MATHI 23
23
Maangsanglabü Lenbü
(Mk 12.38-39; Lk 11.43,46; 20.45-46)
1Kheijinei Jisuei noknyüh to hoba hao eikshuong to lenko, 2laukei, “Ngühkhüm lenbou shuong si Farisi shuong Mosa setshanga setda. 3Hibü haoenei kan to ai ong lenlaje kümashi hoba jungeiashi; lausikei haoenei tegü kanei teküm, aishanga haoenei lauda hoba akümda. 4Haoenei on atshaibü chela khühyoan müteibü phak to jinkuda, lausikei haoeneije khübü phonenla ikjishou ongkei topeimang asühda. 5Haoeneibü kümsilei pendou mütei chühtila haoenei kümda. Aishanga haoenei saopobü shijimok yaangtida hoba neiyikshen loutida; 6haoenei lemshou lemyaanga kaoen maibou hoba sinagoga thükkabou setshang, 7namyakshanga salem mangsühda, hoba mütshuongei, Lenbou, dogo ngatimang sühda. 8Lausikei kan to Lenbou dogo angatijan, aishanga kanei Lenbou che ki, hoba kan pendou jaisina. 9Kaodaka aotokei kaneibü bou dogo tenga, aishanga kanei khuthüka Bou che ki. 10Hobaje leiyeibou dogo tengati, aieilausi kanei Leiyeibou che, Khrista ki. 11Kan yoa pendou to yaangbou kho kan khangenbou yinglabü. 12Aoei jembü lolo yaanglaje hao hanlabü, hoba aoei jembü lolo hanlaje hao yaanglabü.
Jisuei Haoen Hibüyoubü Yuktibü
(Mk 12.40; Lk 11.39-42,44,52; 20.47)
13“Kan Ngühkhüm lenbou hoba Farisi, hibüyoubü shuong, ügütü! Kanei müt thedanga khuthük Sangle kou khinan apda; kan jembükei üetda, hoba atla haujembü shuongkei üettida.
14(“Kan Ngühkhüm lenbou hoba Farisi hibüyoubü shuong, ügütü! Haptila shanga loubang welauko kiankei, kanei latnyu shuong chem suida; kho aoa kanei kayang yaangbou hapmeilabü.) 15Kan Ngühkhüm lenbou, hoba Farisi hibüyoubü shuong, ügütü! Kanei müt che sepeitila shanga yungnyu si kaodak kaijembo paida; hoba hao khei yeijinei kanei hao kan to phejan nyiei aei kan tegü molowan shousi la yeitida.
16“Kan nyekthubü lamleibü shuong, ‘Müt cheei lembü chem phongko thelet lanleda longa, kho ai aying; lausikei ao mütei lembü chem kabü hon nyen phongko thelet lanletlaje haoje asatenkei’, dogo lenbü shuong ügütü! 17Kan ngoubü hoba nyekthubü dan! Laobou yaangkei, hon si, hon saüenbü la yeitibü lembü chem? 18Tokei, ‘Müt cheei lemshon phongko thelet lanleda longa, kho ai aying; lausikei ao mütei kho thüka kibü jongsak nyen phongko thelet lanletlaje haoje asatenkei.’ 19Kan nyekthubü dan! Laobou yaangkei, jongsak si, jongsak saüenbü la yeitibou lemshon? 20Aoei lemshon phongko thelet lanletda, lemshon hoba kho thüka kibü pendou phongko thelet lanletda; 21hoba aoei lembü chem phongko thelet lanletda, lembü chem hoba khonei kibou nyen phongko thelet lanletda; 22hoba aoei khuthük phongko thelet lanletda, Mühghaü setshang hoba khonei setbou nyen phongko thelet lanletda.
23“Kan Ngühkhüm lenbou hoba Farisi, hibüyoubü shuong ügütü! Kanei shongen, hong- pangshou hoba shikmei maitibou an phejan kuda, hoba kanei Ngühkhüm kabü kongnyu shuong, khei; ngühmai, üeisanou, hoba mailem wailetda. Kanei habü küman kijan, hoba lubü khokei wailetan aphokujan.
24“Nyekthubü lamleibü dan, kanei shomesho ngaitian apda, lausikei utje suida!
25“Kan Ngühkhüm lenbou hoba Farisi, hibüyoubü shuong ügütü! Kanei thung si phau dangje samda, lausikei maangje ailamaiphop si athepetbü maangdühei shenettiakei. 26Nyekthubü Farisi, shaangla thung maang hiashi, khoei dangkei hinseilabü.
27“Kan Ngühkhüm lembou hoba Farisi hibüyoubü shuong, ügütü! Kan hee thupaibü phatakei, laobou dang chühla he maikei, lausikei maangje haibü shuongeibü losilak hoba asaopobüei shenan ki. 28Hibü kan kei müt thedanga saopobü tegü, lausikei maangje hibüyoubü hoba ngühkhüm lulimbüei shenan ki.
Jisuei Haoeneibü Kayang Tetenkubü
(Lk 11.47-51)
29“Kan Ngühkhüm lenbou hoba Farisi hibüyoubü shuong, ügütü! Kanei thuseibü shuongeibü hee kümda hoba saopobü shuongeibü hee chühjanko yaüda; 30hoba kanei lauda, ‘Kün pisibou metena kün kibü yingma, thuseibü shuong haitibüa haoen yoa kün teyokhoulabü.’ 31Hibü kanei jembü lolo kan thuseibü shuong haitibü shisishousi dogo aukabü kuda. 32Khülongaje kan pisibouei püngkubü shemtiashi. 33Kan pinyu shousi shuong, kanei ailai molowan matjem ka satenla? 34Khoei ngei kan la thuseibü shuong, songngedonge shuong hoba Ngühkhüm lenbou shuong hautikuda. Haoen yoka kanei at haitilabü hoba peiseia thüngettilabü; haoen at kanei kaneibü sinagoga semeilabü, hoba sangnyu ka sangnyua sühko shieilabü; 35#2 Ld 24.20-22 hoba kho laüa kaodaka saopobü sii phinbü pendou, khei ngühmaanglanbü Abel sii la jaüan kanei saoposhang si lemshon kanglanga haitibü Barakhia shou Zekharia siia sühko kan thük to shatlabü. 36Ngühmaia ngei kan to lenda, khübü pendou shangabü kayang ho meten thük to loulabü.”
Jisuei Jerusalem to Sanoubü
(Lk 13.34-35)
37“Jerusalem, Jerusalem, kan thuseibü haitibü hoba kan jungto hautibü dan laangei sonettibü shuong, aunyuei jembü shoushou shuong saoeibü kaakphanga yopbü tegü, ngei ladüngnei ka shousi shuong kü jungto leishaila haujembei, lausikei kanei amangsüh! 38#Jer 22.5 Chühashi, kaneibü chem kan la kongkong apyokuda. 39Aishanga ngei kan to lenda, ‘Bunyubou nyena ao louda hao haülabü yingshi’, dogo alau shongko, tou ka jaüan kanei ngo ühüplaü.”
Currently Selected:
MATHI 23: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.