MATHI 24
24
Jisuei Lembüchem Lusaklabü shangabü Laubü
(Mk 13.1-2; Lk 21.5-6)
1Jisu lembüchem ka longan hao jembü lam to hauko kijinei, hao eikshuong hao la lembüchem dangbü shean lenla loukei. 2Haoei haoen to jongaikei, “Kanei habü pendou hapdaoba lo? Ngühmaia ngei kan to lenda, hanei laang che thüka che tenan alusakko akilabü.”
Khonsak hoba Shieikoe
(Mk 13.3-13; Lk 21.7-19)
3Hao Oliv shongha setan kijinei eikshuong sanshoua loukei hoba laukei, “Habü ladang loushedla, hoba no loubü hoba kaodak thonbü amaaphilabü ai yingla? Kün la lenbüma.” 4#Jer 29.8 Jisuei haoen to jongaikei, “Kan aolakei ayinglamto aleilangtila maangsangshi. 5Aishanga müt juongei kü nyena, ‘Ngo Khrista’, dogo lauko loulabü, hoba haoenei juong ayinglam to leilanglabü. 6Kanei wapyobü langh hoba wapyolabü ngühlang ditlabü. Kan amokla maangsangashi. Ho haüthükjan, lausikei thonbü tou aying. 7Aishanga phangei phang khulimbo hoba sangleei sangle khulimbo lolabü, kaoen kaoena mühsinou hoba selonyibü kilabü. 8Khübü pendou kho khonkula khangbü ki.
9“Kheijinei haoenei kan khonsak haptila khümbo kulabü hoba haitilabü, hoba kü nyen laüa phang pendouei kan mangsenlabü. 10Kheijinei juongnyu phaiyetlabü, cheei che khüpettilabü, cheei che mangsenyolabü, 11hoba amlangbü thuseibü juong longlabü hoba juongnyu ayinglam to leilanglabü; 12hoba ngühkhüm lulimbü pühabuba müt juongeibü sanou litham aplabü. 13Lausikei aoei thonbü sühko natenlaje hao khümenlabü; 14hoba ho Khuthük Sangle Ngühlangmaibü kaodak pendoua phang pendou to aukabü shanga songlenlabü, hoba kho phaia thonbü kho loulabü.
Mangsenlabü Leilubü
(Mk 13.14-23; Lk 21.20-24)
15 #
Dan 9.27 “Daniel thuseibüei laubü mangsenlabü ladang kanei sao- pobü kaoena loan haplaje (webouei shuokashi); 16kheijinei Jihudaa aoyou ki shongh to satjan; 17chemdaka kibou müt hao chem to peisilei sungla ayanjan; 18hoba seka khüpbou müt jembü neisimei sungla angaijan. 19Khübü chaloua mang akongbü hoba senyopbü yaksa shuong shanga ügütü!
20“Kan satyobü khamalüha ayingsi Nounyet ayingtila welauashi, 21aishanga kheijinei khonsak khonku yaang kilabü, kaopak jih ka tou sühko ho tegübü akitei; hoba toukei akilabü. 22Khübü chalou ka awemauku tegüje müt aokei akhümenkhoulabü; lausikei khümenbü dan laüa khübü chalou shuong tuitikulabü. 23Kho jiha müt atei kan to, ‘Chühashi, Khrista hanei kia,’ ayingsi ‘Khünei kia’ dogo laua longa maitelemma; 24aishanga amlangbü Khrista dan hoba amlangbü thuseibü dan longlabü, hoba thüka longa saopobü shuongkei ayinglam to leilangla shanga amaaphilabü yaang hoba maangpanglabü lenlabü. 25Chühashi ngei kan la thedangto tham lena. 26Hibü haoenei kan to, ‘Chühashi, hao yama kia’, dogo laua longa tohauma; ‘Chühashi, maangkabü popchema kia’ dogo lausi maitelemma; 27aishanga chaang aeka langpon khitsi chanep ae sühkokei lai hauda, kho tegütham Müteibü Shou loubü kilabü. 28Lanei ong haibü mang kilaje, khonei hogon shuong chela shaian kilabü.
