AYUP 41
41
1 Makarakop kou kia ra Liwiatan ra pamata'?
Mabangkos mu kia rila' nano ra kalat?
2Makalatan mu kia jujubak nano,
kapoam mampatujok ra pamata' ra bungul ru salura nano?
3Maaru' lair Liwiatan makilabus
kapoam mangambi' rirun, makimasi'?
4Maaru' lair Liwiatan nakimagiou rirun,
am nabantu' ra mangandoi rirun ra masalok?
5Maaru' lair binangkil mu Liwiatan koson ra susuit tagamin,
ondo' mapabansuk ra guang ru ulipon-ulipon ra ruandu'?
6Maaru' lair ulun mangimpait mantalan riso,
kapoam ulun mantatalan nantayar-tayar riso ra gino ngai' ilo?
7Matujok mu kia kungkung nano ra tutura' talu mato,
kapoam monobok ra ulu nano ra tanggulan?
8Guut ra Liwiatan kaigondo' ayuk am kalo boo mangkinam kou;
kalo malilianan mu pagugulaan raginio!
9Osoi ayuk nakakito ra Liwiatan
magiru' ambiluo am malausan.
10Masangit Liwiatan paat karaton intor ra bolong nano;
kolondo' sangulun pana baani migor ra saang nano.
11 Osoi kia makabulunsar riso ra kalo mapilatan?
Kolondo' osoi pana ra tana' ti makakau' mambaal raginio.
12Mambala' Aku rirun intor ra kalayam ru maayo ulun no,
am intor ra kaikangan nano am babaal ru inan nano ondo' maindon no.
13Kolondo' osoi pana ondo' makarilak ra bayang no ra pinaralimbou no,
kapoam makatagu' ra bayang basi' ondo' binayang nano.
14Osoi kia makaukab ra jujubak nano ondo' maikang,
ondo' mokoondo' ra ripon ondo' makalalaa'?
15Bakulung nano koson ra perisai ondo' nalulur,
ondo' nonsokot ra narikit am mokotog koson ra batu.
16Nagigintun, binangkos ra naigot
saboi angin pana kalo makasisip.
17Ngaangai' no nonsokot ra mapiot
saboi kalo maalap ra lungkab.
18Sinda ra kukuliat paat mantarisu' Liwiatan no,
am mato nano mapaang koson ra mato ru orou sumirang.
19Apui mingkual intor ra kabang nano,
am rila' ru apui mansisiab.
20Lisun kukulampun mingkual intor ra arung nano,
koson ra pagangan ondo' palasuon saboi suang nano rumiri'.
21Paminawo nano makapaang ra baa;
apui mingkual intor ra kabang nano.
22Liog nano maikang kaga',
saboi ulun makauma' riso no malaa'.
23Kolondo' tayar ondo' malawo ra kungkung nano;
kungkung nano mokotog am kalo noyo lair mapilang.
24Guang nano mokotog koson ra batu, kalo makaulig ra malaa',
am mokotog koson ra batu gilingan.
25Paat ra makarat Liwiatan, ulun ra maikang kaga' pana mairu' kinabaani no;
lumami' ilo sabap ra malaa' kaga'.
26Kolondo' ilang ondo' makapilat riso;
kolondo' tutura', panah kapoam tanggulan ondo' mamilat riso.
27Basi' kinara' no koson ra rami,
am gangsa' koson ra tataun napasa'.
28Kolondo' panah ondo' makapampagiru' riso;
batu ondo' pinobobol riso, koson ra puputul ru rami.
29Tataun pamalamba' kinara' no koson ra sakot mapua',
am Liwiatan nakakurit paat ulun mopobobol ra tanggulan.
30Sisi' ra tinai' nano koson ra rarapu' ondo' makalas am malarom,
koson ra kuliamos pangagik ondo' manguol ra losok.
31Raat kinuyau no saboi natilu ra timug rumiri',
am koson ra umau ondo' makaputa'-puta' giu' ra ralalom ru pagangan.
32Nampatatang io ra babaya' ondo' makasinda,
raat kinulau no nasauk ra puta' ondo' mapulak batik nano.
33Giu' ra ralimbou ru tana', kolondo' mokogondo' ra Liwiatan;
ginio noyo ondo' maayag ondo' kalo malaa'.
34Bibiag ondo' malilimbau kaga' pana asabin no;
ra gino ngai' ru bibiag masigo, Liwiatan noyo raja'.”
Currently Selected:
AYUP 41: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.