MATHI 25
25
Medei Aneibü Ngühphatbü
1“Kheijinei Khuthük Sangle kho saosüngbü medei an wanthung jungan, chemkanbü shuokla haubü phatko kilabü. 2Haoen yoa ngao asangbü hoba ngao sangbüdobü kiteikei; 3aishanga asangbü shuongei jembü wanthung jungkei lausikei wandei akün; 4lausikei sangbüdobü shuongei jembü wanthung yoa lathunga wandei künkei. 5Chemkanbou loula phaisije haoen pendou ngakkei hoba nyeket shikei.
6“Lausikei metuphanga ngekko laukei, ‘Chemkanbou, chühashi! Hao to shuokyola hauashi.’ 7Kheijinei saosüngbü medei shuong pendou pienkei hoba jembü wanthung lamlekei. 8Asangbü shuongei sangbüdobü shuong to laukei, ‘Kaneibü wandei ka kün la shijo jinbüma, aieilausi küneibü wanthung nyetda.’ 9Lausikei sangbüdobü shuongei jongaikei, ‘Kün shanga hoba kan shanga wandei souko akila thükkei. Kan yakbü shuong jungto haushi hoba kan shanga jekashi.’ 10Haoen jekla hauko kitoua chemkanbou lousühkei, hoba aoyou lamlean kiteikei haoen hao yoa chemkan lem to haukei, hoba kou khinngailangkei.
11“Phaila joubü saosüngbü medei shuongkei louan laukei, ‘Yaangbou, Yaangbou, kün la ipbü.’ 12Lausikei haoei jongaikei, ‘Ngühmaia ngei kan to lenda, ngei kan angekei.’ ” 13Hibü pianleman kishi, aieilausi kanei chalou ayingsi jih angekei.
Sambü Semeibü Ngühphatbü
(Lk 19.11-27)
14“Ho müt cheei jembü sambü shuong ngashaian, jembü peisilei haoen la khümbo kuan lubü kaonyek to satbü phatkei; 15che la haoei namsen ngao kukei, lubü che la nyi, hoba lubü che la che, dogo mütpem weko la luluei thükbü minbü thüng kukei hoba hao lubü kaonyek to satkei. 16Namsen ngao sungletbouei tongde hauan khoei nam seikei hoba haoei namsen ngao pailetkei. 17Jeteitham namsen nyi sungletbouei kei namsen nyi pailetkei. 18Lausikei aoei che sungletkei haoei hauan kao thuan jembü bunyueibü nam huan phokei.
19“Jihsiphai lounyu kian phaia khübü sambü shuongeibü bunyu loukei hoba haoen yoa we- yokei. 20Aoei namsen ngao sungletkei haoei tokei namsen ngao aeila sungbako laukei, ‘Yaangbou, nyi kü la namsen ngao kukei, chühashi, ngei namsen ngao aei paileda.’ 21Hao sambouei hao to laukei, ‘Thumai, maibü hoba maanglembü sambü! Peisilei shijo thüka ka to maanglemenkei; ngei no juongnyu thüka phokulabü. No kaibü chembubou olinbü to lotashi, kaiya.’ 22Aoei namsen nyi sungletkei haoeikei louan laukei, ‘Yaangbou, nyi kü la namsen nyi kukei. Chühashi, ngei namsen nyi aei paileda.’ 23Hao sambouei hao to laukei, ‘Thumai, maibü hoba maanglembü sambü! Peisilei shijo thüka ka to maanglemenkei; ngei no juongnyu thüka phokulabü. No kaibü chembubou olinbü to lotashi, kaiya.’ 24Lausikei aoei namsen che sungletkei hao louan laukei, ‘Yaangbou, ngei no ngekei; no kausakbü müt, nyi lan awen khüka latda, hoba nyi lan aphin khüka yoshaida. 25Ngo hatko kikei hoba hauan kaibü namsen kaoa hukei. Chühashi, kaibü hanei kia.’ 26Hao sambouei hao to laukei, ‘No amaibü hoba haulohaushed sambü! Ngei ainei awen khüka latda, hoba ainei aphin khüka yoshaida, dogo nyi ngekei lo? 27Palongaje namthanbü dan la nyi kü nam kuan phokujan; hoba ladang ngo longeilaje künam yoa phopnam yoan hapmeikhoulabü.’ 28Hao ka namsen kho sungashi hoba namsen an kibou la kuashi; 29aishanga aoei ki hao la aei kuyolabü, hoba haoei apsileko kilabü; lausikei aoei aki, haoei ai ki khokei hao ka langlabü. 30Lejim akibü sambü kho khongaenei nakthühbü kaoena apashi; khonei haapbü hoba hauh uyobü kilabü.”
Thonbü Matjem
31“Ladang Müteibü Shou jembü soneikangbü hoba hao yoa khuthük hangangbü pendou louyenlaje, kheijinei hao jembü soneikangbü setshanga setlabü; 32hoba phang pendou hao thedanga leisheilabü, hoba sanlombouei lon ka san pinyinbü tegü, haoei haoen che ka che pin- yinlabü, 33hoba haoei san shuong haoeibü mae aenei hoba lon shuong nanaenei pholabü. 34Kheijinei Chobaei haoeibü mae aenei kibü shuong to laulabü, ‘Kaiya, Kübouei haükubü shuong, kan shanga kaopakjinei thama lamlean phokubü sangle phet phanashi; 35aishanga ngo mühei haiko kikei hoba kanei kü la oknyinkei; ngo deilako kikei hoba kanei kü la inkei; ngo yenla lean kikei hoba kanei ngo leiyetkei; 36ngo mütkong kikei hoba kanei kü la neikukei; ngo shatko kikei hoba kanei ngo pean chühkei; ngo thüngdanga kikei hoba kan kü jungto loukei.’ 37Kheijinei sao- pobü shuongei hao to jongaikei, ‘Bunyubou, ladang künei no mühei haiko hapan oknyinkei, ayingsi deilajinei inkei? 38Ladang künei no yenla lean hapan leiyetkei, ayingsi mütkong kian neikukei? 39Ladang künei no shatko hapan, ayingsi thüngdanga kian kajungto loukei?’ 40Chobaei haoen to jongaikei, ‘Ngühmaia ngei kan to lenda, habü ngeibü jaisina hanboutham yoa che to ongkei, kanei ai kümbei, kho kanei kü shanga kümbei.’ 41Kheijinei haoei nanaenei kibü shuong to laulabü, ‘Kan shedsikhau baubü shuong, kü jungka kukashi, hoba Satan hoba haoeibü hangangbü shuong shanga thon akibü wan lamlean phobü khüto atashi; 42aishanga ngo müh kikei hoba kanei aoknyin; ngo deilako kikei hoba kanei yungla aku; 43ngo yen la lean kikei hoba kanei ngo aleiyet; ngo mütkong kikei hoba kanei kü la aneiku, shatko hoba thüngdanga kikei hoba kanei ngo pean achüh.’ 44Kheijinei haoeneikei jongailabü, ‘Bunyubou, ladang no mühei haiko, ayingsi deilako, ayingsi yen la lean ayingsi mütkong, ayingsi shatko, ayingsi thüngdanga hapbei, hoba künei ka to athui?’ 45Kheijinei haoen to jongailabü, ‘Ngühmaia ngei kan to lenda, habü phangkabou shuong yoka che to ongkei kanei ai aküm, kho kanei kü shanga aküm.’ 46Haoen thon akibü shieikoe to haulabü, lausikei sao- pobü shuong ponpen thon akibü langkei to haulabü.”
Currently Selected:
MATHI 25: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.