LUKAS 10
10
Nanusub i Jisus ra tulu' ngoopor am ruo ngaulun maamaya'
1Pampili' boo i Jisus ra tulu' ngoopor am ruo ngaulun poyo maamaya'. Susubo' No ilo tumaruo sumigulu intor Riso mongoi ra moonong bandar am intok apitan Nano. 2 Indagu i Jisus risilo, “Kumoson no mauli' kaga' kaa' ulun mangkukumos no kalo masuang. Pakiasi' kano ri Aki Kapuuno' ondo' tatangan ra kumoson ti koson manusub Io poyo ra ulun mangkumos ra umo no. 3 Ugar kano! Susubon takamin koson ra anak domba ra tatanga' ru taani. 4 Pai' kau pagibit ra rumpit kapoam katia' pakitaakan kapoam kasut. Pai' kau uog tumabi' ra osoi ayuk pana matuum min giu' ra ralan. 5Ati ayuk pana baloi umpasan min, indagu kau ra, ‘Kaansayan sumoroi ra baloi ragitio.’ 6Amon ru mamagun no masaga' ra kaansayan, polosoo' noyo tabi' mino soroi riso. Amon ru kalo, tabi' no sumaguli' ramuyun. 7 Ayan kau ra baloi no. Atan ayuk akanon am inumon pasulungon ramuyun, apuo' min ayuk. Sabap ra sangulun mangangandoi maaya' makaalap ra ampos ru kandoi nano. Pai' pababanding ra ayanan. 8Amon ru sumubol kau ra rondo' bandar am apuon kau ru mamagun no, akano' min ayuk ondo' pasulungon ramuyun no. 9Babaso' min ulun marualan ra giu' no am pambala' risilo, ‘Mamaar noyo i Aki Kapuuno' tumalimpuun mamarinta ramuyun.’ 10 Kaa' amon ru sumubol kau ra rondo' bandar am kalo apuon, ongoi kau ra ralan maayo am indagu ra; 11‘Kaau pana ru bandar min ti ondo' siminokot ra kasut mai ti, kabulin mai ra saang min. Kaa' karaa' min, mamaar noyo i Aki Kapuuno' tumalimpuun mamarinta ramuyun.’ 12 Balai' takamin, paat Orou Pupus no, maayo poyo guang ri Aki Kapuuno' makaasi' ra ulun bandar Sodom intor ra bandar raginii!”
Bandar-bandar ondo' kalo mangintopot
(Mat. 11:20-24)
13 “Mumpara' boo laat ru bandar Korajin! Mumpara' boo laat ru bandar Bitsaida! Amon ru kaimuagan ondo' binaal ra tatanga' min nabaal noyo giu' ra bandar ru Tirus am Sidon, lair poyo ulun ru giu' i timinalikur intor ra tula nilai am nangulir! 14Paat ra Orou Pupus no, maayo guang ri Aki Kapuuno' makaasi' ra ulun Tirus am ulun Sidon ka akau! 15 Am okou, pekan Kapirnaum! Kara' muno, painsawaton kou kia saboi ra suruga'? Patirin kou nai ra naraka!”
16 Indagu i Jisus ra maamaya' Nano, “Osoi ayuk mangkirongog ra raguon mino, mangkirongog niayuk Raki'. Kaa' osoi ayuk manggal ramuyun, manggal niayuk Raki'. Osoi ayuk manggal Raki', manggal niayuk Riso ondo' nanusub Raki'.”
Siminaguli' katulu' ngoopor am ruo ngaulun ra sinusub ri Jisus
17Katulu' ngoopor am ruo ngaulun ondo' sinusub ri Jisus i naansukan kaga' ra ilo siminaguli' tuum Riso. Konilo, “Tuhan, riwato-riwato pana giminagaya' paat sinabit mai inggalan Muno ra akai nampagiru' risilo!”
18Indagu i Jisus risilo, “Nakito Ku Tingganai ru riwato naratu' intor ra limbowon koson ra ganit. 19 Rongogo' min! Inanian takamin ra kuasa' manginjang ra kukuo makabisa' am lingait am niayuk kuasa' makaanggal ra ikang ru pantula' mino. Kolondo' mampakaruol ramuyun. 20Kaa' kabalu' pana koson raginio, pai' kau pakaansuk sabap ra riwato-riwato gumagaya' ramuyun, kaa' pakaansuk kano sabap ra inggalan mino tinulisan noyo ra suruga'.”