Müteibü Shou Loubü
(Mk 13.24-27; Lk 21.25-28)
29 #
Jol 2.10,31 “Habü khonsak khonku wanbüsi chanyu nakthühan aplabü, hoba litnyuei jembü ngesakbü akulabú, müh ka khanshoulitshou shuong atlabü, hoba mühkabü hau shuong nyaakeilabü.
30“Hobaje kheijinei müha Müteibü Shou amaaphilabü longlabü hoba kheijinei kaodak phang pendouei khüklangto jangngaiko haaplabü, hoba haoenei Müteibü Shou mühkabü sangmai si sei hoba soneikangbü yaanga loubü haplabü.
31“Hobaje teklaang ngühlang yaangbüei haoei jembü khuthük hangangbü shuong hautilabü, hoba haoenei müh jithon ka jithon sühko kaophei lei ka jembü pienbü shuong leishailabü.
Bhuklong ka Ditletbü
(Mk 13.28-31; Lk 21.29-33)
32“Bhuklong ka ngühphatbü che ditletashi. Ladang hao bhekshou alibü sapbo yik longda, kanei sulang nepa dogo ngekei. 33Hibü kaneikei khübü pendou hapjinei, Müteibü Shou nyangbüa, khei koukhüm junga kia dogo ngeshi. 34Ngühmaia ngei kan to lenda, habü pendou aloushad shongko ho meten adanlabü. 35Müh si kaodak dankhümlabü lausikei kü ngüh adankhümlabü.
Aoeikei Chalou si Jih Angekei
(Mk 13.33-37; Lk 17.26-30,34-36)
36“Lausikei ho chalou hoba jihsiphai shangabü khuthük hangangbü shuongeikei, ayingsi Shoueikei angekei. Bouei ong ngekei. 37#Kao 6.5 Aishanga Noa meten ailai kiteikei, kho tegü Müteibü Shou loubü kilabü. 38Aishanga yungsen asühjinei, hoba Noa longchem to ütshongko, haoenei ailai shauko, yungko hoba laolam yaknga kuyoko kikei, 39hoba yungsen loukouan haoen pendou ohaulang shongko haoenei ange. Müteibü Shou loubü kho tegü kilabü. 40Kheijinei müt nyi seka khüpan kilabü, che leilanglabü hoba che apyolabü. 41Yaksa nyi shem shiko kilabü; che leilanglabü hoba che apyolabü. 42Pialemashi, aieilausi ai chaloua kaneibü Bunyubou loulaje kanei angekei.
43“Kanei ho ngeashi, chembubouei ai jihsiphaia kokbü loula kho ngea tegüje, haoei lombo kikhoulabü hoba haoei jembü chem teleilutikhoulabü. 44Hibü kankei lamlean kishi, aieilausi kanei adambü jih chenei Müteibü Shou loulabü.
Maanglanbü ayingsi Alanbü Sambü
(Lk 12.41-48)
45“Kholongaje chembubouei jembü sambü shuong la jih tetbüa shausiyung kula shanga haoen thüka ikjai letibou maanglemenbü hoba songsido kibü sambü kho ao? 46Haoeibü chembubou loujinei, sambü aoei khei kümbo haplaje, hao olinbou. 47Ngühmaia ngei kan to lenda, haoei kibü pendou thüka hao ikjai letilabü. 48Lausikei amaibü sambüei, ‘Ngeibü chembubou loula phaida’ dogo lauda, 49hoba haoeibü jenabou sambü shuong to ngümla khangda, hoba ihyungbü dan yoa shaula hoba yungla khangda, 50sambüeibü chembubou haoei adambü chalou chenei hoba haoei angebü jihsiphai chenei loulabü, 51hoba hao netla yeiko jemnyinlabü hoba hao phejan hibüyoubü dan yoa janletkulabü. Khünei haapbü hoba hauh uyobü kilabü.”
Currently Selected:
MATHI 24: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.