LUKAS 8
8
Ruandu'-ruandu' ondo' nangindangan ri Jisus
1Kalo nabuoi ragili, mugar-ugar i Jisus ra masuang bandar am pamagunan. Nampabala' Io ra Tanou Moonsoi ra i Aki Kapuuno' tumalimpuun noyo mamarinta. Mopor am ruo ngaulun maamaya' Nali minaya' niayuk Riso. 2 Mokoondo' niayuk kukula' ngaulun ruandu' minaya' risilo. Gili pinagiru' noyo ri Jisus riwato intor risilo am binabas ilo intor ra maruol nilai. Ilo ti am i Maria, ondo' poyo sabiton Magdalina, ondo' sinubol ru tulu' riwato kaa' pinagiru' noyo ri Jisus; 3i Joana, andu' ri Kuja, pagawai ra istana raja' Irodis, i Susana am masuang poyo ruandu' ra bokon. Masalok ilo mangindangan ri Jisus am maamaya' Nano koson mangani' risilo ra balanja'.
Abig ra sangulun mapatias ra sampug
(Mat. 13:1-9; Mrk. 4:1-9)
4Saguguluyur ulun masuang matong ri Jisus. Intor ilo ra nansalinut bandar am pamagunan. Pakatimung masuang ulun, tunungo' ri Jisus abig ragitio risilo:
5“Mokoondo' sangulun mangandoi ra umo mapatias ra sampug. Paat io napatias i, mokoondo' naratu' ra bayaan ru ulun saboi kininjangan am niayuk inakan poyo ru susuit. 6Mokoondo' niayuk naratu' ra tana' makabatu. Paat ra tutuu' ti minulai, liminonot io ra mataki' sabap ra tana' no mapua' kaga'. 7Mokoondo' poyo sampug naratu' ra tana' makakusingan. Karuruo timinuu'. Kaa' napisi' tutuu' ti ru kusingan saboi minatoi. 8Kaa' sampug ondo' naratu' ra tana' malabung, timinuu' am nanangkawa' ra maatus poyo ruli'.”
Pupusi' boo ri Jisus ra bolos mosongou, “Rongogo' am karaa' min toojo!”
Kua baalo' ri Jisus ra abig
(Mat. 13:10-17; Mrk. 4:10-12)
9Pangkuot maamaya' ri Jisus ra arati' ru abig i. 10 Taam i Jisus, “Binalaan kano ondo' kalo igondo' pinabala' ra ati kulaan i Aki Kapuuno' mamarinta. Kaa' ulun ra bokon ilaan ayuk ra pagabigan; ra kabalu' pana monontong ilo kaa' kalo makakito, mangkirongog ilo noyo kaa' kalo makarati'.”
Arati' ru abig ra sangulun mapatias ra sampug
(Mat. 13:18-23; Mrk. 4:13-20)
11“Gitio noyo arati' ru abig no: Sampug no am bala' intor ri Aki Kapuuno'. 12Ondo' naratu' ra bayaan ru ulun i, io no ulun ondo' mangkirongog ra bala' ragitio. Kaa' ratong tingganai ru riwato am alapo' no bala' no intor risilo koson kalo boo mangintopot am kalo boo bayagon ilo. 13Ondo' naratu' ra tana' makabatu i, io no ulun ondo' mangkirongog ra bala' no am maansukan ilo mangapu. Kaa' bala' no kalo siminoroi ra guang nilai. Sangkinolor ayuk ilo mangintopot. Pakauma' ilo ra pangkinaman kalo boo mangintopot ilo. 14Ondo' naratu' ra tana' makakusingan i, io no ulun ondo' mangkirongog ra bala' no, kaa' pagalabaan, kalangkayaan am kasagaan ru guang nilai ti galama' mamisi' ra bala' no saboi kawa' nilai kalo maansak toojo. 15Ondo' naratu' ra tana' malabung i, io no ulun ondo' mangkirongog ra bala' no am porondonon nilo ra guang ra matanda'. Mongorot ilo saboi manangkawa'.”
Lampung tiningkapan ra pasu'
(Mrk. 4:21-25)
16 “Kolondo' sangulun pana mansikit ra lampung am tingkapin no ra pasu' kapoam pasusuton ra saau ru pambalangan. Kaa' maaru' patampakon tupo ra tampakan ra lampung koson makito ru ulun binusasal no paat ra ilo mumpos.
17 “Atan ayuk nasibuni, paintalangon am atan ayuk kalo igondo' pinabala' ra ulun pabalaan am mapandayan.