Naansukan i Jisus
(Mat. 11:25-27; 13:16-17)
21Paat ragili niayuk naansukan i Jisus ra kinuasa' Io ru Ambiluo ri Aki Kapuuno', indagu Io, “Ama', Tuhan ru limbowon am tana'! Paringkuanangan Kuno Rirun sabap ra pinakito Mu noyo ra ulun kolondo' kapandayan ondo' pinasibuni Muno intor ra ulun mapintar. Ama', ginio noyo kasagaan Muno.
22 Pinataakan ri Ama' ngaangai' Raki'. I Ama' ayuk rondo' makaulig ra Anak am Anak ayuk rondo' makaulig ra Ama'. Am osoi ayuk kasagaan ru Anak no mambala' am mampaulig ra Ama' Nano.”
23Pangkaili boo i Jisus ra maamaya' Nano am indagu risilo ayuk, “Mumpara' boo bonsoi min ondo' makakito ra inilayan mino raino ti! 24Balai' takamin, intor noyo ra galing i masuang nabi am raja' masaga' milong ra nakito min ti, kaa' kalo nakakito ilo. Masaga' ilo rumongog ra naining min ti, kaa' kalo nakaining ilo.”
Abig intor ra ulun ru Samaria ondo' moonsoi guang
25 Ratong sangulun mangingila' ra Ukum ri Musa ri Jisus koson mangkinam Riso. Pangkuot io, “Tuan! Atan kia baalon kutu koson makaalap ra kaayagan mantilayun?”
26Taam i Jisus, “Atan kon ru Buuk Kitab? Atan pamaguangan muno raginio?”
27 Taam ulun i, “ ‘Tagami' noyo Tuhan i Aki Kapuuno' muno, ra ngaangai' ru guang muno, saliguor muno, ikang muno am pangkaraan muno’; am ‘Tagami' noyo ulun ra bokon koson okou niayuk monogom ra kaayagan muno galama'.’ ”
28 Indagu i Jisus riso, “Motopot taam muno. Baalo' noyo ginio, am maayag kou.”
29Kaa' mangingila' ra Ukum ri Musa no masaga' mampakito ra io motopot. Pangkuot io, “Osoi ulun ra bokon ondo' tagamin kuno?”
30Taam i Jisus, “Mokoondo' sangulun intor ra Jirusalim mongoi ra Jiriko. Inawangan io ru ulun malaat am ginaawan ra kuliamos am linamba' io ru giali am pinoloso io nalausan. 31Nakainamot ragili nansail sangulun imam Jaudi ra giu' i. Kakito no ulun nalausan i, pagiliu io. 32Koson niayuk ra sangulun papag ru Liwi, mangingindangan ra imam, nansail ra giu' i. Inggaari' am ilai' no ulun i, kaa' saili' no ayuk am ugar. 33 Kaa' mokoondo' sangulun intor ra libung ru Samaria nansail ra giu' i. Kakito no ulun i, makaasi' io kaga' riso. 34Inggaari' no ulun i, tapisi' no pipilat nali ra umau am wain am bongkoso' no. Posokoyo' no boo ulun i ra kaladai nano am ibito' no ra baloi siwa' am alungi' no ra giu' i. 35Io suabon, anii' no tatangan ra baloi siwa' i ra ruo ngampila' ruit pirok am ragui' no, ‘Alungi' ulun no am paat ra aku sumaguli' ragiti, bayarin tokou poyo ra atan ayuk pinaruang muno ra ondo' kalo naukop no.’ ”
36Pupusi' boo ri Jisus, “Guang muno, osoi intor ra talu ngaulun ti motogom ra ulun tinakawan i?”
37Taam mangingila' ra Ukum ri Musa i, “Ulun ondo' makaasi' riso no.”
Indagu boo i Jisus, “Ugar am bayaa' noyo paliso koson raginio!”
I Marta am i Maria
38 Paat ri Jisus am maamaya' Nano nangkiralan, minapit ilo ra rondo' pamagunan. Giu' i, mokoondo' sangulun ruandu' makainggalan ri Marta nangapu risilo ra baloi nali. 39I Marta ti mokoondo' sangulun pongkotob ra ruandu' makainggalan ri Maria. Nanturung i Maria ra tuma' ru kalayam ru Tuhan Jisus mangkirongog ra pangilaan Nali. 40Kaa' magalabo i Marta sabap ra masuang kandoi baalon nano. Inggaari' no i Jisus am indagu, “Tuhan, polosoon Mu ayuk kia pongkotob kutu kalo mangindangan raki'? Susubo' io mangindangan raki'!”
41Taam i Jisus, “Marta, magalabo am maimamang kou ra masuang baal. 42Kaa' sotopot no rondo' ayuk maaru' baalon muno. Ondo' pinili' ri Maria ti motopot, am tumilayun ginio riso.”
Currently Selected:
LUKAS 10: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.