra suruga', aruo' No ra mongoi Io ra Jirusalim. 52Susubo' No ulun bokon sumigulu Riso. Ugar ulun ondo' sinusub Nano suku' ra rondo' pamagunan giu' ra Samaria. Giu' i pongoonon nilo pambalangan ri Jisus. 53Kaa' mamagun ra giu' i kalo masaga' mangapu ri Jisus, sabap ra nakapandai ilo ra mangkiralan Io mongoi ra Jirusalim. 54 Katutuni' ru maamaya' no, i Jakubus am i Juanis, ra baal raginio, indagu ilo ri Jisus, “Tuhan, masaga' Kou kia ru kitaakon mai apui intor ra suruga' mamuso risilo?”
55Talikur i Jisus am pansawai risilo. 56Ugar ilo boo ongoi ra pamagunan ra bokon.
Ulun ondo' masaga' sumauk ra maamaya' ri Jisus
(Mat. 8:19-22)
57Liliwa' i Jisus am maamaya' Nano nanunggul ra pangkiralanan nilai, mokoondo' sangulun mindagu ri Jisus, “Maya' aku Rirun ra ati ayuk pana!”
58Taam i Jisus, “Munin mokoondo' ra luang no galama' am susuit ra bunsut no galama', kaa' Anak ru Ulun kolondo' intok luyaan am tangusan.”
59Indagu boo i Jisus ra sangulun poyo, “Baya' no Raki'.”
Kaa' indagu ulun i, “Ongoyo' ku poyo galing lobongo' baangkai ru ama' kuli.”
60Taam i Jisus, “Kalo pana. Polosoo' ayuk ra ulun ondo' kalo maya' Raki' mompolobong ra baangkai no. Kaa' okou, ongoi no pampabala' ra i Aki Kapuuno' timinalimpuun noyo mamarinta.”
61 Indagu poyo bokon i, “Tuan, maya' aku Rirun, kaa' uli' aku po galing pambala' ra pabukat-pabukat kuno.”
62Taam i Jisus, “Ulun ondo' tumalimpuun mamparadu' am magail ayuk mangkaili ra talikuron, kalo maaya' masauk ra ulun ri Aki Kapuuno'.”
Currently Selected:
LUKAS 9: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.