18 “Ginio ra talinaasi' min noyo atan ondo' norongog mino. Sabap ra osoi mokoondo' noyo, ruangin poyo. Kaa' osoi kolondo' atan-atan, sanganu ayuk pana ondo' indos no soroi riso, alapon poyo.”
Ina' am pabukat ri Jisus
(Mat. 12:46-50; Mrk. 3:31-35)
19Ina' am pabukat-pabukat ri Jisus minongoi uma' Riso, kaa' kalo nakatuum ilo sabap ra masuang kaga' ulun. 20Mokoondo' nambala' ri Jisus, kono, “Tuan, ina' am pabukat-pabukat Muno soroi ra liwar no. Masaga' ilo tumuum Rirun.”
21Kaa' indagu i Jisus risilo, “Ulun ondo' sumugut ra bala' ri Aki Kapuuno' am gumagaya', ilo no ina' am pabukat-pabukat Kuno.”
Nampalinos i Jisus ra bagiu' mapuor
(Mat. 8:23-27; Mrk. 4:35-41)
22Paat ra sangarawan, i Jisus am maamaya' Nano siminakoi ra parau. Indagu i Jisus risilo, “Ongoi takano ra sandaup.” Ilo pana pasundoi. 23Paat ra ilo nasundoi i, nokororot i Jisus. Pulali' ratong bagiu' mapuor kaga' giu' ra tasik i. Sumubol boo timug i ra parau, saboi mampakalalaa' risilo ngaangai'. 24Karato' boo ru maamaya' Nano i Jisus, konilo, “Tuan, tuan, makalom takau!”
Palinoso' boo ri Jisus bagiu' am kinulun ra makalalaa' i. Longgo' boo bagiu' am kinulun i, tasik i pana maliuk boo kaga'. 25Indagu boo i Jisus ra maamaya' Nano, “Kua pai' kau pangintopot Raki'?”
Nangimuag am nalaa' ilo, am pasakuot ilo ra rondo' am bokon, “Osoi kia sotopot no ulun ragitio saboi gumagaya' bagiu' am kinulun no ra susuban Nano!”
Namabas i Jisus ra sangulun ondo' sinubol ru riwato
(Mat. 8:28-34; Mrk. 5:1-20)
26Nasundoi i Jisus am maamaya' Nano sumandaup ra tasik Galilia saboi ra rondo' intok inggalanin ra Girasa. 27Paat ri Jisus minasak ra nagas i, umaa' Io ru sangulun ungkuyon intor ra giu' ondo' sinubol ru nansalinut riwato. Nabuoi io no nantilagas ayuk am marara' mayan ra baloi, kaa' sumoroi io ayuk ra kalabangan. 28Pakakito io ri Jisus golok io, am igulatur io ra saang Nano am indagu ra mosongou, “Jisus, Anak ri Aki Kapuuno' Ondo' Masawat Kaga'! Atan kitaakon Muno raki'? Pai' aku imboloo'!” 29Minindagu ulun no koson raginio sabap ra susubon ri Jisus riwato no mingkual intor riso, sabap ra riwato no masalok mangayat riso. Kabalu' pana kalindu' am kalayam nano bangkilon ra rantai am alungin io toojo, kaa' lakat io ayuk poyo makauntas ra rantai no am ayaton io ra tana' kaagisan.
30Kuati' ri Jisus riwato no, “Osoi inggalan muno?”
Taam io, “I Ligion,” sabap ra masuang kaga' riwato siminubol riso. 31Gumogot toojo riwato-riwato no ri Jisus koson kalo pagiruon ilo giu' ra intok ru ulun namagatoi.
32Mamaar ra giu' i masuang kaga' bauwi naginakan ra kiing ru bulur. Ginio ra gumogot toojo riwato-riwato no ri Jisus koson pasubolon ilo ra bauwi-bauwi no. Kalo iningaan ilo ri Jisus. 33Ingkual riwato-riwato no intor ra ungkuyon no am subol ra bauwi-bauwi no. Pagigiru' bauwi-bauwi no, karatu' ra lagam am pakatapung ra tasik am kolosor ilo ngai'.
34Ulun-ulun magagalung ra bauwi no nakakito ra atan ondo' nasauk. Pagiru' ilo am mongoi pambala' giu' ra pekan am poyo ondo' makabaloi ra nakainggaar. 35Ongoi boo ulun masuang no ilong ra atan ondo' nasauk i. Pakasuku' ilo ra giu' i, kakito nilo ungkuyon ondo' sinubol ru riwato ra raitii' ni. Nanturung io ra tuma' ri Jisus, nambayang am niayuk matanda' io. Nalaa' ilo ngaangai'. 36Ilo ondo' nakakito ra nasauk i nantunung ra ulun bokon ra ati kulaan ungkuyon i nababas. 37Ngaangai' mamagun ru Girasa no nakitaak ri Jisus koson mangiruan ra intok raginio sabap ra nalaa' ilo kaga'. Ginio ra sakoi i Jisus ra parau am uli' Io no. 38Ulun iniruanan ru riwato no masaga' maya' ri Jisus.
Kaa' kalo pinaaya' io. 39Indagu i Jisus, “Uli' no ra intok muno galama' am potonowo' noyo ra atan ondo' binaal ri Aki Kapuuno' rirun.”
Ugar boo ungkuyon no am ongoi pampatanou ra ngaangai' ulun ra giu' i ra atan ondo' binaal ri Jisus riso.
Anak ruandu' ri Jairus am ruandu' ondo' nangambong ra sukub ri Jisus
(Mat. 9:18-26; Mrk. 5:21-43)
40Pakasandaup i Jisus ra tasik no, naansukan kaga' ulun masuang no nanguma' Riso sabap ra nagiginaa ilo Riso. 41Ratong boo sangulun tingganai ru baloi sambayangan makainggalan ri Jairus. Igulatur io ra saang ri Jisus am makiasi' koson mompoongoi ra baloi nano. 42Sabap ra anak ruandu' langkuir nano ondo' makaumur mopor am ruo ngambilor marualan am maar noyo matoi.
Liliwa' i Jisus mangkiralan mongoi ra baloi ri Jairus ti, magigisok ulun masuang no minggaar Riso. 43Mokoondo' intor risilo i sangulun ruandu' ondo' mopor am ruo ngambilor noyo buoi no makamaruol ra liniuran. Kinai' no ngaangai' longgom nano koson makibabas ra duktur, kaa' maruol nano kalo naalap kababas. 44Inggaar ruandu' no ri Jisus intor ra bakulung am kambong ra pompor ru bayang ri Jisus i. Sangkuliop ayuk am kapali' io. 45Pangkuot i Jisus, “Osoi kiminambong Raki' ni?”
Kaa' inali' ru ngaangai' ulun. Taam boo i Pitrus, “Tuan, masuang kaga' ulun makaguut Rirun sabap ra magigisok ilo minggaar Rirun!”
46Kaa' indagu i Jisus, “Raitii' ni mokoondo' kiminambong Raki', sabap ra nalimanan Ku mokoondo' kuasa' miningkual intor Raki'.” 47Pakatutun ruandu' no ra binaal nali napandayan noyo, nonontol io mininggaar ri Jisus am igulatur ra saang Nano. Tunungo' no ra saang ru ulun masuang no kua kambong io ri Jisus am ati kulaan kapali' maruol nali ra mataki'. 48Indagu i Jisus ra ruandu' no, “Napali' kou sabap ra nangintopot kou Raki'. Ugar no mabaya' ra kaansayan.”
49Paat ri Jisus lakat ayuk poyo mindagu, mokoondo' sangulun minatong intor ra baloi ri Jairus. Indagu io ri Jairus, “Tuan, anak muno minatoi noyo. Pai' noyo pantipagon ra Mangingila' no.”
50Pakaining ayuk i Jisus raginio indagu Io ri Jairus, “Pai' kalaa', kaa' pangintopot ayuk am mababas anak muno.”
51Pakasuku' ayuk ra baloi, inggalari' ri Jisus ulun maya' umpos. Ondo' ayuk inibit Nali am i Pitrus, Juanis, Jakubus am matuo ru lalaing no ayuk. 52Ngaangai' ulun nantangi' am nanulaboi sabap ra pinatayan ru anak no. Kaa' indagu i Jisus, “Pai' pantangi'. Kalo minatoi anak no, kaa' nokororot ayuk.”
53Nangiis ilo ri Jisus sabap ra nakapandai ilo ra anak ruandu' no minatoi noyo. 54Guuto' ri Jisus longon ru anak no am indagu Io ra mosongou, “Anak, sukal no!” 55Paat ragili niayuk anak ruandu' ti namainawo saguli' am sukal io boo. Susubo' ilo boo ri Jisus mampaakan ra anak no. 56Matuo ru anak no nangimuag toojo. Kaa' kalo pantunungon ilo ri Jisus ra baal ragitio ra osoi ayuk pana.
Currently Selected:
LUKAS 8: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.